ಮನದ ಮಾತು

ಕನ್ನಡ ಸ್ಮಿತೆಗಳು

2006-09-07T09:57:00.000-05:00

ಮುನ್ನುಡಿ:
ಅಂತರ್ಜಾಲದಲ್ಲಿ ಸಂವಹನ(communication) ಕನ್ನಡದಲ್ಲೇ ವ್ಯಾಪಕವಾಗಿ ನಡೆಯುತ್ತಿರುವುದು ಅತ್ಯಂತ ಸಂತಸದ ಸಂಗತಿ. ಕನ್ನಡದಲ್ಲೇ ಚರ್ಚಿಸುವುದು, ಕನ್ನಡದಲ್ಲೆ ಹರಟೆ ಹೊಡೆಯುವುದು, ಕನ್ನಡದಲ್ಲೇ ಬ್ಲಾಗಿಸುವುದು, ಕನ್ನಡದಲ್ಲೇ ಪ್ರತಿಕ್ರಿಯಿಸುವುದು ನಡೆಯುತ್ತಿದೆ ಮತ್ತು ಇವೆಲ್ಲವೂ ದಿನೆ ದಿನೆ ಹೆಚ್ಚುತ್ತಿದೆ.
ಸ್ಮಿತೆಗಳ (Smileys) ವಿಚಾರದಲ್ಲಿ ಕನ್ನಡದ ಬಳಕೆ ಅಷ್ಟು ಇದ್ದಂತಿಲ್ಲ.
ಕನ್ನಡದಲ್ಲಿ ಬರೆಯುವಾಗ, ಸ್ಮಿತೆ ಹಾಕುವ ಉದ್ದೇಶಕ್ಕಾಗಿಯೇ ಇಂಗ್ಲೀಷ್ ಮೊರೆ ಹೋಗಿ, :D, X-(, LOL, ROFLOL, BRB, :O, :P ಇತ್ಯಾದಿಯಾಗಿ ಬಳಸುತ್ತಿದ್ದೇವೆ.

ಇವುಗಳನ್ನೂ ಕೂಡ ಕನ್ನಡದಲ್ಲಿಯೇ ಏಕೆ ಬಳಸಬಾರದು ಎಂದು ಕೆಲವರೊಂದಿಗೆ ಚರ್ಚಿಸಿ, ಕನ್ನಡದಲ್ಲಿಯೆ ಟೈಪ್ ಮಾಡಿ ಭಾವನೆಗಳನ್ನು ವ್ಯಕ್ತಪಡಿಸಬಹುದಾಂತ ಸ್ಮಿತೆಗಳನ್ನು ರೂಪಿಸುವ ಕೆಲಸ ಪ್ರಾರಂಭಿಸಿದೆವು.
ಸುಮಾರು ೨ ತಿಂಗಳ ಸುದೀರ್ಘ ಚರ್ಚೆಯ ಫಲಿತಾಂಶವನ್ನೇ ಇಂದು ನಿಮ್ಮೆಲ್ಲರ ಮುಂದೆ ಹಂಚಿಕೊಳ್ಳುತ್ತಿದ್ದೇವೆ. ಈ ಸ್ಮಿತೆಗಳ ಜೊತೆಗೆ, ಬೆಂಗಳೂರಿನ ಬಿ.ಆರ್.ಕಿರಣ ಅವರು ರೂಪಿಸಿರುವ ಮಿಂಚೆ ಮತ್ತು ಚಿಕ್ಕೋಲೆ ಪದಗಳನ್ನು ಬಳಸಬೇಕೆಂದು ನಿರ್ಧರಿಸಿದ್ದೇವೆ. ಈಗಾಗಲೆ ಈ ಪದಗಳು ಕನ್ನಡದ ಕೆಲವು ಯಾಹೂ ಗುಂಪು, ಗೂಗಲ್ ಗುಂಪುಗಳಲ್ಲಿ ಪ್ರಚಲಿತವಾಗಿವೆ.

:O ==> :ಓ (ಓಹ್)
:D ==> :ಹ (ಹಲ್ಕಿರಿ)
:P ==> :ನಾ (ನಾಲಿಗೆ ತೋರಿಸು)
:-h ==> :ಟಾ (ಟಾಟಾ)
:-? ==> :ಯೋ (ಯೋಚನೆ)
X-( ==> :ಗುರ್ರ್ (ಗುರ್ರ್ ಅಂತ ಕೋಪ ತೋರಿಸು)

LOL ==> ಬಿಬಿನ/ಎಬಿನ (ಬಿದ್ದು ಬಿದ್ದು ನಗು/ಎದ್ದು ಬಿದ್ದು ನಗು)
ROFLOL ==> ನೆಮೇಬಿಬಿನ/ನೆಮೇಎಬಿನ (ನೆಲದ ಮೇಲೆ ಬಿದ್ದು ಬಿದ್ದು ನಗು/ನೆಲದ ಮೇಲೆ ಎದ್ದು ಬಿದ್ದು ನಗು)
OMG ==> ಅದೇ (ಅಯ್ಯೋ ದೇವರೆ)
BRB ==> ಈಬ (ಈಗ ಬರ್ತೀನಿ/ಬರುವೆ)
*thumbsup* ==> *ಜೈ*

:ಸಿ = ಸಿಗೋಣ
:ಮಸಿ = ಮತ್ತೆ ಸಿಗೋಣ
:ಕಕಾಂ = ಕರ್ಮಕಾಂಡ
:ಕಕಾಂಪ = ಕರ್ಮಕಾಂಡದ ಪರಮಾವಧಿ
:ಶಿಶಂ / :ಸಿಸಂ = ಶಿವನೆ ಶಂಭುಲಿಂಗ / ಸಿವನೆ ಸಂಭುಲಿಂಗ
:ಯಚಿ / :ಎಚಿ = ಯಕ್ಕಾಚಿಕ್ಕಿ / ಎಕ್ಕಾಚಿಕ್ಕಿ
:ನನಸು/ಸಾ = ನಕ್ಕು ನಕ್ಕು ಸುಸ್ತು/ಸಾಕಾಯ್ತು
:ಟೋಕೆ = ಟೋಪಿಗಳು ಕೆಳಗೆ
*ಚಿಂಚಿ* = ಚಿಂದಿ ಚಿತ್ರಾನ್ನ

SMS/sms ==> ಚಿಕ್ಕೋಲೆ (ಚಿಕ್ಕ ಓಲೆ)
email ==> ಮಿಂಚೆ (ಮಿಂಚಿನ ಅಂಚೆ)

ಮಿಂಚೆ ಪದದ ಕ್ರಿಯಾಪದ(verb) ರೂಪ - *ಮಿಂಚಿಸು*
Eg: Email that matter to everyone ==> ಆ ಮಾಹಿತಿಯನ್ನು ಎಲ್ಲರಿಗೂ ಮಿಂಚಿಸಿಬಿಡು.

ಮುಗಿಸುವ ಮುನ್ನ:
ಹೇಗನ್ನಿಸಿತು? ಕನ್ನಡ ಸ್ಮಿತೆಗಳ ಬಳಸಲು ನೀವು ಸಿದ್ಧರಿರುವಿರೆ? ತುಂಬಾ ಸಂತೋಷ, ಬನ್ನಿ ಕೈ ಜೋಡಿಸಿ.

ಇಂತಿ,
ಕನ್ನಡ ಸ್ಮಿತೆಗಳ ಬಳಕೆದಾರರ ಬಳಗ
http://www.orkut.com/Community.aspx?cmm=20116420

ವಿನಾಯಕ ಜೋಶಿ - ಕನ್ನಡ ಚಿತ್ರರಂಗದ ನವನಾಯಕ ನಟ

2006-08-19T00:30:00.000-05:00

ಮುನ್ನುಡಿ:
ಕನ್ನಡ ಚಿತ್ರರಂಗದಲ್ಲಿ, ಬಾಲನಟನಾಗಿ ತಮ್ಮದೇ ಆದ ಛಾಪು ಮೂಡಿಸಿ ನಂತರ ನಾಯಕರಾದವರ ಪಟ್ಟಿ ದೊಡ್ಡದಾಗಿಯೇ ಇದೆ. ಪುನೀತ್, ವಿಜಯ ರಾಘವೇಂದ್ರ, ಸುನಿಲ್ ಮೊದಲಾದವರಿರುವ ಈ ಪಟ್ಟಿಯಲ್ಲಿ ಇದೀಗ ಸ್ಥಾನಪಡೆಯಲು ಸಜ್ಜಾಗಿದ್ದಾರೆ, ವಿನಾಯಕ ಜೋಶಿ

ಬೆಂಗಳೂರಿನ ಶ್ರೀ ವಾಸುದೇವ ಜೋಶಿ ಮತ್ತು ಶ್ರೀಮತಿ ಶಾಲಿನಿ ಜೋಶಿ ದಂಪತಿಗಳಿಗೆ ೧೯೮೭ ಆಗಸ್ಟ್ ೨೫ರಂದು ಜನಿಸಿದ ವಿನಾಯಕ ಜೋಶಿ ಚಿಕ್ಕ ಬಾಲಕನಾಗಿದ್ದಾಗಲೇ ಅಗಾಧ ಪ್ರತಿಭೆಯ ಕುರುಹು ತೋರಿದರು.
೧೯೯೫ರಲ್ಲಿ - ಅಂದರೆ ೮ ವರ್ಷದ ಬಾಲಕನಾಗಿದ್ದಾಗಲೇ ಬೆಳ್ಳಿಪರದೆಗೆ ಕಾಲಿಟ್ಟ ಇವರು, ಒಂದಾದ ಮೇಲೊಂದು ಹಲವಾರು ಚಿತ್ರಗಳಲ್ಲಿ ಅಭಿನಯಿಸಿದ್ದಾರೆ.

ಇದೀಗ ಅವರ ನಾಯಕತ್ವದಲ್ಲಿನ ಮೊದಲ ಚಿತ್ರ, ನನ್ನ ಕನಸಿನ ಹೂವೆ ಬಿಡುಗಡೆಯಾಗುತ್ತಲಿದೆ.

ವಿನಾಯಕ ಜೋಶಿ ಅಭಿನಯದ ಚಿತ್ರಗಳು

೧ ಪುಟ್ಮಲ್ಲಿ
೨ ನಾವಿದ್ದೀವಿ ಎಚ್ಚರಿಕೆ (ಮಕ್ಕಳ ಚಲನಚಿತ್ರೋತ್ಸವಕ್ಕಾಗಿ ನಾಗಭರಣ ನಿರ್ದೇಶನದಲ್ಲಿ ತಯಾರಿಸಿದ ಚಿತ್ರ)
೩ ನಮ್ಮೂರ ಮಂದಾರ ಹೂವೆ
೪ ಸೂತ್ರಧಾರ
೫ ಅಮೃತ ವರ್ಷಿಣಿ
೬ ಸಿಂಹದಮರಿ
೭ ಎಲ್ಲರಂತಲ್ಲ ನನ್ನ ಗಂಡ
೮ ಲಾಲಿ
೯ ವಿಮೋಚನೆ
೧೦ ಮೈ ಡಿಯರ್ ಟೈಗರ್
೧೧ ಆರ್ಯಭಟ
೧೨ ಕುರಿಗಳು ಸಾರ್ ಕುರಿಗಳು (ಬಾಲನಟನಾಗಿ ಕೊನೆಯ ಚಿತ್ರ)
೧೩ ಚಿಟ್ಟೆ
೧೪ ಪಾಂಚಾಲಿ
೧೫ ಕಿಚ್ಚ
೧೬ ಚಿತ್ರ
೧೭ ಅಪ್ಪು
೧೮ ಓಕೆ ಸಾರ್ ಓಕೆ
೧೯ ಕಂಠಿ
೨೦ ಬಾ ಬಾರೋ ರಸಿಕ
೨೧ ಯಶವಂತ್
೨೨ ಆಟೋಗ್ರಾಫ್ ಪ್ಲೀಸ್
೨೩ ಸಖಸಖಿ
೨೪ ೬ ಟೀನ್ಸ್ ಎಂಬ ತಮಿಳು ಚಿತ್ರ
೨೫ ನನ್ನ ಕನಸಿನ ಹೂವೆ

ಇವಗಳಲ್ಲದೇ, ಬಿಡುಗಡೆಯಾಗಬೇಕಿರುವ ಚಿತ್ರಗಳು ಸುಮಾರು ಏಳೆಂಟು.

ವಿನಾಯಕ ಜೋಶಿಯವರು ಪಡೆದ ಪ್ರಶಸ್ತಿ ಪುರಸ್ಕಾರಗಳು ಬಹಳಷ್ಟು.

೧೯೯೬-೯೭ "ಅತ್ಯುತ್ತಮ ಬಾಲನಟ" ರಾಜ್ಯ ಪ್ರಶಸ್ತಿ.

೧೯೯೭-೯೮ ಅಮೃತವರ್ಷಿಣಿ ಚಿತ್ರದಲ್ಲಿನ ನಟನೆಗಾಗಿ, ೧೯೯೭-೯೮ನೇ ಸಾಲಿನ "ಅತ್ಯುತ್ತಮ ಬಾಲನಟ" ಎಂದು ಆರ್ಯಭಟ ಪ್ರಶಸ್ತಿ .
೧೯೯೮-೯೯ ಕಲ್ಯಾಣಮ್ಮ ಮಕ್ಕಳ ಕೂಟ ಪ್ರಶಸ್ತಿ .

ಡ್ರೀಮ್ಸ್ ಇನ್ ಡ್ರೀಮ್ಸ್ ಯುವಕ ಸಂಘ (Dreams in dreams youth association) ನೀಡಿರುವ "ಚಾರ್ಮಿಂಗ್ ಸ್ಟಾರ್" ಎಂಬ ಬಿರುದು ,
ನಾಡಿನಾದ್ಯಂತ ನಡೆದ ವಿವಿಧ ಸಭೆ ಸಮಾರಂಭಗಳಲ್ಲಿ, ಸುಮಾರು ೩೦೦ಕ್ಕೂ ಹೆಚ್ಚಿನ ಸನ್ಮಾನಗಳು, ಇವರ ಪ್ರತಿಭೆಗೆ ಹಿಡಿದ ಕನ್ನಡಿಯಾಗಿದೆ.

ಸುಮಾರು ೩೩೦ ಕಲಾವಿದರು ಭಾಗವಹಿಸಿದ್ದ, ಕಳೆದ ವರ್ಷದ(೨೦೦೫) 'ಹೆಚ್.ನರಸಿಂಹಯ್ಯ ನಾಟಕೋತ್ಸವ'ದಲ್ಲಿನ ನಟನೆಗೆ 'ಅತ್ಯುತ್ತಮ ನಟ' ಬಹುಮಾನ ಪಡೆದರು.

ಇವರದೇ ಆದ ಒಂದು ನಾಟಕ ತಂಡವಿದೆ, ಹೆಸರು ದ್ಯುತಿ
೧೯೯೫ರಲ್ಲಿ ಅತ್ಯುತ್ತಮ ನೃತ್ಯಪಟು ಎಂಬ ರಾಜ್ಯಮಟ್ಟದ ಪ್ರಶಸ್ತಿಯು ಪಡೆದಿದ್ದರು.

ಬಾಲನಟನಾಗಿ(ವಿಶೇಷವಾಗಿ ನಮ್ಮೂರ ಮಂದಾರ ಹೂವೆ ಮತ್ತು ಅಮೃತವರ್ಷಿಣಿ ಚಿತ್ರಗಳಲ್ಲಿ) ಜನಮೆಚ್ಚುಗೆ ಗಳಿಸಿದ್ದ ವಿನಾಯಕ ಜೋಶಿ, ಈಗ ತಮ್ಮ ವಿನೂತನ ವರಸೆಯನ್ನು ಪ್ರೇಕ್ಷಕರ ಮುಂದಿಡುತ್ತಿದ್ದಾರೆ.
ತಂದೆ ವಾಸುದೇವ ಜೋಶಿಯವರೇ ನಿರ್ಮಿಸಿರುವ ಈ ಚಿತ್ರವು ಎಲ್ಲ ರೀತಿಯಿಂದಲೂ ಅವರೆಲ್ಲರ ಕನಸಿನ ಹೂವಾಗಿದೆ. ಈ ಹೂವು ಕನಸಿನಲ್ಲದೇ, ನನಸಿನಲ್ಲಿಯೂ ಹೂವಾಗಿ, ಅದರ ಪರಿಮಳವನ್ನು ಪಸರಿಸಲಿ ಎಂದು ಹಾರೈಸೋಣವೇ?

ಸ್ವಾರಸ್ಯ:
ಇಪ್ಪತ್ತೈದಕ್ಕೂ (೨೫) ವಿನಾಯಕ ಜೋಶಿಯವರಿಗೂ ವಿಶೇಷವಾದ ನಂಟು ಇದೆಯೇ? ಗಮನಿಸಿ ನೋಡಿ. ಇವರ ಜನ್ಮ ದಿನಾಂಕ ಆಗಸ್ಟ್ ೨೫, ಇವರ ಚಿತ್ರ ಬಿಡುಗಡೆಯಾಗುತ್ತಿರುವುದೂ ಆಗಸ್ಟ್ ೨೫ ಮತ್ತು ಬಿಡುಗಡೆಯಾಗಿರುವ ಚಿತ್ರಗಳ ಲೆಕ್ಕದಲ್ಲಿ ನನ್ನ ಕನಸಿನ ಹೂವೆ, ಇವರ ಇಪ್ಪತ್ತೈದನೇ ಚಿತ್ರ.

ಚಿತ್ರವು ಯಶಸ್ವಿಯಾಗಲಿ ಎಂದು ಹೃತ್ಪೂರ್ವಕವಾಗಿ ಶುಭಹಾರೈಸುತ್ತೇನೆ!
~ ಮನ

ವರಮಹಾಲಕ್ಷ್ಮಿ ಹಬ್ಬದ ಕನ್ನಡ ಚಿತ್ರರಂಗ

2006-08-11T22:58:00.000-05:00

ಮುನ್ನುಡಿ:
ಸಾಮಾನ್ಯವಾಗಿ, ಯಾವುದೇ ಮಹತ್ತರವಾದ ಕೆಲಸವನ್ನು ಪ್ರಾರಂಭಿಸುವುದು, ಹೊಸ ಹೆಜ್ಜೆಗಳನ್ನಿಡುವುದು ಸುಸಂದರ್ಭಗಳಲ್ಲಿಯೇ. ಹಬ್ಬಗಳು ನಮ್ಮ ಧರ್ಮಗಳಲ್ಲಿ ಅವುಗಳದೇ ಆದ ಅಚ್ಚೊತ್ತಿಬಿಟ್ಟಿವೆ.
ಕೆಲವರಿಗೆ ಸಂಕ್ರಾಂತಿಯು ಅದೃಷ್ಟದಾಯಕ ಹಬ್ಬವಾದರೇ, ಇನ್ನು ಕೆಲವರಿಗೆ ವಿಘ್ನನಿವಾರಕ ವಿನಾಯಕ ಚತುರ್ಥಿ ಎಂದರೆ ಎಂತಹ ಕೆಲಸವಾದರೂ ಜಯಿಸಬಲ್ಲೆನೆಂಬ ವಿಶ್ವಾಸ. ನನ್ನ ಮಟ್ಟಿಗೆ ವಿಜಯದಶಮಿ ಎಂದರೆ, ಅದೇನೋ ವಿಶೇಷ ಗೌರವ, ಭಯ, ಭಕ್ತಿ, ಆಕರ್ಷಣೆ, ಉತ್ಸಾಹ.
ಕನ್ನಡ ಚಿತ್ರರಂಗದ ಪಾಲಿಗೆ ಇತ್ತೀಚಿನ ವರ್ಷಗಳಲ್ಲಿ ಒಂದು ಹಬ್ಬವು ಅತ್ಯಂತ ವಿಶೇಷವಾಗಿಬಿಟ್ಟಿದೆ. ನೋಡೋಣ ಬನ್ನಿ.

೨೦೦೪ - ವರಮಹಾಲಕ್ಷ್ಮಿ ಹಬ್ಬ - ಬಿಡುಗಡೆಯಾದ ಚಿತ್ರ ಆಪ್ತಮಿತ್ರ.
ಕನ್ನಡ ಚಿತ್ರರಂಗ ಕಂಡ ಅತ್ಯುತ್ತಮ ಚಿತ್ರಗಳಲ್ಲಿ ಒಂದು. ಪ್ರೇಕ್ಷಕನ ನಾಡಿಮಿಡಿತಕ್ಕೆ ಸ್ಪಂದಿಸಿದ ಚಿತ್ರ. ಒಂದು ಸಂಪೂರ್ಣ ವರ್ಷ ಸತತ ಪ್ರದರ್ಶನ ಕಂಡ ದಾಖಲೆಯ ಹೆಗ್ಗಳಿಕೆ ಈ ಚಿತ್ರದ್ದು.
ತನ್ನ ಅದ್ಭುತ ಅಭಿನಯಕ್ಕೆ ಜನರ ಪ್ರತಿಕ್ರಿಯೆ ಹೇಗಿರುತ್ತದೆ ಎಂದೂ ಕಾಯದೆ ನಮ್ಮನ್ನೆಲ್ಲಾ ಬಿಟ್ಟು ಹೋಗಿದ್ದು ಮಾತ್ರ ಸೌಂದರ್ಯ ಮಾಡಿದ ಅನ್ಯಾಯ :(
ರಾರಾ.....ಮತ್ತೊಮ್ಮೆ ಹುಟ್ಟಿ ರಾರಾ! ದುರ್ಗಾಷ್ಟಮಿಯಂದೇ ರಾರಾ, ಪರ್ವಾಲೇದು.

೨೦೦೫ - ವರಮಹಾಲಕ್ಷ್ಮಿ ಹಬ್ಬ - ಜೋಗಿ
ಅರೇ ಜೋಗಿ.....!!
ಜೋಗಿಯ ಜ್ವರಕೆ ಸಿಲುಕದವರಾರು?
ಜೋಗಿಯ ಜಪ ಮಾಡದವರಾರು?
ಹೊಡಿಮಗ ಹೊಡಿಮಗ ಎಂದು ಗುನುಗದವಾರಾರು?

ಕನ್ನಡ ಚಿತ್ರರಂಗದ ಇತಿಹಾಸದಲ್ಲೇ ಎಂದೂ ಕಂಡು ಕೇಳರಿಯದಷ್ಟು ಕುತೂಹಲ, ಆಸಕ್ತಿ, ನಿರೀಕ್ಷೆ ಮೂಡಿಸಿದ ಚಿತ್ರ ಯಾವುದು ಎಂದರೆ, ಸುಲಭವಾದ ಉತ್ತರ: ಜೋಗಿ

ರೌಡಿಸಂ ಮತ್ತು ತಾಯಿಯ ಸೆಂಟಿಮೆಂಟ್ ಎರಡನ್ನೂ ನಾಜೂಕಾಗಿ ಬ್ಲೆಂಡ್ ಮಾಡಿರುವ ಪ್ರೇಂ ನೈಪುಣ್ಯಕ್ಕೆ, ಬೆನ್ನೆಲುಬಾಗಿದ್ದು ಅರುಂಧತಿನಾಗ್ ಮತ್ತು ಶಿವರಾಜಕುಮಾರ್ ಅಮೋಘ ನಟನೆ.

೨೦೦೬- ವರಮಹಾಲಕ್ಷ್ಮಿ ಹಬ್ಬ - ಗಂಡುಗಲಿ ಕುಮಾರರಾಮ
ಒಂದು ವಾರವಾಗಿದೆಯಷ್ಟೆ! ಆದರೆ ಅತ್ಯುತ್ತಮ ಓಪನಿಂಗ್ ದೊರಕಿದೆ. ಬಹಳ ದಿನಗಳಿಂದ ಐತಿಹಾಸಿಕ ಚಿತ್ರಗಳ ಹಸಿವಿನಿಂದ ಬಳಲುತ್ತಿದ್ದ ಪ್ರೇಕ್ಷಕ ಮಹಾಶಯನಿಗೆ ಈ ಚಿತ್ರದ ಮೂಲಕ ರಸದೌತಣ ಉಣಬಡಿಸಿದ್ದಾರೆ ನಿರ್ದೇಶಕ ಭಾರ್ಗವ ಮತ್ತು ತಂಡ. ಚಿತ್ರ ನೋಡಿದ ಪ್ರತಿಯೊಬ್ಬರೂ, ಪತ್ರಿಕೆಗಳು, ಕಿರುತೆರೆ ವಾಹಿನಿಗಳು ಈ ಚಿತ್ರದ ಬಗ್ಗೆ ಪ್ರಮುಖವಾಗಿ ವಿಶ್ಲೇಷಿಸುತ್ತಿರುವುದು ಶಿವರಾಜಕುಮಾರ್ ನಟನೆಯ ಬಗ್ಗೆ. "First day first show" ಜೀ-ಕನ್ನಡ ಕಾರ್ಯಕ್ರಮದಲ್ಲಿ ಸ್ವತಃ ಶಿವರಾಜಕುಮಾರ್ ಅವರೇ ಹೇಳಿದಂತೆ, ಮಗನು ಅಪ್ಪನಂತೆ ಐತಿಹಾಸಿಕ ಪಾತ್ರಕ್ಕೆ ಜೀವತುಂಬಬಲ್ಲನೇ ಎಂಬ ಕುತೂಹಲದಿಂದ ಚಿತ್ರ ನೋಡಲು ಬರುವರೇ ಬಹಳಷ್ಟು ಮಂದಿ. ನಿಜ, ಐತಿಹಾಸಿಕ ಪಾತ್ರಗಳಿಗೆ ಭಾರತದಲ್ಲೇ ಅದ್ವಿತೀಯರೆಂದೆನಿಸಿಕೊಂಡಿರುವ ನಟಸಾರ್ವಭೌಮ ಡಾ.ರಾಜ್‍ಕುಮಾರ್ ಅಭಿನಯಿಸಬೇಕಿದ್ದ ಪಾತ್ರವೊಂದು ಅವರ ಮಗನ ಅಭಿನಯದಲ್ಲಿ ಸಾಕಾರಗೊಂಡಿದೆ ಎಂದರೆ, ಪ್ರೇಕ್ಷಕರು ಖಂಡಿತಾ ಅವರ ಮೆಚ್ಚಿನ "ಅಣ್ಣಾವ್ರನ್ನು" ಚಿತ್ರದಲ್ಲಿ ಹುಡುಕಲು ಪ್ರಯತ್ನಿಸುವುದು ಸಹಜ.
ಮೊದಲ ವಾರದ ಮಟ್ಟಿಗೆ ಪ್ರೇಕ್ಷಕರಿಂದ, ಮಾಧ್ಯಮಗಳಿಂದ, ಚಿತ್ರರಂಗದ ಪ್ರಮುಖರಿಂದ ಅಪಾರ ಮೆಚ್ಚುಗೆ ಗಳಿಸಿರುವ ಈ ಚಿತ್ರವು ಯಶಸ್ಸಿನ ಉತ್ತುಂಗವನ್ನೇರಿ, ವರಮಹಾಲಕ್ಷ್ಮಿ ಹಬ್ಬದ ಚಿತ್ರ ಸರಣಿಯ ದಾಖಲೆಯನ್ನು ಮತ್ತಷ್ಟು ಬಲಪಡಿಸಲಿ.

ಸ್ವಾರಸ್ಯ:
ಈ ಮೂರೂ ಮಹತ್ತರ, "ವರಮಹಾಲಕ್ಷ್ಮಿ" ಕೃಪಾಕಟಾಕ್ಷದ ಚಿತ್ರಗಳಿಗೆ ಸಂಗೀತ ನೀಡಿರುವವರು ಗುರುಕಿರಣ್.
ಮೊದಲೆರಡೂ ಚಿತ್ರಗಳ ಸಂಗೀತ ಮತ್ತು ಹಾಡುಗಳು ಅಪಾರವಾದ ಜನಮೆಚ್ಚುಗೆಗೆ ಪಾತ್ರವಾಗಿದ್ದು, ಕುಮಾರರಾಮನೂ ಅದೇ ಹಾದಿಯತ್ತ ಸಾಗುತ್ತಿರುವ ಕುರುಹು ತೋರಿದ್ದಾನೆ. ಈ ಚಿತ್ರಗಳ ಯಶಸ್ಸಿಗೆ ಗುರುಕಿರಣ್ ಅವರ ಸಂಗೀತದ ಕೊಡುಗೆಯು ಅಪಾರವಾದದ್ದು. ಮುಂದಿನ ವರ್ಷದ ಬ್ಲಾಕ್‍ಬಸ್ಟರ್ ವರಮಹಾಲಕ್ಷ್ಮಿ ಹಬ್ಬದ ಚಿತ್ರಕ್ಕೂ ಗುರುಕಿರಣ್ ಸಂಗೀತವೇ? ಕಾದು ನೋಡಿ :)

ನಿಮಗೆಲ್ಲರಿಗೂ ವರಮಹಾಲಕ್ಷ್ಮಿ ಹಬ್ಬದ, ಹಾರ್ದಿಕ ಶುಭಾಶಯಗಳು.

ಇಂಚರ - ಕನ್ನಡ ಅಂತರ್ಜಾಲ ರೇಡಿಯೊ

2006-08-03T01:53:00.000-05:00

ಮುನ್ನುಡಿ:
ಉದಯ ಟಿವಿ ನೋಡುವಾಗ ಬೇಜಾರಾದಾಗ, ಈಟೀವಿ ಕನ್ನಡ; ಈಟಿವಿ ಕನ್ನಡ ಬೇಜಾರಾದಾಗ ಉದಯ ಟಿವಿ.
ಹೀಗೆ ಚಾನೆಲ್ ಬದಲಾಯಿಸುವುದು ನಮಗೆಲ್ಲರಿಗೂ ತಿಳಿದೇ ಇದೆ. ಇದೇ ಕಾರಣಕ್ಕೆ, ಟಿವಿ ನೋಡೋದಕ್ಕೆ ಕುಳಿತುಕೊಳ್ಳುವಾಗಲೇ ರಿಮೋಟ್ ಕಂಟ್ರೋಲ್ ಹಿಡಿದು ನಂತರ ಜಾಗ ಹಿಡಿಯುತ್ತೇವೆ. :)
ಇದು ದೂರದರ್ಶನದ ಮಾತಾಯಿತು. ಅಂತರ್ಜಾಲ ನಿವಾಸಿಗಳಿಗೆ?

'ಕನ್ನಡ ಕಸ್ತೂರಿ' ನಾವು ನೀವೆಲ್ಲರೂ ಕೇಳಿ, ಮೆಚ್ಚಿಕೊಂಡಿರುವ ಅಂತರ್ಜಾಲ ಕನ್ನಡ ರೇಡಿಯೊ. ಕನ್ನಡಆಡಿಯೋ.ಕಾಂ ಕೊಡುಗೆಯಾಗಿರುವ ಈ ವಾಹಿನಿಯು, ಅಂತರ್ಜಾಲದಲ್ಲಿನ ಪ್ರಪ್ರಥಮ ಕನ್ನಡ ರೇಡಿಯೊ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.

http://www.kannadaaudio.net ಈ ಅಂತರ್ಜಾಲ ಕನ್ನಡವಾಹಿನಿಯ ಅಧಿಕೃತ ತಾಣ.

ಇಂದು ನನ್ನ ಕಿವಿಮುಟ್ಟಿದ ಹೊಸ ವಾಹಿನಿಯೆಂದರೆ, ಇಂಚರ!
ಹೆಸರೇ ಇಷ್ಟು ಇಂಪಾಗಿದೆ, ಇನ್ನು ಹಾಡುಗಳು ಹೇಗಿರಬಹುದೆಂದು ಕಾತುರದಿಂದ ಕೇಳಿದ ನನಗೆ, ಆಶಾಭಂಗವಾಗಲಿಲ್ಲ.
ಹಳೆಯ ಸುಮಧುರ ಗೀತೆಗಳು, ಇತ್ತೀಚಿನ ಗೀತೆಗಳು, ಎಲ್ಲವನ್ನೂ ಹದವಾಗಿ ಮಿಶ್ರಣ ಮಾಡಿದ ಹೆಸರಿಗೆ ತಕ್ಕಂತಹ ಪ್ಲೇಲಿಸ್ಟ್ ಇತ್ತು.
ಈ ರೇಡಿಯೋವನ್ನು ಅಂತರ್ಜಾಲದಲ್ಲಿನ ಕೇಳುಗರಿಗೆ ಕಾಣಿಕೆಯಿತ್ತಿರುವರು ಕನ್ನಡಟೊರೆಂಟ್ಸ್ ಸಮುದಾಯ.

ಕಿವಿಗಿಂಪಾದ ಇಂಚರವನ್ನು ಆಲಿಸಬಹುದಾದ ಲಿಂಕ್:
http://www.kannadatorrents.com:8000/listen.pls

ಇಂಚರವನ್ನು ನಮ್ಮೆಲ್ಲರಿಗರ್ಪಿಸಿರುವ ಕನ್ನಡಟೊರೆಂಟ್ಸ್ ನಿರ್ವಾಹಕ ಮಂಡಳಿಗೆ ಧನ್ಯವಾದಗಳು, ಹಾಗೂ ಈ ವಾಹಿನಿಯನ್ನು ಯಶಸ್ವಿಯಾಗಿ ಪ್ರಾರಂಭಿಸಿದಕ್ಕೆ ಹಾರ್ದಿಕ ಅಭಿನಂದನೆಗಳು.

ಅದೂ ೨೪/೭ ಮತ್ತಿದೂ ೨೪/೭. ಆದರೆ ಎರಡೂ ಸೇರಿ, ೪೮/೭ ಮಾಡಲು ಸಾಧ್ಯವಿಲ್ಲ. ದಿನಕ್ಕೆ ೨೪ ಗಂಟೆಗಳು ಮಾತ್ರ. :)

ಕಿವಿಗಳೆರಡಿದ್ದರೂ ಸಂಗೀತವನ್ನಾಸ್ವಾಧಿಸಬಹುದಾದ ಮನಸ್ಸು (ಮನ!?) ಒಂದೇ!

ಮುಗಿಸುವ ಮುನ್ನ:

ಕನ್ನಡ ಕಸ್ತೂರಿಯ ಕಂಪು
ಇಂಚರದ ಇಂಪು
ಕನ್ನಡಿಗರ ಹೃದಯಕೆರೆಯಲಿ ತಂಪು!

~ ಮನ

ಆಪರೇಷನ್ ಡೈಮಂಡ್ ರ್ಯಾಕೆಟ್ - ರಾಕೆಟ್ ಅಲ್ಲ

2006-07-21T15:07:00.000-05:00

ಮುನ್ನುಡಿ:
ತಪ್ಪು ಮಾಡದವ್ರ್ ಯಾರವ್ರೇ? ತಪ್ಪೇ ಮಾಡದವ್ರ್ ಎಲ್ಲವ್ರೆ?
ಬಹಳ ವರ್ಷಗಳಿಂದ ಸತ್ಯವೆಂದು ನಂಬಿದ್ದ ವಿಷಯವೊಂದು ಇದ್ದಕ್ಕಿದ್ದ ಹಾಗೆ ಮಿಥ್ಯವಾಗುವ ಉದಾಹರಣೆಯೊಂದನ್ನು 'ಹಂಸಗೀತೆಯ ಸಂಗೀತದ ಹಿಂದೆ' ಲೇಖನದಲ್ಲಿ ಬರೆದದ್ದು ಸರಿಯಷ್ಟೆ. ಆ ವರ್ಗಕ್ಕೆ ಸೇರುವ ಮತ್ತೊಂದು ಅಂಶ ಇದೋ ಇಲ್ಲಿದೆ.

ಚಿತ್ರಗಳನ್ನು ಗಮನಿಸಿ. ಇದು ಖಂಡಿತಾ ರ್ಯಾಕೆಟ್ / Racket.
ಕೆಲವು ತಾಣಗಳಲ್ಲಿ ಹಾಕಿರುವಂತೆ ರಾಕೆಟ್ / Rocket ಅಲ್ಲ. ಈ ಚಿತ್ರಗಳನ್ನು ವಿಸಿಡಿ ಇಂದ ಪಡೆದದ್ದು. ಅಧಿಕೃತವಾಗಿ ಚಿತ್ರದ ಹೆಸರು ಏನು ಎಂಬುದಕ್ಕೆ ಇದನ್ನು ಉಪಯೋಗಿಸಬಹುದು.
ಈ ಪದವು ತಪ್ಪಾಗಿ ಹಲವಾರು ಕಡೆ ಪ್ರಯೋಗವಾಗಿದೆ, ಮಾತಾಡವಾಗಲೂ ಹಲವಾರು ಜನ(ಇಲ್ಲಿಯವರೆಗೂ ನಾನು ಕೂಡ :ನಾ) ತಪ್ಪಾಗಿ ಉಪಯೋಗಿಸುತ್ತಿದ್ದಾರೆ.

ಉದಾಹರಣೆಗೆ:
ಚಿತ್ರರಂಗ ಡಾಟ್ ಕಾಂ: http://www.chitraranga.com/moviebase/movieinfo.asp?movieid=588
Spicevienna ಪುಟ: http://www.spicevienna.org/showMovie.php?m=23408
Randomness blog: http://thehappypeople.blogspot.com/2005/12/operation-diamond-rocket.html
Kulki's Kannada Lyrics Page: http://www.cs.toronto.edu/~kulki/kannada/haadu.html

ಮತ್ತು ಮುಖ್ಯವಾಗಿ, ಈ ರೀಡಿಫ್ ಲೇಖನ: http://in.rediff.com/movies/2006/apr/17raj.htm

ಆಂಗ್ಲ ವಿಕಿಪೀಡಿಯದ ಡಾ.ರಾಜ್ ಪುಟದಲ್ಲಿಯೂ ಈ ತಪ್ಪು ['ಅಚಾತುರ್ಯ'ವೆನ್ನಲಾಗದು :)] ನುಸುಳಿತ್ತು.

ಅದೇ ರೀತಿ, ಕನ್ನಡ ವಿಕಿಪೀಡಿಯದಲ್ಲಿ ಇರುವ ಡಾ.ರಾಜ್ ಲೇಖನದಲ್ಲಿ, ಚಿ.ಉದಯಶಂಕರ್ ಲೇಖನಲ್ಲಿ, ಅಷ್ಟೇ ಅಲ್ಲದೇ ಸ್ವತಃ ಆಪರೇಷನ್ ಡೈಮಂಡ್ ರಾಕೆಟ್ ಅನ್ನುವ ಲೇಖನದಲ್ಲೇ ತಪ್ಪುಗಳಾಗಿಬಿಟ್ಟಿದ್ದವು. ಅವೆಲ್ಲವನ್ನೂ ಈಗಷ್ಟೆ ಸರಿಪಡಿಸಿದೆ.

ಇನ್ನೂ ಹಲವಾರು ಅಂತರ್ಜಾಲ ತಾಣಗಳು, ಬ್ಲಾಗ್ ಪುಟಗಳು, ಪುಸ್ತಕಗಳು ಇತ್ಯಾದಿಯಾಗಿ ಜನಮನದಲ್ಲಿ ಇದೊಂದು ತಪ್ಪು ಪದ ನುಸುಳಿಬಿಟ್ಟಿದೆ. ಹಾಗೆಂದು ಎಲ್ಲರೂ ತಪ್ಪಾಗೇ ಬಳಸುತ್ತಿದ್ದಾರೆ ಎಂದರ್ಥವಲ್ಲ. ಸರಿಯಾದ ಪದಪ್ರಯೋಗ ಮಾಡುತ್ತಿರುವವರೂ ಬಹಳಷ್ಟು ಜನರಿದ್ದಾರೆ. ಸರಿಯಾದ ಪ್ರಯೋಗದ ಬಗ್ಗೆ ಒಬ್ಬರಿಂದ ಒಬ್ಬರಿಗೆ ತಿಳಿಯಬೇಕಷ್ಟೆ. ಸ್ವತಃ ನಾನೇ ಚಿಕ್ಕಂದಿನಿಂದ ಇಲ್ಲಿಯವರೆಗೂ ಇದನ್ನು 'ರಾಕೆಟ್' ಎಂದೇ ಅಂದುಕೊಂಡಿದ್ದೆ. ಇದೀಗ ನಿಖರವಾದ ಮಾಹಿತಿಯೊಂದಗೆ, ಸತ್ಯವಾವುದು, ಮಿಥ್ಯವಾವುದು ಎಂದು ತಿಳಿಯಿತು. ಇದು ನಿಮಗೂ ಅನ್ವಯಿಸಿದರೆ, ಈ ಲೇಖನ ಸಾರ್ಥಕ, ಹಾಗೆಯೇ ನಿಮಗೆ ತಿಳಿದವರಿಗೂ ಸರಿಪಡಿಸಿಕೊಳ್ಳಲು ಹೇಳಿ.

ಮುಗಿಸುವ ಮುನ್ನ:
ಈ ಚಿತ್ರದ ಸರಿಯಾದ ಹೆಸರನ್ನು ಮೊದಲ ಬಾರಿಗೆ, ಕನ್ನಡ ಆಡಿಯೋ ಫೋರಮ್ಮಿನಲ್ಲಿ ನನಗೆ ತಿಳಿಸ್ಕೊಟ್ಟ ಭೂತಕ್ಕೆ ನನ್ನ ಧನ್ಯವಾದಗಳು. :)

- ಮನ

ಜಿನಾಡೇನ್ ಜಿಡಾನ್ ಸಾಹಸ - ವಿವಿಧ ದೃಷ್ಟಿಕೋನಗಳು

2006-07-19T01:47:00.000-05:00

ಮುನ್ನುಡಿ:
ಸುಮಾರು ಒಂದು ತಿಂಗಳಕಾಲ ಪ್ರಪಂಚದಾದ್ಯಂತ ಕಾತುರದಿಂದ ನೋಡಿದ, ಅನುಭವಿಸಿದ ಫುಟ್ ಬಾಲ್ ಆಟ ಅಂತಿಮ ಪಂದ್ಯದಲ್ಲಿನ ಕೆಲವು ರೋಚಕ ಕ್ಷಣಗಳೊಂದಿಗೆ 'ಮನ'ಸೆಳೆಯಿತು.
ಅತ್ಯಂತ ರೋಚಕ ದೃಶ್ಯವೊಂದನ್ನು ಅವರವರ ಮೂಗಿನ ನೇರಕ್ಕೆ ಹೇಗೆ ನೋಡುತ್ತಾರೆ ಎಂಬುದಕ್ಕೆ ಅದ್ಭುತವಾತ ಸೃಜನಶೀಲತೆಯಿಂದ ಯಾರೋ ತಯಾರಿಸಿರುವ ಈ ದೃಶ್ಯಾವಳಿಗಳನ್ನು ನಿಮ್ಮೊಡನೆ ಹಂಚಿಕೊಳ್ಳುತ್ತಿದ್ದೇನೆ. ಈ ದೃಶ್ಯಗಳನ್ನು ತಯಾರಿಸಿದ ವ್ಯಕ್ತಿಗೆ *ಟೋಪಿಗಳು ಕೆಳಗೆ*

ಜಿನಾಡೇನ್ ಜಿಡಾನ್ ಗುಮ್ಮಿದ ದೃಶ್ಯದ ಗಮ್ಮತ್ತು ಈ ಲೇಖನದ ಜೀವಾಳ.
ಇದರ ಬಗ್ಗೆ ಆಗಲೇ ಹಲವಾರು ಕಾರ್ಟೂನ್, ಜೋಕ್, ಬ್ಲಾಗುಗಳು ಬಂದಿವೆ.
ಉದಾ: ಹೆಚ್.ಪಿ.ಎನ್ ಅವರ ಈ ಬ್ಲಾಗು ಬಹಳ ಮಜವಾಗಿದೆ. :)

ಈಗ ದೃಶ್ಯಾವಳಿ ನೋಡೋಣ ಬನ್ನಿ.

ಜರ್ಮನ್ನರ ದೃಷ್ಟಿಕೋನದಲ್ಲಿ....

ಫ್ರೆಂಚರ ದೃಷ್ಟಿಕೋನದಲ್ಲಿ.....

ಇಟಲಿಯನ್ನರ ದೃಷ್ಟಿಕೋನದಲ್ಲಿ.....

ಕಾಶ್ಮೀರದ ಜನತೆಯ ದೃಷ್ಟಿಕೋನದಲ್ಲಿ.....

ಥ್ರಿಲ್ಲರ್ ಮಂಜು ದೃಷ್ಟಿಕೋನದಲ್ಲಿ.....

ಮುಗಿಸುವ ಮುನ್ನ:

ಇದರಲ್ಲಿ ಪೂರ್ವಾಗ್ರಹಗಳೊಂದಿಗೆ ಮೂಗಿನ ನೇರಕ್ಕೆ ನೋಡಿದ ದೃಷ್ಟಿಕೋನಗಳು(POV) ಯಾವು ಯಾವು? ವಸ್ತುನಿಷ್ಠ ದಷ್ಟಿಕೋನ (ನ್ಯೂಟ್ರಲ್ ಪಿಓವಿ) ಯಾವುದು? ನೀವೆ ನಿರ್ಧರಿಸಿ. ಜಿನಾಡೇನ್ ಜಿಡಾನ್ ಗೊಂದು ಹಸನ್ಮುಖದ ವಿದಾಯ. :)

~ ಮನ

Firefox ಬ್ರೌಸರಿನಲ್ಲಿ ಕನ್ನಡ ಬ್ಲಾಗಿನ ಸಮಸ್ಯೆ - ಪರಿಹಾರ

2006-07-16T17:02:00.000-05:00

ಮುನ್ನುಡಿ:
Blogspot.com ಡೊಮೈನಿನಲ್ಲಿರುವ ಬಹುತೇಕ ಕನ್ನಡ ಬ್ಲಾಗ್‍ಗಳ ಶೀರ್ಷಿಕೆಗಳು ಮತ್ತು ಅಲ್ಲಿನ ಲೇಖನಗಳ ಶೀರ್ಷಿಕೆಗಳು ಫೈರ್‍ಫಾಕ್ಸ್ ಬ್ರೌಸರಿನಲ್ಲಿ ವಿಕೃತವಾಗಿ ಕಾಣುವುದನ್ನು ಸಿಸ್ಯ ಅವರು ಮನ'ದ ಗಮನಕ್ಕೆ ತಂದರು. ಈ ಸಮಸ್ಯೆಯ ಬಗ್ಗೆ ಒಂದು ನೋಟ ಮತ್ತು ಪರಿಹಾರದ ಪ್ರಯತ್ನ ಈ ಲೇಖನದ ಉದ್ದೇಶ.

ಈ ಚಿತ್ರವನ್ನು ಗಮನಿಸಿ.

ನನ್ನ ಬ್ಲಾಗಿನ ಮುಖ್ಯಪುಟ ಫೈರ್‍ಫಾಕ್ಸ್ ಬ್ರೌಸರಿನಲ್ಲಿ ಹೀಗೆ ಕಾಣುತ್ತಿತ್ತು. ಇದನ್ನು ದಿನವೂ ನೋಡುತ್ತಿದ್ದೆನಾದರೂ, InternetExplorer ನಲ್ಲಿ ಸರಿಯಾಗಿ ಕಾಣುತ್ತಿದ್ದುದರಿಂದ, ಇದು "ನನ್ ಕಂಪ್ಯೂಟರ್‍ನ firefoxನಲ್ಲೇ ಏನೋ ಪ್ರಾಬ್ಲಂ ಇರ್ಬೇಕು" ಎಂದು ಉದಾಸೀನ ಮಾಡಿ ಸುಮ್ಮನಾಗಿದ್ದೆ. ಆದರೆ ಇದು ನನ್ನೊಬ್ಬನ ಬ್ಲಾಗಿನ ಸಮಸ್ಯೆಯಲ್ಲ, ಕನ್ನಡದ ಬಹುತೇಕ ಬ್ಲಾಗುಗಳಿಗೆ ಕಾಡುತ್ತಿರುವ ಫೈರ್‍ಫಾಕ್ಸ್ ಪಿಡುಗು ಎಂದು ನನಗೆ ಮನದಟ್ಟು ಮಾಡಿಕೊಟ್ಟವರು ಫೈರ್‍ಫಾಕ್ಸ್ ಕಟ್ಟಾಭಿಮಾನಿಯಾದ ಸಿಸ್ಯ.

ಈಗ ಈ ಕೆಲವು ಕನ್ನಡ ಬ್ಲಾಗುಗಳನ್ನು ಗಮನಿಸಿ.
ಸುಸಂಕೃತರ ಅವಲೋಕನ: susheelsandeepmurali.blogspot.com

ಭೂತದ ಕಾವ್ಯ ಸುಧೆ: kaavyasudhe.blogspot.com

ಮಂಜೇಗೌಡರ ಸಕಲ ಶರಣಾರ್ಥಿಗಳು: sakala.blogspot.com

ಶ್ರೀಮಾತಾ ಅವರ ಹೀಗೆ ಸುಮ್ನೆ: heegesummne.blogspot.com

ಶಿವಶಂಕರ್ ಅವರ 'ಪಾತರಗಿತ್ತಿ ಪಕ್ಕ': chittey.blogspot.com

ಪಚ್ಚಿ + ಸುಸ್ ಕಾಂಬೋ ಕನ್ನಡಕಸ್ತೂರಿ: kannadakastoori.blogspot.com

ಓಲೆಗರಿ: olegari.blogspot.com

ಮನಸ್ವಿನಿ-ಮನ: manaswini-mana.blogspot.com

ಸಾಕಲ್ಲವೇ ಸಧ್ಯಕ್ಕೆ, ಇಷ್ಟು ಬ್ಲಾಗುಗಳು? ಮೇಲೆ ಹಾಕಿರುವ ಚಿತ್ರಗಳ ಮೂಲಕ, ಈ ಬ್ಲಾಗುಗಳಲ್ಲಿನ ಹೆಸರಿನ display ಸಮಸ್ಯೆಯ ಅರಿವು ನಿಮಗಾಯಿತಲ್ಲವೇ?

ಸಮಸ್ಯೆಗೆ ಕಾರಣ:
ಈ ಸಮಸ್ಯೆಗೆ ಮೂಲಕಾರಣ ಅಕ್ಷರಗಳ ಸ್ಪೇಸಿಂಗ್ ("letter-spacing").
ಸ್ಪೇಸಿಂಗ್ ಅಂದರೆ, ಒಂದು ಅಕ್ಷರಕ್ಕೂ ಮುಂದಿನ ಅಕ್ಷರಕ್ಕೂ ನಡುವೆ ಎಷ್ಟು ಜಾಗಬಿಡಬೇಕು ಎನ್ನುವ ನಿಯಮ ಅಥವಾ ಸೌಲಭ್ಯವೆಂದುಕೊಳ್ಳಿ.
MS Word ತಂತ್ರಾಂಶದಲ್ಲಿ ಟೈಪ್ ಮಾಡಿ ಅನುಭವವಿರುವವರಿಗೆ ಇದು ಹೊಸತೇನಲ್ಲ. left alignment, right alignment, letter spacing ಇತ್ಯಾದಿಯಾಗಿ ವಿಧವಿಧವಾದ ಸೌಲಭ್ಯಗಳು ಸಾಮಾನ್ಯವಾಗಿ ಎಲ್ಲಾ ವರ್ಡ್ ಪ್ರೋಸೆಸಿಂಗ್ ತಂತ್ರಾಂಶಗಳಲ್ಲಿರುತ್ತವೆ.
ಆದರೆ firefoxನಲ್ಲಿ ಮಾತ್ರ, ಕನ್ನಡದ ಅಕ್ಷರಗಳ ಸ್ಪೇಸಿಂಗ್ ನಲ್ಲಿ ಲೋಪವಿದೆ. ಲೋಪವೇನೆಂದರೆ, ಅಕ್ಷರದಲ್ಲಿನ ಒತ್ತು, ದೀರ್ಘ, ತಲೆಕಟ್ಟು, ಕೊಂಬು, ಅರ್ಕಾವತ್ತು ಇವೆಲ್ಲವನ್ನೂ ಪ್ರತ್ಯೇಕ ಅಕ್ಷರಗಳೆಂದು firefox ಭಾವಿಸುತ್ತದೆ. ಹಾಗಾಗಿ, ಒಂದೊಂದನ್ನೂ ಬಿಡಿಬಿಡಿಯಾಗಿ diplay ಮಾಡಲು ಪ್ರಯತ್ನಿಸುತ್ತದೆ. ಕಾಗುಣಿತವಿಲ್ಲದ, ಬಿಡಿ ಅಕ್ಷರಗಳನ್ನು ಮಾತ್ರ ಉಪಯೋಗಿಸಿ ನೋಡಿ. ಆಗ ಈ ಸಮಸ್ಯೆ ಇರುವುದಿಲ್ಲ. ಉದಾಹರಣೆಗೆ, ಮನ, ಜನ, ಸದನ, ಮದನ, ರಚನ, ಪದ, ಅಗಲ, ಅಚಲ ಇತ್ಯಾದಿ ಪದಗಳು.
ಗುಣಿತಾಕ್ಷರಗಳಲ್ಲಿ ಆದರೆ, ಒಂದು ಅಕ್ಷರವು ಒಂದಕ್ಕಿಂತ ಹೆಚ್ಚಿನ glyphನಿಂದ ತಯಾರಾಗುತ್ತದೆ. glyph ಅಂದರೆ ಮೇಲೆ ಹೇಳಿದ ಕೊಂಬು, ದೀರ್ಘ ಇತ್ಯಾದಿ. Firefox ಲೆಟರ್-ಸ್ಪೇಸಿಂಗನಲ್ಲಿನ ದೋಷವೆಂದರೆ, ಒಂದೊಂದು glyph ಅನ್ನೂ ಒಂದೊಂದು ಅಕ್ಷರವೆಂದು ಅದು ಅಪಾರ್ಥ ಮಾಡಿಕೊಳ್ಳುವುದು.
ಬರಹ ಕನ್ನಡ ಫಾಂಟಿನಲ್ಲಿನ ಎಲ್ಲಾ glyph ಗಳ ಪಟ್ಟಿಗಾಗಿ ಇಲ್ಲಿ ನೋಡಬಹುದು: http://www.baraha.com/web_docs/glyph_codes_kan.htm

ಈಗ ಪರಿಹಾರದ ಕಡೆಗೆ ಗಮನ ಹರಿಸೋಣ.
ಲೆಟರ್ ಸ್ಪೇಸಿಂಗ್ ಬಗ್ಗೆ ನಿಮ್ಮ ಬ್ಲಾಗ್ ಟೆಂಪ್ಲೇಟಿನಲ್ಲಿರುವ ಸಾಲನ್ನು ತೆಗೆದು ಹಾಕಿ ಅಥವ ಕಾಮೆಂಟ್ ಮಾಡುವ ಮೂಲಕ ಅನೂರ್ಜಿತಗೊಳಿಸಿ.
ಬ್ಲಾಗಿನ ಹೆಸರಲ್ಲಿ display ಸಮಸ್ಯೆ ಇದ್ದರೆ,
h1 header style definition ನಲ್ಲಿ ಈ ಸಾಲು ಇರುತ್ತದೆ. ಅಷ್ಟನ್ನು ಮಾತ್ರ ತೆಗೆದು ಹಾಕಿ.
letter-spacing:-2px;

ಲೇಖನದ ಹೆಸರಲ್ಲಿ display ಸಮಸ್ಯೆ ಇದ್ದರೆ, ಇದು h2 style defintion ನಲ್ಲಿ ಇರುವ ಸಾಧ್ಯತೆಗಳಿರುತ್ತವೆ. ನಿಮ್ಮ ಟೆಂಪ್ಲೇಟ್ ಕೋಡ್ ನೋಡಿ, ಎಲ್ಲಿದೆ ಎಂದು ತಿಳಿಯಿರಿ.

ಉದಾಹರಣೆಗೆ: ನನ್ನ ಟೆಂಪ್ಲೇಟಿನಲ್ಲಿ ಮೊದಲು ಈ ಸಾಲು ಇತ್ತು.
h1{padding:25px 0px 10px 3%;border-top:double 3px #BF5C00;border-bottom:solid 1px #E89E47;color:#F5DEB3;letter-spacing:-2px;background:#FEA088;font:bold 300% Verdana,Sans-Serif;}

ಅದನ್ನು ಈಗ ಕೆಳಕಂಡ ರೀತಿಯಲ್ಲಿ ಬದಲಾಯಿಸಿದೆ ಅಷ್ಟೆ, letter-spacing ಕೋಡ್ ತೆಗೆಯುವ ಮೂಲಕ. ಸಮಸ್ಯೆ ಬಗೆಹರಿಯಿತು.
h1{padding:25px 0px 10px 3%;border-top:double 3px #BF5C00;border-bottom:solid 1px #E89E47;color:#F5DEB3;background:#FEA088;font:bold 300% Verdana,Sans-Serif;}

ಮುಗಿಸುವ ಮುನ್ನ:

ಈ ಸಮಸ್ಯೆಯು ನಿಮ್ಮ ಬ್ಲಾಗಿನಲ್ಲಿಯೇ ಇದ್ದಲ್ಲಿ, ಮೇಲೆ ತಿಳಿಸಿದ ಪರಿಹಾರವನ್ನು ಉಪಯೋಗಿಸಿ, ಸಮಸ್ಯೆ ಬಗೆಹರಿಸಿಕೊಳ್ಳಿ. ನಿಮಗೆ ತಿಳಿದವರ ಬ್ಲಾಗುಗಳಲ್ಲಿ ಈ ಸಮಸ್ಯೆ ಕಂಡು ಬಂದಲ್ಲಿ ಅವರಿಗೂ ತಿಳಿಸಿ, ಸರಿಪಡಿಸಲು ನೆರವಾಗಿ.
ಈ ಸಮಸ್ಯೆಯ ಅರಿವನ್ನು ಮಾಡಿಕೊಟ್ಟು, ಇದರ ಬಗ್ಗೆ ಬ್ಲಾಗಿಸಬೇಕೆಂದು ಪ್ರೇರೇಪಿಸಿದ ಸಿಸ್ಯ ಅವರಿಗೆ ಧನ್ಯವಾದಗಳು! :)

~ ಮನ

ಅಂತರ್ಜಾಲದಲ್ಲಿ ಕನ್ನಡ ದಿನಪತ್ರಿಕೆಗಳು

2006-07-13T15:35:00.000-05:00

ಮುನ್ನುಡಿ:
'ಅಂತರ್ಜಾಲದಲ್ಲಿ ಕನ್ನಡ' ಕಳೆದ ಕೆಲವು ತಿಂಗಳುಗಳಿಂದ ಅತ್ಯಂತ ಕ್ಷಿಪ್ರವಾಗಿ ಬೆಳವಣಿಗೆ ಕಾಣುತ್ತಿರುವುದು ಸಂತಸದ ಸಂಗತಿ. ಕನ್ನಡದ ಅಂತರ್ಜಾಲದ ತಾಣಗಳು, ಚರ್ಚಾವೇದಿಕೆಗಳು, ಕನ್ನಡದಲ್ಲಿಯೇ ಈಮೈಲ್, ಯಾಹೂ/ಗೂಗಲ್ ಮೆಸೆಂಜರ್‍ಗಳಲ್ಲಿ ಕನ್ನಡದಲ್ಲಿಯೇ ಮಾತುಕತೆ, ಮತ್ತು ಇವೆಲ್ಲದಕ್ಕೂ ಮಿಗಿಲಾಗಿ ದಿನೇ ದಿನೇ ಹೆಚ್ಚುತ್ತಿರುವ ಕನ್ನಡ ಬ್ಲಾಗ್‍ಗಳು, ಇತ್ಯಾದಿ ನಿಜಕ್ಕೂ ಒಂದು ಆಶಾದಾಯಕ ಬೆಳವಣಿಗೆ ಕನ್ನಡ/ಕರ್ನಾಟಕ/ಕನ್ನಡಿಗರ ಪಾಲಿಗೆ. ಈ ಸಾಲಿಗೆ ಸೇರಿದ, ಸೇರುತಿರುವ ಇನ್ನೊಂದು ವರ್ಗವೆಂದರೆ, ಮುದ್ರಿತ ಅವತರಿಣಿಕೆಯನ್ನೇ("printed version") ಅಂತರ್ಜಾಲದಲ್ಲೂ ಲಭ್ಯಗೊಳಿಸುತ್ತಿರುವ ದಿನಪತ್ರಿಕೆಗಳು. ಕನ್ನಡದ ಎಲ್ಲಾ ಪ್ರಮುಖ ದಿನಪತ್ರಿಕೆಗಳ ಕಡೆಗೊಮ್ಮೆ ನೋಟವ ಬೀರೋಣ ಬನ್ನಿ.

ಬೆಳ್ಳಂಬೆಳಗ್ಗೆ ಎದ್ದು, ಬಿಸಿಬಿಸಿ ಕಾಫಿ ಕುಡಿಯುತ್ತಾ ದಿನಪತ್ರಿಕೆ ಓದುವುದರಲ್ಲಿನ ಅನುಭವದ ರೋಚಕತೆ, ತನ್ಮಯತೆ, ಬೇರಾವುದೇ ರೀತಿಯಲ್ಲಿ ಓದಿದಾಗ ಇರುವುದಿಲ್ಲ. ಮುದ್ರಣ ಮಾಧ್ಯಮದ ಗಮ್ಮತ್ತಿರುವುದೇ ಅಲ್ಲಿ.
ಅದಿರಲಿ. ಅಂತರ್ಜಾಲವಾಸಿಗಳಿಗೆ, ಮುದ್ರಿತ ದಿನಪತ್ರಿಕೆಗಳ ಸುಳಿವೂ ಇಲ್ಲದಂತಾಗಿತ್ತು. ಅಂತರ್ಜಾಲ ಆವೃತ್ತಿಯಲ್ಲಿ ಲೇಖನಗಳು ಸಿಗುತ್ತಿದ್ದವೆಯೇ ಹೊರತು, ಪತ್ರಿಕೆಯ ಪುಟ ತಿರುವಿಹಾಕಿದ ಅನುಭವವಾಗುತ್ತಿರಲಿಲ್ಲ, ಒಂದು ಪುಟವೂ ಬಿಡದೆ ಓದುವವರಿಗಂತೂ ಏನೇನೂ ಸಿಗುತ್ತಿಲ್ಲವೇನೋ ಎಂಬ ಅನುಭವ. ಆದರೆ, ಈಗ ಹಾಗಿಲ್ಲ.
ಕನ್ನಡದ ಪ್ರಮುಖ ದಿನಪತ್ರಿಕೆಗಳು ಈಗ ಮುದ್ರಿತ ಅವತರಿಣಿಕೆಯನ್ನೇ ಅಂತರ್ಜಾಲದಲ್ಲಿಯೂ ಲಭ್ಯವಾಗಿಸುತ್ತಿವೆ. ಮನೆಯಲ್ಲಿರುವವರು ದಿನಪತ್ರಿಕೆ ಕೈಲಿ ಹಿಡಿದು ಏನೇನು ಓದುತ್ತಾರೋ, ಅವೆಲ್ಲವನ್ನೂ ಈಗ ನಾವು ನೀವೆಲ್ಲರೂ ಓದಬಹುದು.

ಕನ್ನಡ ಪ್ರಭ
ಅಂತರ್ಜಾಲ ಆವೃತ್ತಿ: http://www.kannadaprabha.com
ಮುದ್ರಿತ ಅವತರಿಣಿಕೆಯ ಅಂತರ್ಜಾಲ ತಾಣ: http://www.kannadaprabha.com/pdf

ಪ್ರಜಾವಾಣಿ
ಅಂತರ್ಜಾಲ ಆವೃತ್ತಿ: http://www.prajavani.net
ಮುದ್ರಿತ ಅವತರಿಣಿಕೆಯ ಅಂತರ್ಜಾಲ ತಾಣ: http://www.prajavaniepaper.com

ವಿಜಯ ಕರ್ನಾಟಕ
ಮುದ್ರಿತ ಅವತರಿಣಿಕೆಯ ಅಂತರ್ಜಾಲ ತಾಣ: http://www.vijaykarnatakaepaper.com

ಸಂಯುಕ್ತ ಕರ್ನಾಟಕ
ಮುದ್ರಿತ ಅವತರಿಣಿಕೆಯ ಅಂತರ್ಜಾಲ ತಾಣ: http://www.samyukthakarnataka.com

ಉದಯವಾಣಿ
ಮುದ್ರಿತ ಅವತರಿಣಿಕೆಯ ಅಂತರ್ಜಾಲ ತಾಣ: http://www.pressdisplay.com
ಇದರಲ್ಲಿ, "Lauguages" ಮೆನುವಿನಲ್ಲಿ, ಕನ್ನಡ ಆಯ್ಕೆಮಾಡಿಕೊಳ್ಳಿ. ಆಗ 'ಉದಯವಾಣಿ' ಕಾಣಿಸುತ್ತದೆ.

ಸಂಜೆವಾಣಿ
ಅಂತರ್ಜಾಲ ಆವೃತ್ತಿ: http://www.sanjevani.com
ಮುದ್ರಿತ ಅವತರಿಣಿಕೆಯ ಅಂತರ್ಜಾಲ ತಾಣ: http://www.sanjevani.com/e_paper/e_paper.htm

ಈ ಸಂಜೆ
ಅಂತರ್ಜಾಲ ಆವೃತ್ತಿ: http://www.eesanje.com
ಈ ಪತ್ರಿಕೆಯ ಮುದ್ರಿತ ಅವತರಿಣಿಕೆಯು ಅಂತರ್ಜಾಲದಲ್ಲಿ ಇನ್ನೂ ಲಭ್ಯವಿಲ್ಲವೆಂದು ಕೇಳಿದ್ದೇನೆ. ಆದಷ್ಟು ಶೀಘ್ರದಲ್ಲಿಯೇ ಬರಲಿ ಎಂದು ಹಾರೈಸೋಣ.

ಮುಗಿಸುವ ಮುನ್ನ:
ಮೇಲ್ಕಂಡ ಸಂಪರ್ಕಗಳು ಬದಲಾವಣೆಗೊಳ್ಳುವ ಸಾಧ್ಯತೆಗಳು ಇಲ್ಲದಿಲ್ಲ. ಹಾಗೇನಾದರು ಆಗಿ, ಮೇಲಿನ ಸಂಪರ್ಕಗಳು ಕೆಲಸ ಮಾಡದಿರುವುದು ನಿಮ್ಮ ಗಮನಕ್ಕೆ ಬಂದಲ್ಲಿ ದಯವಿಟ್ಟು ತಿಳಿಸಿ. ಹಾಗೆಯೇ, ಕನ್ನಡದ ಇನ್ನಿತರ ಪ್ರಮುಖ ದಿನಪತ್ರಿಕೆಗಳಾವುದಾದರೂ ಇದ್ದು, ಅದರ ಅಂತರ್ಜಾಲ ಆವೃತ್ತಿಯು ಲಭ್ಯವಿದ್ದಲ್ಲಿ, ತಿಳಿಸಿ.

- ಮನ

ಮೋಹಿನಿ....ಮೋಹಿನಿ!!

2006-07-07T18:25:00.000-05:00

ಮುನ್ನುಡಿ:
ಸುಮಾರು ಒಂದು ವಾರದಿಂದ ಈ ಮೋಹಿನಿಯು 'ಮನ'ಕಾಡುತ್ತಿದ್ದಾಳೆ. ಬಹುದಿನಗಳ ನಂತರ ಹಂಸಲೇಖ ಅವರ ಸಂಗೀತ, ಸಾಹಿತ್ಯದಲ್ಲಿ ಬಂದಂತಹ ಸುಂದರವಾದ ಹಾಡು. ಇವತ್ತೇನೋ ಈ ಹಾಡು ಟೈಪ್ ಮಾಡಲೇಬೇಕು ಅಂತ ಪ್ರೇರಣೆಯಾಯಿತು. ಈಗ ನಿಮ್ಮೊಂದಿಗೆ ಹಂಚಿಕೊಳ್ಳುತ್ತಿದ್ದೇನೆ.

ಚಿತ್ರ: ಮೋಹಿನಿ ೯೮೮೬೭೮೮೮೮೮
ಸಾಹಿತ್ಯ: ಹಂಸಲೇಖ
ಸಂಗೀತ: ಹಂಸಲೇಖ
ಗಾಯನ: ಅನುರಾಧ ಶ್ರೀರಾಂ

ಮೋಹಿನಿ
ಮೋಹಿನಿ
ಮೋಹಿನಿ
ಮೋಹಿನಿ

ಮೋಹಿನಿ ಮೋಹಿನಿ.......
ಹೃದಯವಾ ನಡೆಸುವಾ ಬೆಚ್ಚನೇ ಗಾಳಿಯೀ ಮೋಹಿನಿ
ಪನಿರಿ ಸರಿಸರಿಸ ಸಗಪ ಮಪಮಪಮ
ಸಂಗೀತ ಹೊಮ್ಮಿಸೋ ಸನ್ಮೋಹಿನಿ
ಮೋಹಿನಿ ಮೋಹಿನಿ
ಮೋಹಿನಿ ಸನ್ಮೋಹಿನಿ

ಮೋಹಿನಿ ಮೋಹಿನಿ
ಹೃದಯವಾ ನಡೆಸುವಾ ಬೆಚ್ಚನೆ ಗಾಳಿಯೀ ಮೋಹಿನಿ
ಪನಿರಿ ಸನಿಸರಿಸ ಸಗಪ ಮಪಮಪಮ
ಸಂಗೀತ ಹೊಮ್ಮಿಸೋ ಸನ್ಮೋಹಿನಿ

ಬೇಸರದ ರಾತ್ರಿಗೆ ನನ್ನನ್ನು ನೆನೆಯಿರಿ
ಸೋತ ನಿಮ್ಮ ಪ್ರೀತಿಯ ಕಥೆಗಳಾ ಹೇಳಿರಿ
ನನ್ನ ಕಥೆ ಹೇಳುವೆ
ನಿಮ್ಮ ವ್ಯಥೆ ಮರೆಸುವೆ
ನೀವೆಂದು ಕಾಣದಂಥ ಹೃದಯಲೋಕ ತೋರುವೆ
ಎಲ್ಲಾ ಭಗ್ನಪ್ರೇಮಿಗಳೆ ಏಳಿ
ನನ್ನ ನೆರಳಿನ ಸಂಗ ಹಾಡಿ
ನೊಂದ ಎಲ್ಲಾ ವಿರಹಿಗಳೇ ಕೇಳಿ
ನನ್ನ ಹೃದಯದ ಹಾಡ ಹಾಡಿ
ಅಲೆಯೋಣ ಎಲ್ಲಾರು ಪ್ರೀತಿಗೆ
ಬನ್ನಿ ಬನ್ನಿ ಅರ್ಧ ಪ್ರಾಣ ತನ್ನೀ.........!

ಮೋಹಿನಿ ಮೋಹಿನಿ
ಹೃದಯವಾ ನಡೆಸುವಾ ಬೆಚ್ಚನೇ ಗಾಳಿಯೀ ಮೋಹಿನಿ
ಪನಿರಿ ಸರಿಸರಿಸ ಸಗಪ ಮಪಮಪಮ
ಸಂಗೀತ ಹೊಮ್ಮಿಸೋ ಸನ್ಮೋಹಿನಿ
ಮೋಹಿನಿ ಮೋಹಿನಿ
ಮೋಹಿನಿ ಸನ್ಮೋಹಿನಿ

ನನ್ನೆದೆ ನನ್ನೆದೆ
ಭಗಭಗ ಉರಿದಿದೇ
ಅದರಲೆ ಹೊತ್ತಿದ
ಬೆಂಕಿಯು ನಿನ್ನದೇ
ಗಾಳಿಗೂ ಬೆಂಕಿಗೂ
ಸಂಗ್ರಾಮ ಸಾಗಿದೆ
ಈ ಬೆಂಕಿ ಆರದಂತು ಜೀವದಾನ ಬೇಕಿದೆ

ಗಾಳಿ ನನಗೆ ಲೋಕಾನೆ ಊರು
ಗಾಳಿ ನನ್ನ ತಡೆಯೋರು ಯಾರು
ನಿನ್ನ ಬೆಂಕಿಯೇ ಬೆಳಕು ನನಗೆ
ನನ್ನ ಪ್ರೀತಿಯೇ ಅಂತ್ಯ ನಿನಗೆ
ಸವಿಯೋಣ ಸೌಂದರ್ಯ ಲಹರಿಯಾ
ತಾಳ ಮೇಳ ಪ್ರಳಯ ಅದರಾ ಆಳ........!

ಮೋಹಿನಿ ಮೋಹಿನಿ
ಹೃದಯವಾ ನಡೆಸುವಾ ಬೆಚ್ಚನೆ ಗಾಳಿಯೀ ಮೋಹಿನಿ
ಪರಿರಿ ಸರಿಸರಿಸ ಸಗಪ ಮಪಮಪಮ
ಸಂಗೀತ ಹೊಮ್ಮಿಸೋ ಸನ್ಮೋಹಿನಿ
ಮೋಹಿನಿ ಮೋಹಿನಿ
ಮೋಹಿನಿ ಸನ್ಮೋಹಿನಿ

ಮುಗಿಸುವ ಮುನ್ನ:
ಹಾಡನ್ನು ಕೇಳ್ತಾ ಕೇಳ್ತಾ ಅದರ ಸಾಹಿತ್ಯ ಟೈಪ್ ಮಾಡೋದು, ನನ್ನ ಹವ್ಯಾಸಗಳಲ್ಲೊಂದು. ಯಾರಿಗಾದರೂ ಯಾವುದಾದರೂ ಹಾಡಿನ ಸಾಹಿತ್ಯ ಬೇಕಿದ್ದರೆ, ದಯವಿಟ್ಟು ತಿಳಿಸಿ.
ಹಾಂ..ಕಡ್ಡಾಯವಾಗಿ ಕನ್ನಡ ಹಾಡುಗಳು ಮಾತ್ರ. :-)

~ ಮನ

ಕನ್ನಡಪ್ರಭ ಲೇಖನಗಳ ಲಿಂಕ್ ಹಾಕುವಾಗ...

2006-07-06T14:43:00.000-05:00

ಮುನ್ನುಡಿ:
ಮೊನ್ನೆಯಷ್ಟೆ ವಿಜಯಕರ್ನಾಟಕ ಪತ್ರಿಕೆಯ ಅಂತರ್ಜಾಲ ಆವೃತ್ತಿಯಲ್ಲಿನ 'ಅಚಾತುರ್ಯ'ದ ಬಗ್ಗೆ ಬರೆದದ್ದು ಸರಿಯಷ್ಟೆ. ಅದರ ಬೆನ್ನಲ್ಲೇ ಇನ್ನೊಂದು ಪತ್ರಿಕೆಯ ಅಂತರ್ಜಾಲ ಆವೃತ್ತಿಯ ಬಗ್ಗೆ ಬರೆಯಬೇಕಾಗಿ ಬಂದದ್ದು ಸೋಜಿಗ! ಆದರೆ ಈ ಬಾರಿ, ವಿಷಯ ನೆಮ್ಮದಿಗೆಡಿಸುವಂತದ್ದು ಅಲ್ಲ, ನೆಮ್ಮದಿ ತರುವಂತದ್ದು ಮತ್ತು ಬಹಳಷ್ಟು ಜನರಿಗೆ ಉಪಯುಕ್ತವಾಗುವಂತದ್ದು. ಈ ಲೇಖನದ ಕಾರಣಕರ್ತರು: ವಿಚಿತ್ರಾನ್ನದಾತ ಶ್ರೀವತ್ಸ ಜೋಶಿಯವರು. ಇಲ್ಲಿ ಹೇಳಹೊರಟಿರುವ ತಂತ್ರದ ಕಾಪಿರೈಟ್ ಕೂಡ ಅವರದೇ!

ಅಂತರ್ಜಾಲ ಒಂದು ಬಲುದೊಡ್ಡ ಸಂಸಾರ ಸಾಗರ. ಇಲ್ಲಿ ಬಹುತೇಕ ಎಲ್ಲ ತಾಣಗಳೂ ಇತರ ತಾಣಗಳಿಗೆ ನೆಂಟರು. ಆ ನೆಂಟಸ್ತಿಕೆಯ ಗಂಟು ಹಾಕುವುದು ಒಂದು 'ಹೈಪರ್ ಲಿಂಕ್' (ಅಥವಾ ಲಿಂಕ್, ಸಂಪರ್ಕ, ಕೊಂಡಿ ಇತ್ಯಾದಿ) ಎಂಬ ಮಧ್ಯವರ್ತಿ. ಒಂದು ತಾಣದಿಂದ ಇನ್ನೊಂದಕ್ಕೆ ಸುಲಭವಾಗಿ ನೆಗೆಯುವುದಕ್ಕೆ ಲಿಂಕುಗಳ ಪಾತ್ರ ಮಹತ್ತರವಾದುದು.
ಒಂದು ತಾಣದಲ್ಲಿನ ಲೇಖನವೊಂದರ ಲಿಂಕ್ ಅನ್ನು ನಾವು ಈಮೈಲ್ ಗಳಲ್ಲಿ, ನಮ್ಮದೇ ಆದ ತಾಣಗಳಲ್ಲಿ, ವಿಶ್ವಕೋಶದ ಪುಟಗಳಲ್ಲಿ, ಹೀಗೆ ಎಲ್ಲೆಡೆ ಉಪಯೋಗಿಸುತ್ತೇವೆ. ಆದರೆ ಹಾಗೆ ಉಪಯೋಗಿಸಿದ ಲಿಂಕು, ಕೆಲಸಮಯದ ನಂತರ ಕೆಲಸ ಮಾಡುತ್ತದೆಯೋ ಇಲ್ಲವೇ ಮುರಿದು ಬಿದ್ದಿದೆಯೋ ಎಂಬುದು ನಮ್ಮ ಗಮನಕ್ಕೆ ಬರುವುದು ಅಪರೂಪ, ನಾವು ಚೆಕ್ ಮಾಡುತ್ತಾ ಇರುವುದೂ ಕೂಡ ತ್ರಾಸದ ಕೆಲಸ. ಈ ರೀತಿ, ಕೆಲಸಕ್ಕೆ ಬಾರದ ಕೊಂಡಿಗಳನ್ನು(ಮುರಿದು ಬಿದ್ದ) ಸಾಮಾನ್ಯವಾಗಿ 'ಬ್ರೋಕನ್ ಲಿಂಕ್ಸ್' ಎನ್ನುವರು.

ಕನ್ನಡಪ್ರಭದ ಲೇಖನಗಳ ಕೊಂಡಿಗಳು, ಒಂದು ದಿನವಷ್ಟೇ(ಅಥವಾ ಸ್ವಲ್ಪ ಹೆಚ್ಚು) ಜೀವಂತವಾಗಿರುತ್ತದೆ. ನಂತರ ಅದನ್ನು ಉಪಯೋಗಿಸಿದರೆ, "Please select some other news or categories." ಎಂದು ಬರುತ್ತದೆ. ಅಂದರೆ, ಆ ಲಿಂಕು "ಬ್ರೋಕನ್ ಲಿಂಕ್" ಆಗಿದೆ ಎಂದರ್ಥ.

ಉದಾಹರಣೆಗೆ: ಬೇಡರಕಣ್ಣಪ್ಪ ಚಿತ್ರಕ್ಕೆ ರಾಜಕುಮಾರ್ ಆಯ್ಕೆ ವಿವರಗಳು - ಹೆಚ್.ಎಲ್.ಎನ್.ಸಿಂಹರವರ ಪುತ್ರ ಹೆಚ್.ಎಲ್.ಶೇಷಚಂದ್ರ ಲೇಖನ ಕನ್ನಡಪ್ರಭದಲ್ಲಿ, ಡಾ.ರಾಜ್ ಅಸ್ತಂಗತರಾದ ಮರುದಿನ ಪ್ರಕಟವಾಗಿತ್ತು. ಆ ಲೇಖನದ ಕೊಂಡಿ:

http://www.kannadaprabha.com/NewsItems.asp?ID=KP%2A20060412220146&Title=Dr%2E+Rajkumar+passed+away&lTitle=s%DB%2E+%C1%DBe%E9O%DA%DF%C8%DA%E1%DB%C1%E9+B%AC%84%C4%C7&Topic=0&Dist=0

ಈ ಲೇಖನವು ಕೆಲಸ ಮಾಡುತ್ತಿಲ್ಲ. ಇದನ್ನು ಡಾ.ರಾಜ್‍ಕುಮಾರ್ ವಿಕಿಪೀಡಿಯ ಲೇಖನದಲ್ಲಿ ಉಪಯೋಗಿಸಲಾಗಿತ್ತು. ಈ ಲೇಖನವು ಕೆಲಸ ಮಾಡುತ್ತಿಲ್ಲವಾದ್ದರಿಂದ ಇದರ ಲಿಂಕನ್ನು ತೆಗೆಯಬೇಕಾಗಿತ್ತು. ಆದರೆ ಈಗ ತೆಗೆಯುವ ಗೋಜಿಲ್ಲ! ಅದನ್ನು ಕೊಂಚ ಮಾರ್ಪಾಡು ಮಾಡಿದರೆ ಆಯಿತಷ್ಟೆ!
ಆ ಮಾರ್ಪಾಡುವಿಕೆಯ ಗುಟ್ಟನ್ನು ರಟ್ಟು ಮಾಡಿ ಪುಣ್ಯ ಕಟ್ಟಿಕೊಂಡವರು: ಶ್ರೀವತ್ಸ ಜೋಶಿ

ಮಾಡಬೇಕಾದ್ದು ಇಷ್ಟೇ:
೧. ಲಿಂಕಿನಲ್ಲಿ &Title= ಎಂದು ಇದೆಯಲ್ಲಾ ಅದು ಮತ್ತು ಅಲ್ಲಿಂದ ಮುಂದೆ ಇರುವುದನ್ನೆಲ್ಲಾ ಸಂಪೂರ್ಣವಾಗಿ ತೆಗೆದುಹಾಕಿ.
೨. NewsItems.asp ಅನ್ನುವುದನ್ನು News.asp ಎಂದು ಬದಲಾಯಿಸಿ.
ಬಹುಕಾಲ (ಬಹುಷ: ಚಿರಕಾಲ) ಜೀವಂತವಾಗಿ ಉಳಿಯುವ ಲಿಂಕ್ ಈಗ ನಿಮ್ಮ ಮುಂದೆ ಹಾಜರ್!

ಮೇಲಿನ ಎರಡು ಬದಲಾವಣೆ ಮಾಡಿದ ನಂತರ ದೊರಕಿದ ಕೊಂಡಿ: http://www.kannadaprabha.com/News.asp?ID=KP%2A20060412220146

ಈಗ ನೋಡಿ, ಈ ಸಜೀವ ಕೊಂಡಿ ಸರಿಯಾದ ಲೇಖನಕ್ಕೆ ನಿಮ್ಮನ್ನು ಕೊಂಡೊಯ್ಯುತ್ತದೆ.
ಇನ್ನು ಮುಂದೆ ಕನ್ನಡಪ್ರಭದ ಯಾವುದೇ ಕೊಂಡಿಗಳನ್ನು ನಿಮ್ಮ ತಾಣದಲ್ಲಿ ಹಾಕುವಾಗ, ಅಥವ ಇತರರೊಡನೆ ಹಂಚಿಕೊಳ್ಳುವಾಗ ಅದಕ್ಕೆ ಮಾಡಬೇಕಾದ ಮೇಕಪ್ (ಮೇಲೆ ವಿವರಿಸಿದಂತೆ) ಮಾಡಿ, ನಂತರ ಹಾಕಿ/ಹಂಚಿಕೊಳ್ಳಿ.

ಮುಗಿಸುವ ಮುನ್ನ:
ಈ ಉಪಯುಕ್ತ 'ಮಾಹಿತಿ','ತಂತ್ರ','ಜ್ಞಾನ'ವನ್ನು ನಮ್ಮೊಡನೆ ಹಂಚಿಕೊಂಡ ಶ್ರೀವತ್ಸ ಜೋಶಿಯವರಿಗೆ ಬಹಳ ಧನ್ಯವಾದಗಳು!

~ ಮನ

F11 ಚಮಕ್ ಚಮಕ್ ಚಮಕ್ ಚಮಕ್

2006-07-05T00:56:00.000-05:00

ಮುನ್ನುಡಿ:
Object Oriented Programingನಲ್ಲಿ ಒಂದು ಮುಖ್ಯವಾದ ಆಯಾಮ...."ಓವರ್‍ಲೋಡಿಂಗ್". ಅಂದರೇ ಓಂದೇ ಸೌಲಭ್ಯವನ್ನು ಸಮಯ,ಸಂದರ್ಭಕ್ಕೆ ತಕ್ಕಂತೆ, ವಿಧವಿಧವಾಗಿ ಉಪಯೋಗಿಸುವುದು. ಇಂಥಹದ್ದೊಂದು ಸೌಲಭ್ಯ ಇತ್ತೀಚೆಗೆ 'ಮನ'ಸೆಳೆಯಿತು. ಇದು ಹಲವರಿಗೆ ಈಗಾಗಲೇ ಗೊತ್ತಿರಬಹುದಾದರೂ, ಗೊತ್ತಿಲ್ಲದವರು ಪೇಚಾಡಿದ್ದಂತೂ ಕಣ್ಣಾರೆ ಕಂಡು, ಕಿವಿಯಾರೆ ಕೇಳಿದ್ದೇನೆ :). ಮಿಕ್ಕಿದ್ದು, ಮುಗಿಸುವ ಮುನ್ನ.

ನಾವೆಲ್ಲರೂ ದಿನನಿತ್ಯ ಬಳಸುವ ಒಂದು ವಸ್ತು ಅಂದರೆ ಕಂಪ್ಯೂಟರಿನ ಕೀಬೋರ್ಡು. ಈ ಕೀಬೋರ್ಡಿನ ಕೀಲಿಗಳಲ್ಲಿ ವಿಧವಿಧವಾದ ಶಾರ್ಟ್‍ಕಟ್‍ಗಳು, efficient navigation ತಂತ್ರಗಳು ಅಡಗಿವೆ. ನೆನ್ನೆಯಷ್ಟೆ ನನ್ನ ಸ್ನೇಹಿತರೊಬ್ಬರಿಂದ ಕಲಿತ ವಿಷಯ: Windows Key ಮತ್ತು Pause/Break Key ಎರಡನ್ನೂ ಒಟ್ಟಿಗೆ ಒತ್ತಿದರೆ 'System Properties' ಕಿಟಕಿ ಬರುತ್ತದೆ. System Properties window ಹೆಚ್ಚಾಗಿ ಉಪಯೋಗಿಸುವವರಿಗೆ ಈ ಶಾರ್ಟ್‍ಕಟ್ ಬಲು ಪ್ರಯೋಜನಕಾರಿ.
ನಿಲ್ಲಿ! ಇಲ್ಲಿ ನಾ ಹೇಳಲು ಹೊರಟಿರುವುದು F11 ಕೀಲಿಯ ಚಮತ್ಕಾರದ ಬಗ್ಗೆ.

ನನ್ನ ಗಮನಕ್ಕೆ ಬಂದಿರುವಂತೆ F11 ಕೀಲಿಯು ನಾಲ್ಕು ವಿವಿಧ ಸಂದರ್ಭಗಳಲ್ಲಿ ವಿವಿಧ ರೀತಿ ಕೆಲಸ ಮಾಡುವುದು.

೧. ಬರಹ ಡೈರೆಕ್ಟ್(ಅಥವಾ 'ಬರಹ ಐಎಂಇ') ಚಾಲನೆಯಲ್ಲಿದ್ದರೆ, F11 ಕೀಲಿಯ ಪ್ರಯೋಗ ಆಂಗ್ಲ ಮತ್ತು ಆಂಗ್ಲೇತರ (ಸಾಮಾನ್ಯವಾಗಿ ಕನ್ನಡ) ಭಾಷೆಗಳ ನಡುವೆ ಸ್ವಿಚ್ ಆಗುವಂತೆ ಮಾಡುವುದು.
ಬರಹ ಡೈರೆಕ್ಟ್ ಉಪಯೋಗಿಸಿ ಕನ್ನಡದಲ್ಲಿ ಟೈಪ್ ಮಾಡುವವರಿಗೆ ಇದು ಹೊಸತೇನಲ್ಲ.

ಈಗ ಬರಹ ಡೈರೆಕ್ಟ್ ಕ್ಲೋಸ್ ಮಾಡಿ ಆಯಿತು. ಅಂದರೆ, ಚಾಲನೆಯಲ್ಲಿಲ್ಲದಂತೆ ಮಾಡಿದೆವು ಎಂದಿಟ್ಟುಕೊಳ್ಳೋಣ.
೨. Internet Explorer browser window ಅಥವಾ Firefox browser window ಅಥವಾ Windows Explorer window (Folders explorer), ಇವು ಯಾವುದಾದರೊಂದು ಕಿಟಕಿ ಮೇಲೆ F11 ಕೀ ಒತ್ತಿ.
Full Screen ಕೆಲಸವನ್ನು ಮಾಡುವುದು ಈ F11 ಕೀ. ಮತ್ತೆ ಇನ್ನೊಮ್ಮೆ F11 ಒತ್ತಿದರೆ, ಕಿಟಕಿಗಳು ಮತ್ತೆ ಹಿಂದಿನಂತೆ ಮಾಮೂಲಿ ಸ್ಥಾನಕ್ಕೆ ಬರುವವು.

೩. ಈಗ ಸ್ವಲ್ಪ ಸಂಗೀತ ಕೇಳೋಣವೇ? ಸರಿ Real Player ಶುರುಹಚ್ಚಿದೆವು. ಸಂಗೀತ ಕೇಳಲು ಪ್ರಾರಂಭಿಸಿದೆವು. ಯಾರದೋ ಫೋನ್ ಬಂತು. ಈಗ ಮ್ಯೂಟ್ ಮಾಡಬೇಕು. ಹೇಗೆ? ಹಾಂಹಾಂ...ಮೌಸ್ ಮೊರೆಹೋಗುವ ಅವಶ್ಯಕತೆಯಿಲ್ಲ. F11 ಒತ್ತಿ ಅಷ್ಟೆ! ನಿಮ್ಮ ರಿಯಲ್ ಪ್ಲೇಯರಲ್ಲಿನ ಶಬ್ಧ ನಿಶಬ್ಧವಾಗುತ್ತದೆ. ಶಬ್ಧವು ಮರುಕಳಿಸಲು ಮತ್ತೊಮ್ಮೆ F11 ಒತ್ತಿ. :)

ಸರಿ, ಇವೆಲ್ಲಾ ಆಯಿತು. ಬೇರಾರಿಗೂ ತೊಂದರೆಯಾಗದಂತೆ F11 ಕೀಯನ್ನು ಉಪಯೋಗಿಸಿದೆವು. ಆದರೆ, ಈ ಕೀಲಿಯ ಚಮಕ್ ಇರುವುದೇ(ನನ್ನ ಅಭಿಪ್ರಾಯದಲ್ಲಿ), ಗೂಗಲ್ ಟಾಕ್ ಮೆಸ್ಸೆಂಜರಿನಲ್ಲಿ. ಸ್ನೇಹಿತರ ಜೊತೆ ಚಾಟ್ ಮಾಡುವಾಗ, ಇದ್ದಕ್ಕಿದ್ದ ಹಾಗೆ ಕರೆ ಬರುವುದೂ, ಇದ್ದಕ್ಕಿದ್ದ ಹಾಗೆ ಕರೆ ಹೋಗುವುದು ನಡೆಯಿತು. ಇದೇನಿದು ಆಶ್ಚರ್ಯ ಎಂದುಕೊಂಡಿದ್ದಾಯಿತು. ನಂತರ ತಿಳಿಯಿತು, ಇದು F11 ಮಹಾಶಯನ ಕೆಲಸ ಎಂದು!
ಅಂದರೆ....
೪. ಗೂಗಲ್ ಟಾಕ್ ನಲ್ಲಿ, ಕನ್ನಡ ಟೈಪ್ ಮಾಡಲು F11 ಉಪಯೋಗಿಸಿದಾಗ, ಬರಹ ಡೈರೆಕ್ಟ್ ಚಾಲನೆಯಲ್ಲಿದ್ದರೆ, ಕನ್ನಡ-ಆಂಗ್ಲ ಬದಲಾವಣೆ ಕೆಲಸ ಆಗುತ್ತದೆ. ಬರಹ ಡೈರೆಕ್ಟ್ ಚಾಲನೆಯಲ್ಲಿಲ್ಲದಿದ್ದರೆ, ಗೂಗಲ್ ಟಾಕಿನ ಯಾವ ಕಿಟಕಿಯ ಮೇಲೆ focus ಇರುತ್ತದೆಯೋ ಆ ಕಿಟಕಿಯಿಂದ ಕರೆಯು ಹೋಗುವುದು, ನಿಮ್ಮ ಸ್ನೇಹಿತರಿಗೆ!! ತಿಳಿಯಿತಲ್ಲಾ. ಮುಂದಿನ ಬಾರಿ ಅಕಸ್ಮಾತ್ ನಿಮ್ಮಿಂದ ಅನಿರೀಕ್ಷಿತ ಕರೆ(ಗೂಗಲ್ ಟಾಕ್‍ನಲ್ಲಿ) ಹೋದರೆ ಅಥವಾ ಬಂದರೆ, ಅದಕ್ಕೆ ಕಾರಣ "ಬರಹ ಡೈರೆಕ್ಟ್ ಆನ್ ಆಗಿದೆ" ಎಂದುಕೊಂಡು F11 ಕೀಲಿಯನ್ನು ಒತ್ತಿರುವುದು. :)

ಮುಗಿಸುವ ಮುನ್ನ:
F11 ಕೀಲಿಯ ವಿವಿಧ ಉಪಯೋಗಗಳನ್ನು ಪ್ರಯೋಗ ಮಾಡಿ ನೋಡಿ. ಇಲ್ಲಿ ಬರೆದಿರುವ ನಾಲ್ಕೂ ಉಪಯೋಗಗಳ ಜೊತೆಗೆ, ಬೇರೆ ಬೇರೆ ಅಪ್ಲಿಕೇಷನ್‍ಗಳಲ್ಲಿ ಬೇರೆ ರೀತಿಯ ಉಪಯೋಗ ಖಂಡಿತಾ ಇರಬಹುದು. ಆ ರೀತಿಯ ಉಪಯೋಗಗಳಲ್ಲಿ, ಕುತೂಹಲಕಾರಿಯಾದ ಅಥವ ಗಮನಾರ್ಹವಾದದ್ದೇನಾದರೂ ನಿಮ್ಮ ಅನುಭವಕ್ಕೆ ಬಂದಿದ್ದರೆ, ಅಥವ ಮುಂದೆ ಬಂದಲ್ಲಿ ದಯವಿಟ್ಟು ನನಗೂ ತಿಳಿಸಿ. :)

~ ಮನ

'ನಿರ್ಮಾತೃಗಳು'

2006-07-03T01:06:00.000-05:00

ಮುನ್ನುಡಿ:
ಬಹಳ ದಿನಗಳಿಂದ ನೋಡದೇ ಬಾಕಿ ಉಳಿದಿದ್ದ 'ರಣಧೀರ ಕಂಠೀರವ' ಚಲನಚಿತ್ರವನ್ನು ನೋಡುವ ಸೌಭಾಗ್ಯ, ಕಳೆದ ವಾರ ಒದಗಿಬಂತು. ರಣಧೀರ ಕಂಠೀರವ ನರಸರಾಜರ ಜೀವನವನ್ನಾಧರಿಸಿದ ಈ ಐತಿಹಾಸಿಕ ಚಿತ್ರದಲ್ಲಿ, ಕಂಠೀರವನ ಪಾತ್ರ ನಿರ್ವಹಿಸಿರುವುದು ಕನ್ನಡದ ಕಂಠೀರವ ಸಾಕ್ಷಾತ್ ಡಾ.ರಾಜ್‍ಕುಮಾರ್! ಅದೇ ರಾಜ್‍ಕುಮಾರ್, ಕಂಠೀರವ ಕ್ರೀಡಾಂಗಣದಲ್ಲಿ ಅಂತಿಮ ದರ್ಶನವನ್ನಿತ್ತು, ಕಂಠೀರವ ಸ್ಟೂಡಿಯೋದಲ್ಲಿನ ಮಣ್ಣಿನಲ್ಲಿ ಮಣ್ಣಾಗಿ ಹೋಗಿದ್ದು ವಿಪರ್ಯಾಸವಾದರೂ ಸತ್ಯ!

ಕನ್ನಡ ಚಿತ್ರರಂಗದ ಪಾಲಿಗೆ 'ರಣಧೀರ ಕಂಠೀರವ' ಚಿತ್ರ ವಿಶಿಷ್ಟವಾದುದು. ಕಾರಣ, ಅದನ್ನು ತಯಾರಿಸಿದ ಚಿತ್ರ ನಿರ್ಮಾಣ ಸಂಸ್ಥೆ ಮತ್ತು ಮುಖ್ಯವಾಗಿ ಅದರ 'ನಿರ್ಮಾತೃಗಳು'!

ಸುಮಾರು ೪೬ ವರ್ಷಗಳಷ್ಟು ಹಿಂದಕ್ಕೆ ಕೆಲಕಾಲ ಹೋಗಿ ಬರೋಣ.
ವರ್ಷ ೧೯೫೯-೬೦. ಕನ್ನಡದ ಚಿತ್ರೋದ್ಯಮ ಸಂಪೂರ್ಣವಾಗಿ ಮದರಾಸಿನಲ್ಲಿ(ಈಗಿನ ಚೆನ್ನೈ) ನೆಲೆಯೂರಿದೆ. ಕನ್ನಡದ ಕಲಾವಿದರು, ಸಹಕಲಾವಿದರು, ತಂತ್ರಜ್ಞರು ಸಂಕಷ್ಟದ ಸ್ಥಿತಿಯಲ್ಲಿದ್ದ ಕಾಲ. ಕನ್ನಡ ನಾಡಿನಲ್ಲಿ ಚಿತ್ರಗಳು ನಿರ್ಮಾಣವಾಗದೇ, ಇಲ್ಲಿಯವರಿಗೆ ಹೆಚ್ಚಿನ ಕೆಲಸಗಳು, ಅವಕಾಶಗಳು ಸಿಗುತ್ತಿಲ್ಲ. ಇದಕ್ಕೊಂದು ಪರಿಹಾರ ರೂಪಿಸಲೋಸುಗ ಒಂದು ಚಿಂತಕರ ಚಾವಡಿ ನಿರ್ಮಾಣಗೊಂಡಿತು.
ಚಾವಡಿಯಲ್ಲಿದ್ದ ಪ್ರಮುಖರು: ಜಿ.ವಿ.ಅಯ್ಯರ್, ರಾಜಕುಮಾರ್, ಬಾಲಕೃಷ್ಣ, ಮತ್ತು ನರಸಿಂಹರಾಜು.
ಅಬ್ಬಬ್ಬಾ! ಒಬ್ಬಬ್ಬರೂ ಒಂದೊಂದು ಕಲಾಶಿಖರಗಳು. ಕಲೆಯನ್ನು, ಅದರಲ್ಲಿಯೂ ಅಭಿನಯದ ಕಲೆಯನ್ನು ಅರೆದು ಕುಡಿದವರು.
ಅಭಿನಯದೊಂದಿಗೆ ಸಾಹಿತ್ಯ ರಚನೆಯನ್ನೂ, ನಿರ್ದೇಶನವನ್ನೂ, ಮತ್ತು ಕೊನೆಗೆ ಚಿತ್ರನಿರ್ಮಾಣವನ್ನೂ ಕರಗತವಾಗಿಸಿಕೊಂಡವರು ಜಿ.ವಿ.ಅಯ್ಯರ್ ಅವರು.
ಹಾಸ್ಯ ಎಂದರೆ ನರಸಿಂಹರಾಜು, ನರಸಿಂಹರಾಜು ಎಂದರೆ ಹಾಸ್ಯ ಎನ್ನುವಷ್ಟರ ಮಟ್ಟಿಗೆ ತಮ್ಮ ಛಾಪನ್ನು ಮೂಡಿಸಿದವರು ಹಾಸ್ಯಬ್ರಹ್ಮ ನರಸಿಂಹರಾಜು. ಹುಟ್ಟಿನಿಂದಲೇ ಅಸ್ವಸ್ಥ ಕಿವಿಗಳನ್ನು ಹೊಂದಿದ್ದರೂ, ಕಿವುಡುತನವು ತನ್ನ ಅಭಿನಯ ಸಾಮರ್ಥ್ಯಕ್ಕೆ ಎಂದೂ ಅಡ್ಡಿಬರದಂತೆ ನೋಡಿಕೊಂಡು, ಅಪ್ಪನಾಗಿ, ಅಣ್ಣನಾಗಿ, ಖಳನಟರಾಗಿ, ಹಾಸ್ಯನಟರಾಗಿ ಸುಮಾರು ಐನೂರಕ್ಕೂ ಹೆಚ್ಚಿನ ಚಿತ್ರಗಳಲ್ಲಿ ಕಲೆಯನ್ನು ಧಾರೆಯೆರೆದು, ಅಭಿಮಾನ್ ಸ್ಟೂಡಿಯೋವನ್ನು ಕಟ್ಟಿ, ಕನ್ನಡ ಚಿತ್ರರಂಗಕ್ಕಾಗಿಯೇ ತನ್ನ ಸರ್ವಸ್ವವನ್ನೂ ತೇಯ್ದವರು, ಕನ್ನಡ ಚಿತ್ರರಂಗದ ಅತ್ಯಂತ ಹಿರಿಯಣ್ಣರಲ್ಲಿ ಒಬ್ಬರಾದ ಕಲಾಭಿಮಾನಿ ಬಾಲಕೃಷ್ಣನವರು.
ಇನ್ನು ರಾಜಕುಮಾರ್ ಬಗ್ಗೆ ನಾನು ಬರೆದು ಹೇಳಬೇಕಾದ್ದು ಏನೇನೂ ಇಲ್ಲ. ಕನ್ನಡ ಭಾಷೆ, ಕನ್ನಡ ನಾಡು ಕಂಡ ಹೆಮ್ಮೆಯ ಸುಪುತ್ರ.

ಇವರೆಲ್ಲರೂ ಸೇರಿ 'ಕನ್ನಡ ಕಲಾವಿದರ ಸಂಘ'ವನ್ನು ಸ್ಥಾಪಿಸಿ, ರಾಜ್ಯಾದ್ಯಂತ ಪ್ರವಾಸ ಮಾಡಿ ಕನ್ನಡ ಚಿತ್ರೋದ್ಯಮ ನೆಲೆ ನಿಲ್ಲಲು, ಕಲಾವಿದರು ಬದುಕಲು ಮಾರ್ಗಗಳನ್ನು ಹುಡುಕಿದರು. ಇದೇ ಸಂಘವು ಚಿತ್ರನಿರ್ಮಾಣ ಸಂಸ್ಥೆಯಾಗಿ 'ರಣಧೀರ ಕಂಠೀರವ' ಚಿತ್ರವನ್ನು ನಿರ್ಮಿಸಿತು.
ಈ ಚಿತ್ರದಲ್ಲಿ, ಆರಂಭದಲ್ಲಿ ಹೆಸರುಗಳನ್ನು ತೋರಿಸುವಾಗ 'ಮನ'ದ ಮನ ಸೆಳೆದದ್ದು: 'ನಿರ್ಮಾತೃಗಳು'.

ಸಾಮಾನ್ಯವಾಗಿ ನಾವು ಚಿತ್ರವನ್ನು ನಿರ್ಮಿಸಿದವರ ಹೆಸರನ್ನು ನೋಡುವುದು "ನಿರ್ಮಾಪಕ(ರು)" ಅಥವಾ "ನಿರ್ಮಾಪಕಿ(ಯರು)" ಎಂದು.
ಆದರೆ ಈ ಚಿತ್ರದ ವೈಶಿಷ್ಟ್ಯವೆಂದರೆ, ಇದರಲ್ಲಿ producers ಹೆಸರುಗಳನ್ನು ತೋರಿಸುವುದು 'ನಿರ್ಮಾತೃಗಳು' ಎಂದು!
'ಮಾತೃ' ಎಂದರೇ 'ತಾಯಿ' ಅಂದರೆ ಜನ್ಮದಾತೆ ಎಂದರ್ಥ. ಇಲ್ಲಿ ಚಲನಚಿತ್ರವೊಂದಕ್ಕೆ ಜನ್ಮವನ್ನಿತ್ತಿರುವ ಈ ಕಲಾಶಿಖರಗಳು, ಅದನ್ನು ಈ ರೀತಿ ಹೇಳಿದ್ದಾರೆ.

ಮುಗಿಸುವ ಮುನ್ನ:
ಸುಖದಲ್ಲಿರುವಾಗ ಎಲ್ಲರೂ ನೆಂಟರೇ
ಕಷ್ಟದಲ್ಲಿ, ದುಃಖದಲ್ಲಿರುವಾಗ ಎಲ್ಲರೂ ದೂರ

ಇದು ನಾವೆಲ್ಲರೂ ಗಮನಿಸಿರಬಹುದಾಂತಹ, ಒಂದು ಕಠೋರ ಸತ್ಯ. ಇದನ್ನು ಸುಳ್ಳೆಂದು ನಿರೂಪಿಸುವ ಘಟನೆಗಳು ಇಲ್ಲದಿಲ್ಲ. ಆ ವಿರಳವಾದ ಸಾಲಿಗೆ ಸೇರುವಂತಹದ್ದು ಈ ನಿರ್ಮಾತೃಗಳು ಮಾಡಿರುವ ಕೆಲಸ. ಕನ್ನಡ ಚಿತ್ರೋದ್ಯಮವು ಬೆಂಗಳೂರಿನ ಗಾಂಧಿನಗರದಲ್ಲಿ ತಳವೂರಲು ಈ ಕೆಲಸ ಬಹಳಷ್ಟು ಸಹಕಾರಿಯಾಯಿತು. ಮದರಾಸಿನ ಮೇಲೆ ಸಂಪೂರ್ಣವಾಗಿ ಅವಲಂಬನೆಯಾಗಿದ್ದ ಚಿತ್ರೋದ್ಯಮವು ತಾಯ್ನಾಡಿನಲ್ಲಿಯೇ ಕೆಲಸ ಮಾಡುವಂತಾಯಿತು.

ಒಗ್ಗರಣೆ: "ಕನ್ನಡಕ್ಕಾಗಿ, ಕರ್ನಾಟಕಕ್ಕಾಗಿ ನಿಮ್ಮ ರಾಜ್‍ಕುಮಾರ್ ಏನ್ ಮಾಡಿದ್ದಾರೆ?" ಎಂಬ ಪ್ರಶ್ನೆಯಲ್ಲದ ಪ್ರಶ್ನೆ ಕೇಳುವ ಅಜ್ಞಾನಿಗಳಿಗೆ ಈಗಾಗಲೇ ಇರುವ ಉತ್ತರಗಳೊಡನೆ, ಈ ವಿಷಯವನ್ನೂ ಸೇರಿಸಿ ಹೇಳಬಹುದೆಂದುಕೊಂಡಿರುವೆ.

~ ಮನ

ವಿಜಯ ಕರ್ನಾಟಕ - ಟೈಮ್ಸ್ ಆಫ್ ಇಂಡಿಯ ಬೇಜವಾಬ್ದಾರಿ

2006-06-30T20:45:00.000-05:00

ಇದು ನ್ಯಾಯವೇ!?? ಕನ್ನಡಿಗರ ಬಗ್ಗೆ ಇಷ್ಟೋಂದು ನಿರ್ಲಕ್ಷ್ಯ, ಅಸಡ್ಡೆ, ಬೇಜವಾಬ್ದಾರಿ ಯಾಕೆ? ಕನ್ನಡಿಗರ ದೌರ್ಭಾಗ್ಯಕ್ಕೆ ಕೊನೆಯೇ ಇಲ್ಲವೆ?

ಸಮಸ್ತ ಕನ್ನಡಿಗರ ಹೆಮ್ಮೆಯೆಂದೇ ಹೆಸರಾಗಿದ್ದ 'ವಿಜಯ ಕರ್ನಾಟಕ' ದಿನಪತ್ರಿಕೆಯು 'ಟೈಮ್ಸ್ ಆಫ್ ಇಂಡಿಯ' ತೆಕ್ಕೆಗೆ ಬಿದ್ದ ಹೊಸ್ತಿಲಲ್ಲೇ ಈ 'ಅಚಾತುರ್ಯ'ವೇ?
ಬರೆಯುವುದಿನ್ನೇನೂ ಉಳಿದಿಲ್ಲ. "ಇದು ನ್ಯಾಯವೇ!??" ಎಂಬ ನಮ್ಮ ಪ್ರಶ್ನೆಗೆ ಉತ್ತರಿಸುವವರಾರು?

~ ಮನ

ವಿಂಡೋಸ್ ೨೦೦೦ ಕಂಪ್ಯೂಟರಿನಲ್ಲಿ ಯೂನಿಕೋಡ್ ಕನ್ನಡ

2006-06-28T23:32:00.000-05:00

ಮುನ್ನುಡಿ:

ಸುಮಾರು ಒಂದೂವರೆ ವರ್ಷಗಳಿಂದ ಕನ್ನಡ ಯೂನಿಕೋಡ್ ಅಕ್ಷರಗಳು ನನ್ನ ವಿಂಡೋಸ್ ೨೦೦೦ ಕಂಪ್ಯೂಟರಿನಲ್ಲಿ ಸರಿಯಾಗಿ ಕಾಣಿಸುತ್ತಿರಲಿಲ್ಲ. ಒತ್ತು, ದೀರ್ಘಗಳು ಸರಿಯಾಗಿ render ಆಗುತ್ತಿರಲಿಲ್ಲ. ಮೊದಮೊದಲು ಬಹಳ ಕಷ್ಟಪಟ್ಟು ಓದುತ್ತಿದ್ದೆನಾದರೂ, ನಿಧಾನವಾಗಿ ಅದೇ ಅಭ್ಯಾಸವಾಗಿ ಹೋಯಿತು. ಕನ್ನಡ ಅಕ್ಷರಗಳನ್ನು ಓದಲು ಸಾಧ್ಯವಾಗುತಿತ್ತು(ಸ್ವಲ್ಪ ಕಷ್ಟದಿಂದ).
ಸ್ವಲ್ಪದಿನಗಳ ಹಿಂದೆ ಕನ್ನಡಿಗರು.ಕಾಮ್ ಸಮುದಾಯದಲ್ಲಿನ 'ಅಭಯ್' ಎಂಬುವವರು ಕೊಟ್ಟ ಸಲಹೆ ಸೂಚನೆಗಳ ಫಲವಾಗಿ ನನ್ನ ಸಮಸ್ಯೆ ಬಗೆಹರಿಯಿತು!! ಕಸ್ತೂರಿ ಕನ್ನಡದ ಅಕ್ಷರಗಳನ್ನು ಬ್ರೌಸರ್ನಲ್ಲಿ ನೋಡಲು, ಓದಲು ಆನಂದವೋ ಆನಂದ.

ಇದನ್ನು ನನ್ನ ಕೆಲ ಸ್ನೇಹಿತರೊಡನೆ ಹಂಚಿಕೊಂಡಾಗ, ಅವರಿಗೂ ಸಮಸ್ಯೆ ಬಗೆಹರಿಯಿತು. ಅವರಲ್ಲಿ ಒಬ್ಬರಾದ ರಮೇಶ್ ಇದನ್ನು ಬ್ಲಾಗೊಂದರಲ್ಲಿ ಬರೆದು ಪ್ರಕಟಿಸಬೇಕೆಂದು ಪ್ರೇರೇಪಿಸಿದರು. ಅಭಯ್ ಮತ್ತು ರಮೇಶ್ ಅವರಿಗೆ ನನ್ನ ಧನ್ಯವಾದಗಳು!

The below information is written in English as it is mainly meant for those who have Win2000 and having the Unicode Kannada rendering problems.

If you have Windows 2000 installation CD, you can refer to:
http://sampada.net/fonthelp#windows_2000

If you dont have Windows 2000 installation CD, you can read further.

After a long wait, finally I got a solution(from www.kannadigaru.com forum) without needing Windows 2000 installation CD.

Solution is based on information present in this page:
http://www.aksharamala.com/help/chm/Installation/win2k.html

Whichever application needs to render the unicode kannada will need to have 1) A true type kannada font(eg: Tunga.ttf) and 2) Uniscribe Unicode script processor (usp10.dll)

Just a two simple steps.

1. Install any Kannada unicode font. For more details you can visit this page: http://salrc.uchicago.edu/resources/fonts/available/kannada/

(Make sure the font is placed into your Windows 2000 fonts directory, C:\WINNT\Fonts.)

2. Download and install USP10.dll (Unicode Script Processor) from this website and put into your Windows 2000 Internet Explorer directory, C:\Program Files\Internet Explorer.

Note: Since you are placing usp10.dll only in IE executables directory, the unicode Kannada renders properly in IE only.

If you have Arial Unicode MS, then you should be able to see proper rendering in MS Office applications such as MS-Word, MS-Excel, Powerpoint etc.

See the above aksharamala page for more details on display in all the other applications.

Please Note: This blog article is only an attempt to explain how my problem was solved. For any problems/issues that may arise by following the above mentioned steps, I or any of the links present in this blog entry, cannot be held responsible.

ಮುಗಿಸುವ ಮುನ್ನ:

ಕನ್ನಡವನ್ನು ಕನ್ನಡ ಲಿಪಿಯಲ್ಲಿ ಓದಿದರೆ ತೃಪ್ತಿ ಮತ್ತು ಕ್ಷೇಮವೂ ಕೂಡ. ಕನ್ನಡ ಅಕ್ಷರಗಳಲ್ಲಿ ಸರಿಯಾಗಿ ಓದಲು ಕಾಣದೆ ಅನುಭವಿಸುವ ಯಾತನೆಯನ್ನು ನಾನು ಚೆನ್ನಾಗಿ ಬಲ್ಲೆ. ಈ ಲೇಖನದಿಂದ ಯಾರಿಗಾದರೂ ಆ ಯಾತನೆ ನಿವಾರಣೆಯಾದಲ್ಲಿ ನಮ್ಮ ಶ್ರಮ ಸಾರ್ಥಕ. :)

ಈ ಲೇಖನದಲ್ಲೇನಾದರೂ ತಪ್ಪುಗಳು ಕಂಡು ಬಂದರೆ ದಯವಿಟ್ಟು ತಿಳಿಸಿ.

~ ಮನ

'ಹಂಸಗೀತೆ'ಯ ಸಂಗೀತದ ಹಿಂದೆ....

2006-06-26T01:31:00.000-05:00

ಮುನ್ನುಡಿ:
'ಹಂಸಗೀತೆ' - ಕನ್ನಡದ ಪ್ರಸಿದ್ಧ ಚಿತ್ರಗಳಲ್ಲೊಂದು.
ಚಿತ್ರದುರ್ಗದ ಮದಕರಿನಾಯಕನ ಬಳಿ ಆಸ್ಥಾನ ವಿದ್ವಾಂಸರಾಗಿದ್ದ ಶ್ರೀ.ವೆಂಕಟಸುಬ್ಬಯ್ಯನವರ ಜೀವನವನ್ನಾಧರಿಸಿ ತ.ರಾ.ಸುಬ್ಬರಾಯರು ಬರೆದಿದ್ದ ಕೃತಿಯ ಪ್ರೇರಣೆಯಿಂದ ಈ ಸಂಗೀತಮಯ ಚಿತ್ರವನ್ನು ನಿರ್ಮಿಸಲಾಯಿತು. ಜಿ.ವಿ.ಅಯ್ಯರ್ ನಿರ್ದೇಶಿಸಿ, ನಿರ್ಮಿಸಿದ ಈ ಚಿತ್ರ ಅನಂತನಾಗ್ ಅವರ ಎರಡನೇ ಕನ್ನಡ ಚಲನಚಿತ್ರವೂ ಹೌದು. ಅನಂತನಾಗ್ ಅವರ ಕಲಾಪ್ರೌಢಿಮೆಗೆ ಆರಂಭದ ದಿನಗಳಲ್ಲೇ ಓರೆ ಹಚ್ಚಿದ ಚಿತ್ರವಿದು. ಸಂಗೀತ ಪ್ರಧಾನವಾದ ಈ ಚಿತ್ರಕ್ಕೆ 'ಅತ್ಯುತ್ತಮ ಸಂಗೀತ' ಪ್ರಶಸ್ತಿಯ ಗರಿಯು ದೊರಕಿತು. ಆ ಸಂಗೀತದ ಹಿಂದಿನ ಅಂಶಗಳ ಬಗ್ಗೆ ಒಂದು ಪರಿಚಯ...ಈ ಲೇಖನ.

'ಹಂಸಗೀತೆ' ಚಿತ್ರವು ಬಿಡುಗಡೆಯಾದದ್ದು ೧೯೭೫. ಸಂಗೀತ ವಿದ್ವಾಂಸರೊಬ್ಬರ ಜೀವನವನ್ನಾಧರಿಸಿದ ಸಂಗೀತಮಯ ಚಿತ್ರ. ಈ ಚಿತ್ರದಲ್ಲಿನ ಹಾಡೊಂದರ ಗಾಯನಕ್ಕೆ ರಾಷ್ಟ್ರಪ್ರಶಸ್ತಿಯನ್ನೂ, ಚಿತ್ರದ ಸಂಗೀತ ನಿರ್ದೇಶನಕ್ಕೆ ಕರ್ನಾಟಕ ರಾಜ್ಯ ಪ್ರಶಸ್ತಿಯನ್ನೂ ಡಾ.ಎಂ.ಬಾಲಮುರಳಿಕೃಷ್ಣ ಅವರು ಪಡೆದರು.
ಇದು ಹಳೆಯ ಮಾತಾಯಿತು. ಸುಮಾರು ಇಪ್ಪತ್ತೇಳು ವರ್ಷಗಳ ನಂತರ:
ಈ ಚಿತ್ರದ ನಿರ್ದೇಶಕರೂ, ನಿರ್ಮಾಪಕರಾದ ಸ್ವತಃ ಜಿ.ವಿ.ಅಯ್ಯರ್ ಅವರೇ ಬೆಂಗಳೂರಿನಲ್ಲಿ ನಡೆದ ಸಮಾರಂಭವೊಂದರಲ್ಲಿ ಈ ಚಿತ್ರದ ಸಂಗೀತದ ಹಿಂದಿನ ರಹಸ್ಯವನ್ನು ಹೊರಗೆಡವಿದರು.
ಜಿ.ವಿ.ಅಯ್ಯರ್ ಹೇಳಿಕೆಯ ಸಾರಾಂಶ:

ಹಂಸಗೀತೆ ಚಿತ್ರಕ್ಕೆ ಸಂಗೀತ ನೀಡಿದವರು ಯಾರೆಂದುಕೊಂಡಿದ್ದೀರಿ? ಬಾಲಮುರಳಿಕೃಷ್ಣ ಅವರಲ್ಲ. ಬದಲಾಗಿ, ಟಿ.ಜಿ.ಲಿಂಗಪ್ಪ!
ಈ ಚಿತ್ರಕ್ಕೆ ಹಿನ್ನೆಲೆ ಸಂಗೀತವನ್ನು ಬಿ.ವಿ.ಕಾರಂತರಿಂದ ಕೊಡಿಸಬೇಕು, ಆ ನಿಟ್ಟಿನಲ್ಲಿ ಅವರ ಪ್ರತಿಭೆ ಹೊರಬರಬೇಕೆಂದು ನನ್ನ ಹಂಬಲವಾಗಿತ್ತು. ಆದರೆ ಲಿಂಗಪ್ಪನವರು ಇದಕ್ಕೆ ಒಪ್ಪದಾದರು. ಚಿತ್ರದ ಸಂಪೂರ್ಣ ಸಂಗೀತದ ಜವಾಬ್ದಾರಿ ತಮ್ಮದಾಗಿರಬೇಕು ಎಂದು ಅವರ ವಾದವಾಗಿತ್ತು. ಕೊನೆಗೆ, ಅವರಿಗೆ ಸಲ್ಲಬೇಕಿದ್ದ ಹಣವನ್ನು ಸಲ್ಲಿಸಿದೆ, ನಂತರ ಅವರು ಚಿತ್ರದಿಮ್ದ ಹೊರಗೆ ಹೋದರು. ಕಾರಂತರು ಚಿತ್ರಕ್ಕೆ ಹಿನ್ನೆಲೆ ಸಂಗೀತ ಒದಗಿಸಿದರು.
ಚಿತ್ರವು ಸಂಪೂರ್ಣವಾಗಿ ತಯಾರಾಗಿ, ಚಿತ್ರದ ಟೈಟಲ್ ಕಾರ್ಡ್ಸ್ ಸಿದ್ಧಪಡಿಸುವಾಗ ಒಂದು ಸಮಸ್ಯೆ ಎದುರಾಯಿತು. ಸಂಗೀತ ನಿರ್ದೇಶಕರೆಂದು ಯಾರ ಹೆಸರನ್ನು ಹಾಕಬೇಕೆಂದು. "ರಾಗ ಸಂಯೋಜನೆ ನನ್ನದಲ್ಲ, ಮುಖ್ಯ ಸಂಗೀತ ನನ್ನದಲ್ಲ. ಹಿನ್ನೆಲೆ ಸಂಗೀತವಷ್ಟೆ ನನ್ನ ಕಾಣಿಕೆ ಈ ಚಿತ್ರದಲ್ಲಿ. ಆದ್ದರಿಂದ ನನ್ನ ಹೆಸರು ಹಾಕುವುದು ಸರಿಯಾಗುವುದಿಲ್ಲ" ಎಂದು ಕಾರಂತರು ಸಮರ್ಥಿಸಿಕೊಂಡರು. ನಂತರ ಲಿಂಗಪ್ಪನವರನ್ನು ಸಂಪರ್ಕಿಸಿದಾಗ, ಅವರು "ನಾನು ಚಿತ್ರತಂಡದಿಂದ ಹೊರಬಂದಿದ್ದೇನೆ. ನನಗೂ ಈ ಚಿತ್ರಕ್ಕೂ ಸಂಬಂಧವಿಲ್ಲ. ಆದಕಾರಣ, ನನ್ನ ಹೆಸರು ನೀವು ಹಾಕಲು ಸಾಧ್ಯವಿಲ್ಲ" ಎಂದು ಹೇಳಿ ಹೊರಗುಳಿದರು.
ಈ ಜಿಜ್ಞಾಸೆಯಲ್ಲಿರುವಾಗ, ಬಾಲಮುರಳಿಕೃಷ್ಣನವರು ಈ ರೀತಿ ಹೇಳಿದರು: "ಅವರು ಸಂಗೀತವನ್ನು ಕೊಟ್ಟಿದ್ದಾರೆ. ಆದರೆ ನಾನು ಸುಶ್ರಾವ್ಯವಾಗಿ ಹಾಡಿದ್ದೇನೆ. ಹಾಗಾಗಿ, ನೀವು ನನ್ನ ಹೆಸರನ್ನು ಸಂಗೀತ ನಿರ್ದೇಶಕನೆಂದು ಹಾಕಬಹುದು". ನಾವು ಹಾಗೆಯೇ ಮಾಡಿದೆವು. ನಂತರ, ಅವರಿಗೆ 'ಅತ್ಯುತ್ತಮ ಸಂಗೀತ ನಿರ್ದೇಶಕ' ಪ್ರಶಸ್ತಿಯೂ ದೊರಕಿತು!

ಮುಗಿಸುವ ಮುನ್ನ:

ಚಿತ್ರರಂಗ ಒಂದು ಮಾಯಾಲೋಕ. ಪರದೆಯ ಮೇಲೆ ಕಾಣುವುದು ಒಂದು ಚಿತ್ರ, ಕೇಳಿಸುವುದು ಒಂದು ಶಬ್ಧವಾದರೆ, ಪರದೆಯ ಹಿಂದೆ ನೂರೆಂಟು ದೃಶ್ಯಗಳು, ಶಬ್ಧಗಳು, ವಿದ್ಯಮಾನಗಳು. ಹಲವಾರು ವರ್ಷಗಳಿಂದ ಸುಪ್ತವಾಗಿರುವ ರಹಸ್ಯಗಳು ಯಾವುದೇ ಕ್ಷಣದಲ್ಲಿ ಹೊರಬೀಳುತ್ತವೆ.
ಈ ಮೇಲಿನ ರಹಸ್ಯ ಹೊರಬಂದಾಗ ವಿಧವಿಧವಾದ ಅಭಿಪ್ರಾಯಗಳು ಕೇಳಿಬಂದವು, ಬರುತ್ತಿವೆ.
"ಇಷ್ಟು ದಿನಗಳಿಂದ, ವರ್ಷಗಳಿಂದ ಗೋಪ್ಯವಾಗಿಟ್ಟಿದ್ದ ರಹಸ್ಯವನ್ನು ಅಯ್ಯರ್ ಏಕೆ ಬಯಲು ಮಾಡಿದರು? ಅದರ ಅಗತ್ಯವಿತ್ತೆ?" ಎಂದೆನ್ನುವವರು ಕೆಲವರು. "ಇಷ್ಟು ವರ್ಷಗಳ ಮೇಲಾದರೂ ಸತ್ಯಾಂಶ ಹೊರ ಬಂತಲ್ಲಾ! ಯಾವಾಗ ಹೊರಬಂದರೆ ಏನಂತೆ? ಸತ್ಯ ಸತ್ಯವೇ" ಎನ್ನುವವರು ಹಲವರು.
ಇದರಿಂದ ಅಯ್ಯರ್, ಬಾಲಮುರಳಿಕೃಷ್ಣ, ಟಿ.ಜಿ.ಲಿಂಗಪ್ಪ, ಬಿ.ವಿ.ಕಾರಂತ್ ಇವರ ವ್ಯಕ್ತಿವರ್ಚಸ್ಸಿನಲ್ಲೇನಾದರೂ ವ್ಯತ್ಯಾಸಗಳಾದುವೇ/ಆಗಬಹುದೇ? ಇದು ಅವರವರ ನಂಬಿಕೆಗಳಿಗೆ ಬಿಟ್ಟದ್ದು.

~ ಮನ

ವಿಘ್ನೇಶ್ವರನ ನೆನೆಯಲು ನೂರೆಂಟು ಹೆಸರುಗಳು

2006-06-24T00:45:00.000-05:00

ಶುಕ್ಲಾಂಬರಧರಂ ವಿಷ್ಣುಂ ಶಶಿವರ್ಣಂ ಚತುರ್ಭುಜಂ
ಪ್ರಸನ್ನವದನಂ ಧ್ಯಾಯೇ ಸರ್ವ ವಿಜ್ಞೋಪಃ ಶಾಂತಯೇ!

ವಿಘ್ನನಿವಾರಕನಾದ ಗೌರಿಸುತ ಗಣೇಶನ ನೂರೆಂಟು ಹೆಸರುಗಳನ್ನು (ಅಷ್ಟೋತ್ತರ ನಾಮಾವಳಿ) ಕನ್ನಡದಲ್ಲಿ ಬರೆದು, ಪ್ರತಿಯೊಂದು ಹೆಸರಿನ ಅರ್ಥಗಳನ್ನು ಬರೆಯುವ ಪ್ರಯತ್ನ ಮಾಡಿದ್ದೇನೆ.
ಇವುಗಳಲ್ಲಿ ಏನಾದರು ತಪ್ಪು/ಅಚಾತುರ್ಯ ಕಂಡು ಬಂದರೆ, ದಯವಿಟ್ಟು ತಿಳಿಸಿರಿ. ಸರಿ ಪಡಿಸುವೆ.

ಇದಕ್ಕೆ ಆಧಾರ: ನನ್ನ ಸ್ನೇಹಿತರೊಬ್ಬರು ಕಳಿಸಿದ ಒಂದು ಫಾರ್ವಡ್ ವಿ-ಅಂಚೆ ಮತ್ತು ಈ ತಾಣ http://www.eprarthana.com/html/ganesh108.asp

ಜೈ ಗಣೇಶ

ಗಣೇಶನ ನೂರೆಂಟು(೧೦೮) ಹೆಸರುಗಳು			ಹೆಸರಿನ ಅರ್ಥ
೧	Akhurath	ಅಖುರಥ	One who has Mouse as His Charioteer	ಇಲಿಯನ್ನು ತನ್ನ ವಾಹನವಾಗಿರಿಸಿಕೊಂಡವ
೨	Alampata	ಆಲಂಪತ	Ever Eternal Lord	ಎಂದಿಗೂ ಅನಂತನಾದ ದೇವ
೩	Amit	ಅಮಿತ	Incomparable Lord	ಕೊನೆಯಿಲ್ಲದ ದೇವ
೪	Anantachidrupamayam	ಅನಂತಚಿದೃಪಮಯಂ	Infinite and Consciousness Personified	ಅನಂತ ಜ್ಞಾನ ಉಳ್ಳವ
೫	Avaneesh	ಅವನೀಶ್	Lord of the whole World	ಭೂಮಿಯ ಒಡೆಯ
೬	Avighna	ಅವಿಘ್ನ	Remover of Obstacles	ವಿಘ್ನ ನಿವಾರಕ
೭	Balaganapati	ಬಾಲಗಣಪತಿ	Beloved and Lovable Child	ಪ್ರೀತಿ, ಆತ್ಮೀಯತೆಯಿಂದ ಮುದ್ದಿಸಲ್ಪಡುವವ, ಬಾಲಕ ಗಣಪತಿ
೮	Bhalchandra	ಬಾಲಚಂದ್ರ	Moon-Crested Lord	ಚಂದ್ರನಿಂದಲಂಕೃತನಾದವ
೯	Bheema	ಭೀಮ	Huge and Gigantic	ಸ್ಥೂಲಕಾಯದ ದೇಹಧಾರ್ಢ್ಯ ಉಳ್ಳವ
೧೦	Bhupati	ಭೂಪತಿ	Lord of the Gods	ಭೂಮಿಗೆ ಯಜಮಾನ
೧೧	Bhuvanpati	ಭುವನಪತಿ	God of the Gods	ಜಗತ್ತಿನ ಒಡೆಯ
೧೨	Buddhinath	ಬುದ್ದಿನಾಥ	God of Wisdom	ಬುದ್ದಿಯನ್ನು, ಜ್ಞಾನವನ್ನು ದಯಪಾಲಿಸುವವನು
೧೩	Buddhipriya	ಬುದ್ಧಿಪ್ರಿಯ	Knowledge Bestower	ಬುದ್ದಿವಂತ, ಜ್ಞಾನವಂತ
೧೪	Buddhividhata	ಬುದ್ಧಿವಿಧಾತ	God of Knowledge	ಜ್ಞಾನದ ದೇವತೆ
೧೫	Chaturbhuj	ಚತುರ್ಭುಜ	One who has Four Arms	ನಾಲ್ಕು ಕೈಗಳುಳ್ಳವನು
೧೬	Devadeva	ದೇವದೇವ	Lord of All Lords	ದೇವತೆಗಳ ದೇವ
೧೭	Devantakanashakarin	ದೇವಾಂತಕನಾಶಕ	Destroyer of Evils and Asuras	ರಾಕ್ಷಸರನ್ನು, ಅಸುರರನ್ನು ನಾಶಪಡಿಸುವವನು
೧೮	Devavrata	ದೇವವ್ರತ	One who accepts all Penances	ಭಕ್ತರ ಪ್ರಾಯಶ್ಚಿತ್ತಗಳನ್ನು ಒಪ್ಪಿಕೊಳ್ಳುವ ದೇವತೆ
೧೯	Devendrashika	ದೇವೇಂದ್ರಶಿಖಾ	Protector of All Gods	ದೇವತೆಗಳ ಹಿತರಕ್ಷಣೆ ಮಾಡುವವ
೨೦	Dharmik	ಧಾರ್ಮಿಕ	One who gives Charity	ಧರ್ಮ ನಿರತನಾದವ
೨೧	Dhoomravarna	ಧೂಮ್ರವರ್ಣ	Smoke-Hued Lord	ಧೂಮ್ರ ಬಣ್ಣದ ದೇವತೆ
೨೨	Durja	ದುರ್ಜ	Invincible Lord	ಅದ್ವಿತೀಯ, ಅಜೇಯ ದೇವತೆ
೨೩	Dvaimatura	ದ್ವೈಮಾತುರ	One who has two Mothers	ಇಬ್ಬರು ತಾಯಂದಿರನ್ನು ಉಳ್ಳವ
೨೪	Ekaakshara	ಏಕಾಕ್ಷರ	He of the Single Syllable	ಒಂದು ಅಕ್ಷರದವ
೨೫	Ekadanta	ಏಕದಂತ	Single-Tusked Lord	ಒಂದು ದಂತ (ಹಲ್ಲು) ಉಳ್ಳವ
೨೬	Ekadrishta	ಏಕದೃಷ್ಟ	Single-Tusked Lord	ಒಂದು ದಂತ (ಹಲ್ಲು) ಉಳ್ಳವ
೨೭	Eshanputra	ಈಶಪುತ್ರ	Lord Shiva's Son	ಈಶ್ವರನ ಪುತ್ರ
೨೮	Gadadhara	ಗದಾಧರ	One who has The Mace as His Weapon	ಗದೆಯನ್ನು ಆಯುಧವನ್ನಾಗಿ ಉಪಯೋಗಿಸುವವ
೨೯	Gajakarna	ಗಜಕರ್ಣ	One who has Eyes like an Elephant	ಆನೆಯ ಕಣ್ಣುಗಳನ್ನು ಹೊಂದಿರುವವ
೩೦	Gajanana	ಗಜಾನನ	Elephant-Faced Lord	ಆನೆಯ ಮುಖವನ್ನು ಹೊಂದಿರುವವ
೩೧	Gajananeti	ಗಜನನೇತಿ	Elephant-Faced Lord	ಆನೆಯ ಮುಖದ ತರಹದ ಮುಖವನ್ನು ಹೊಂದಿರುವವ
೩೨	Gajavakra	ಗಜವಕ್ರ	Trunk of The Elephant	ಆನೆಯ ಸೊಂಡಿಲುಳ್ಳವ
೩೩	Gajavaktra	ಗಜವಕ್ತ್ರ	One who has Mouth like an Elephant	ಆನೆಯ ಬಾಯಂತೆ ಬಾಯನ್ನು ಉಳ್ಳವ
೩೪	Ganadhakshya	ಗಣದಕ್ಷಯ (ಗಣನಾಯಕ)	Lord of All Ganas (Gods)	ಗಣಗಳಿಗೆಲ್ಲಾ(ದೇವತೆಗಳು) ಅಧಿನಾಯಕ
೩೫	Ganadhyakshina	ಗಣಧ್ಯಕ್ಷಿನ	Leader of All The Celestial Bodies	ಗಣಗಳಿಗೆಲ್ಲಾ(ದೇವತೆಗಳು) ಅಧ್ಯಕ್ಷ
೩೬	Ganapati	ಗಣಪತಿ	Lord of All Ganas (Gods)	ಗಣನಾಯಕ, ದೇವತೆಗಳಿಗೆಲ್ಲಾ ಒಡೆಯ
೩೭	Gaurisuta	ಗೌರಿಸುತ	The Son of Gauri (Parvati)	ಗೌರಿಯ ಪುತ್ರ
೩೮	Gunina	ಗುಣಿನ	One who is The Master of All Virtues	ಸರ್ವ ಜ್ಞಾನ ಉಳ್ಳವನು
೩೯	Haridra	ಹರಿದ್ರ	One who is Golden Coloured	ಬಂಗಾರದ ಬಣ್ಣದ ಮೈ ಉಳ್ಳವನು
೪೦	Heramba	ಹೇರಂಬಾ	Mother's Beloved Son	ತಾಯಿಯ ಮುದ್ದಿನ ಮಗ
೪೧	Kapila	ಕಪಿಲಾ	Yellowish-Brown Coloured	ಹಳದಿಮಿಶ್ರಿತ ಕಂದುಬಣ್ಣದ ಮೈ ಉಳ್ಳವ
೪೨	Kaveesha	ಕವೀಶ	Master of Poets	ಕವಿಗಳಿಗೆಲಾ ಒಡೆಯ
೪೩	Kriti	ಕೃತಿ	Lord of Music	ಸಂಗೀತದ ದೇವತೆ
೪೪	Kripalu	ಕೃಪಾಳು	Merciful Lord	ಕರುಣಾಳಾದ ದೇವತೆ
೪೫	Krishapingaksha	ಕೃಷಪಿಂಗಾಕ್ಷ	Yellowish-Brown Eyed	ಹಳದಿಮಿಶ್ರಿತ ಕಂದುಬಣ್ಣದ ಕಣ್ಣುಗಳುಳ್ಳವ
೪೬	Kshamakaram	ಕ್ಷಮಾಕರಂ	The Place of Forgiveness	ಕ್ಷಮೆಯನ್ನು ದಯಪಾಲಿಸುವವ
೪೭	Kshipra	ಕ್ಷಿಪ್ರ	One who is easy to Appease	ಸರಳವಾಗಿ, ಸುಲಭವಾಗಿ ಭಕ್ತರಿಗೆ ಒಲಿಯುವವ
೪೮	Lambakarna	ಲಂಬಕರ್ಣ	Large-Eared Lord	ಉದ್ದನೆಯ ಕಿವಿಗಳುಳ್ಳವ
೪೯	Lambodara	ಲಂಬೋದರ	The Huge Bellied Lord	ಉದ್ದನೆಯ ಹೊಟ್ಟೆಯನ್ನುಳ್ಳವ
೫೦	Mahabala	ಮಹಾಬಲ	Enormously Strong Lord	ಅತ್ಯಂತ ಬಲಶಾಲಿಯಾದ ದೇವತೆ
೫೧	Mahaganapati	ಮಹಾಗಣಪತಿ	Omnipotent and Supreme Lord	ಸರ್ವಾಧಿಕಾರಿ, ಸರ್ವೋಚ್ಛ ದೇವತೆ
೫೨	Maheshwaram	ಮಹೇಶ್ವರಂ	Lord of The Universe	ಮಹಾ ಈಶ್ವರನ ಸಮಾನರಾದವ
೫೩	Mangalamurti	ಮಂಗಳಮೂರ್ತಿ	All Auspicious Lord	ಮಂಗಳಕರನಾದ ದೇವತಾ ಮೂರ್ತಿ
೫೪	Manomay	ಮನೋಮಯಿ	Winner of Hearts	ಮನಸ್ಸನ್ನು ಗೆಲ್ಲುವವನು
೫೫	Mrityuanjaya	ಮೃತ್ಯುಂಜಯ	Conqueror of Death	ಸಾವನ್ನು ಗೆದ್ದವನು
೫೬	Mundakarama	ಮುಂದಾಕರಮ	Abode of Happiness	ಸಂತಸವನ್ನು ಮನೆ ಮಾಡಿಕೊಂಡಿರುವವ
೫೭	Muktidaya	ಮುಕ್ತಿದಾಯ	Bestower of Eternal Bliss	ಮುಕ್ತಿಯನ್ನು ದಯಪಾಲಿಸುವವ
೫೮	Musikvahana	ಮೂಷಿಕವಾಹನ	One who has Mouse as Charioteer	ಇಲಿಯನ್ನು ತನ್ನ ವಾಹನವಾಗಿರಿಸಿಕೊಂಡವ
೫೯	Nadapratithishta	ನಾದಪ್ರತಿಥಿಷ್ಟ	One who Appreciates and Loves Music	ನಾದ ಸುಧೆಯನ್ನು ಆಸ್ವಾಧಿಸುವವ, ಮೆಚ್ಚುವವ
೬೦	Namasthetu	ನಮಸ್ತೇತು	Vanquisher of All Evils and Vices and Sins	ದುಷ್ಟಶಕ್ತಿಗಳನ್ನು, ದುಷ್ಟ ವಿಚಾರಗಳನ್ನು ನಿರ್ಮೂಲನ ಮಾಡುವವ
೬೧	Nandana	ನಂದನ	Lord Shiva's Son	ಶಿವನ ಮಗ
೬೨	Nideeshwaram	ನಿಧೀಶ್ವರಂ	Giver of Wealth and Treasures	ಆಯುರಾರೋಗ್ಯಐಶ್ವರ್ಯವನ್ನು ದಯಪಾಲಿಸುವವ
೬೩	Omkara	ಓಂಕಾರ	One who has the Form Of OM	ಓಂಕಾರ ಸ್ವರೂಪಿಯಾದವನು
೬೪	Pitambara	ಪೀತಾಂಬರ	One who has Yellow-Coloured Body	ಹಳದಿಬಣ್ಣದ ಮೈ ಉಳ್ಳವನು
೬೫	Pramoda	ಪ್ರಮೋದ	Lord of All Abodes	ಮೋದಕಪ್ರಿಯ, ಮೋದಕಗಳ ಒಡೆಯ
೬೬	Prathameshwara	ಪ್ರಥಮೇಶ್ವರ	First Among All	ಎಲ್ಲಾ ಕಡೆ ಮೊದಲಾಗಿರುವವನು, ಪ್ರಥಮ ಪೂಜೆಯ ದೇವತೆ
೬೭	Purush	ಪುರುಷ್	The Omnipotent Personality	ಅಪ್ರತಿಮ ಪುರುಷ ವ್ಯಕ್ತಿತ್ವ ಉಳ್ಳವನು
೬೮	Rakta	ರಕ್ತ	One who has Red-Coloured Body	ರಕ್ತದಂತೆ ಕೆಂಪಗಿನ ಕಣ್ಣುಗಳುಳ್ಳವನು
೬೯	Rudrapriya	ರುದ್ರಪ್ರಿಯ	Beloved Of Lord Shiva	ಶಿವನಿಗೆ ಪ್ರಿಯನಾದವನು
೭೦	Sarvadevatman	ಸರ್ವದೇವಾತ್ಮನ್	Acceptor of All Celestial Offerings	ಸರ್ವಕಾಣಿಕೆಗಳನ್ನು,ಪೂಜೆಗಳನ್ನು, ಒಪ್ಪಿಸಿಕೊಳ್ಳುವವನು
೭೧	Sarvasiddhanta	ಸರ್ವಸಿದ್ಧಾಂತ	Bestower of Skills and Wisdom	ವಿದ್ಯೆ, ಬುದ್ದಿ, ಜ್ಞಾನವನ್ನು ಸಿದ್ದಿಸುವವನು
೭೨	Sarvatman	ಸರ್ವಾತ್ಮನ್	Protector of The Universe	ಜಗತ್ತನ್ನು ಸಂರಕ್ಷಿಸುತ್ತಿರುವವನು
೭೩	Shambhavi	ಶಾಂಭವಿ	The Son of Parvati	ಶಾಂಭವಿಯಾದ ತಾಯಿ ಪಾರ್ವತಿಯ, ಮಗನು
೭೪	Shashivarnam	ಶಶಿವರ್ಣಂ	One who has a Moon like Complexion	ಬೆಳದಿಂಗಳ ಬೆಳಕಿನಂತಿರುವವನು, ಚಂದ್ರನ ಬಣ್ಣವುಳ್ಳವನು
೭೫	Shoorpakarna	ಶೂರ್ಪಕರ್ಣ	Large-Eared Lord	ಬೃಹದಾಕಾರದ ಕಿವಿಗಳುಳ್ಳವನು
೭೬	Shuban	ಶುಭನ್	All Auspicious Lord	ಶುಭದಾಯಕನಾದ ದೇವತೆಯು
೭೭	Shubhagunakanan	ಶುಭಗುಣಕಣನ್	One who is The Master of All Virtues	ಸರ್ವಕಾಯ, ಸರ್ವವಿಧಿಯನ್ನು ಬಲ್ಲವ
೭೮	Shweta	ಶ್ವೇತ	One who is as Pure as the White Colour	ಬಿಳಿಯ ಬಣ್ಣದಂತೆ ಶುಭ್ರವಾಗಿ, ಪವಿತ್ರವಾಗಿರುವವನು
೭೯	Siddhidhata	ಸಿದ್ದಿದಾತ	Bestower of Success and Accomplishments	ಕೀರ್ತಿಯಶಸ್ಸನ್ನು ದಯಪಾಲಿಸುವವ
೮೦	Siddhipriya	ಸಿದ್ದಿಪ್ರಿಯ	Bestower of Wishes and Boons	ಸದಾಕಾಲ ಆಶೀರ್ವಾದವನ್ನು ಸಿದ್ದಿಸುವವ
೮೧	Siddhivinayaka	ಸಿದ್ದಿವಿನಾಯಕ	Bestower of Success	ಯಶಸ್ಸಿನ ಅಧಿದೇವತೆ, ಯಶಸ್ಸನ್ನು ಕರುಣಿಸುವವ
೮೨	Skandapurvaja	ಸ್ಕಂದಪೂರ್ವಜ	Elder Brother of Skand (Lord Kartik)	ಸುಬ್ರಹ್ಮಣ್ಯನ ಅಣ್ಣ
೮೩	Sumukha	ಸುಮುಖ	Auspicious Face	ಪವಿತ್ರವಾದ, ಸ್ತುತ್ಯಾರ್ಹ ಮುಖವನ್ನುಳ್ಳವ
೮೪	Sureshwaram	ಸುರೇಶ್ವರಂ	Lord of All Lords	ಸುರದೇವತಿಗಳಿಗೆಲ್ಲಾ ಒಡೆಯನಾದವ
೮೫	Swaroop	ಸ್ವರೂಪ್	Lover of Beauty	ರೂಪವಂತನೂ, ಸುಂದರ ವದನ ಉಳ್ಳವನು
೮೬	Tarun	ತರುಣ್	Ageless	ಸದಾಕಾಲ ತರುಣಂತೆಯೇ ಇರುವವ
೮೭	Uddanda	ಉದ್ದಂಡ	Nemesis of Evils and Vices	ದುಷ್ಟಶಕ್ತಿಗಳಿಗೆ, ದುರ್ಜನರಿಗೆ ಶಾಪವನ್ನು ನೀಡುವವನು, ದುಷ್ಟ ಶಿಕ್ಷಕ
೮೮	Umaputra	ಉಮಾಪುತ್ರ	The Son of Goddess Uma (Parvati)	ಪಾರ್ವತಿಯ ಮಗ
೮೯	Vakratunda	ವಕ್ರತುಂಡ	Curved Trunk Lord	ಬಾಗಿದ ಸೊಂಡಿಲುಳ್ಳ ದೇವತೆ
೯೦	Varaganapati	ವರಗಣಪತಿ	Bestower of Boons	ಬೇಡಿದ ವರ ನೀಡುವ ದೇವತೆ
೯೧	Varaprada	ವರಪ್ರದ	Granter of Wishes and Boons	ವರಗಳನ್ನು ದಯಪಾಲಿಸುವವ
೯೨	Varadavinayaka	ವರದವಿನಾಯಕ	Bestower of Success	ಯಶಸ್ಸಿನ್ನು ಹರಸಿ ವರವನ್ನೀಯುವವ
೯೩	Veeraganapati	ವೀರಗಣಪತಿ	Heroic Lord	ವೀರನಾದ ಗಣೇಶ ದೇವತೆ
೯೪	Vidyavaridhi	ವಿದ್ಯಾವಾರಿಧಿ	God of Wisdom	ವಿದ್ಯೆಯ ಅಧಿದೇವತೆ
೯೫	Vighnahara	ವಿಘ್ನಹರ	Remover of Obstacles	ವಿಘ್ನಗಳನ್ನು ಹರಿಸುವವನು
೯೬	Vignaharta	ವಿಘ್ನಹರ್ತ	Demolisher of Obstacles	ವಿಘ್ನಗಳನ್ನು ನಾಶಪಡಿಸುವವನು
೯೭	Vighnaraja	ವಿಘ್ನರಾಜ	Lord of All Hindrances	ವಿಘ್ನಗಳನ್ನೆಲ್ಲಾ ಜಯಿಸಿ, ಅದರ ಒಡೆಯನಾಗಿರುವವನು
೯೮	Vighnarajendra	ವಿಘ್ನರಾಜೇಂದ್ರ	Lord of All Obstacles	ವಿಘ್ನಗಳನ್ನೆಲ್ಲಾ ಜಯಿಸಿ,ವಿಘ್ನಗಳ ರಾಜನಾಗಿರುವವನು
೯೯	Vighnavinashanaya	ವಿಘ್ನವಿನಾಶಾನಯ	Destroyer of All Obstacles and Impediments	ವಿಘ್ನಗಳನ್ನು ಸರ್ವನಾಶ ಮಾಡುವವನು
೧೦೦	Vigneshwara	ವಿಘ್ನೇಶ್ವರ	Lord of All Obstacles	ವಿಘ್ನನಿವಾರಕ, ನಿಘ್ನಗಳಿಂದ ಕಾಪಾಡುವವನು
೧೦೧	Vikat	ವಿಕತ್	Huge and Gigantic	ಬೃಹದಾಕಾರದ ದೇಹವುಳ್ಳವನು
೧೦೨	Vinayaka	ವಿನಾಯಕ	Lord of All	ಸರ್ವರಿಗೂ ನಾಯಕನಾದವನು
೧೦೩	Vishwamukha	ವಿಶ್ವಮುಖ	Master of The Universe	ಜಗತ್ತಿಗೇ ಮುಖದಂತಿರುವವನು
೧೦೪	Vishwaraja	ವಿಶ್ವರಾಜ	King of The World	ಪ್ರಪಂಚದೊಡೆಯ
೧೦೫	Yagnakaya	ಯಜ್ಞಕಾಯ	Acceptor of All Sacred and Sacrficial Offerings	ಯಜ್ಞಗಳಲ್ಲಿ ಸಲ್ಲಿಸುವ ಭಕ್ತಿಸಮರ್ಪಣೆಗಳನ್ನು ಸ್ವೀಕರಿಸುವವನು
೧೦೬	Yashaskaram	ಯಶಸ್ಕರಂ	Bestower of Fame and Fortune	ಯಶಸ್ಸನ್ನು, ಅದೃಷ್ಟವನ್ನು, ಸಿದ್ದಿಸುವವನು
೧೦೭	Yashvasin	ಯಶಸ್ವಿನ್	Beloved and Ever Popular Lord	ಅತ್ಯಂತ ಪ್ರೀತಿದಾಯಕನಾದ, ಅತ್ಯಂತ ಜನಪ್ರಿಯನಾದ ದೇವತೆಯು
೧೦೮	Yogadhipa	ಯೋಗದೀಪ	The Lord of Meditation	ಯೋಗಕಾರಕನೂ, ಯೋಗದ ಅಧಿದೇವತೆಯೂ ಆದವನು

ಸ್ಕಂದಪೂರ್ವಜನು ತಮಗೆಲ್ಲರಿಗೂ ಹರಸಿ ಆಶೀರ್ವದಿಸಲಿ.
~ ಮನ

"ಕರ್ಣನ ನಿಜರೂಪ" ಲೇಖನಕ್ಕೆ ನನ್ನ ಪ್ರತಿಕ್ರಿಯೆ

2006-06-21T21:24:00.000-05:00

'ದಟ್ಸ್ ಕನ್ನಡ.ಕಾಂ' - ಕನ್ನಡದ ಜನಪ್ರಿಯ ಅಂತರ್ಜಾಲ ತಾಣಗಳಲ್ಲೊಂದು. ಇದರಲ್ಲಿ ಪರಿಚಿತರೂ, ಆತ್ಮೀಯರೂ ಆದ ಸಂಪಿಗೆ ಶ್ರೀನಿವಾಸ್ ಅವರ "ಕರ್ಣನ ನಿಜರೂಪ ಕಂಡು ಬೆಚ್ಚದಿರಿ" ಲೇಖನ ಇಂದು ಪ್ರಕಟವಾಗಿದೆ. ಆ ಲೇಖನಕ್ಕೆ ನನ್ನ ಪ್ರತಿಕ್ರಿಯೆಯನ್ನು ಈಗಷ್ಟೆ ಸಂಪಿಗೆಯವರಿಗೆ ಒಪ್ಪಿಸಿದೆ. ಅದನ್ನೇ ಇಲ್ಲಿ ದಾಖಲಿಸುತ್ತಿದ್ದೇನೆ.

ಸಂಪಿಗೆಯವರೆ,

ಇಡೀ ಲೇಖನ ಕರ್ಣನ ವೃತ್ತಾಂತದ ಬಗ್ಗೆ ಸುತ್ತಾಡುತ್ತಾ ಕರ್ಣನ ಅವಹೇಳನ ಮಾಡಿದೆ.
ವೇದವ್ಯಾಸರು ಬರೆದ ಮಹಾಭಾರತವನ್ನು ನಾನು ಓದಿದವನಲ್ಲ, ಅಥವಾ ಮಹಾಭಾರತವನ್ನು ಕಣ್ಣಾರೆ ಕಂಡವನಲ್ಲ. ಆದ್ದರಿಂದ ನಾರಾಯಣಾಚಾರ್ಯರು ಬರೆದಿರುವುದರಲ್ಲಿನ ಅಂಶಗಳು ಎಷ್ಟು ಸರಿ, ಎಷ್ಟು ತಪ್ಪು, ಯಾವುದು ಸರಿ, ಯಾವುದು ತಪ್ಪು ಎಂದು ವ್ಯಾಖ್ಯಾನಿಸುವ ಯೋಗ್ಯತೆ ನನಗಿಲ್ಲ.
ಆದರೆ ನಿಮ್ಮ ಲೇಖನವನ್ನು ಓದಿದ ಮೇಲೆ ಹಲವಾರು ಪ್ರಶ್ನೆಗಳು ಕಾಡತೊಡಗಿದವು.

೧. ಕರ್ಣನ ಒಳ್ಳೆಯತನದ ಬಗ್ಗೆ ವೇದವ್ಯಾಸರು ಏನೇನೂ ಬರೆದಿಲ್ಲವೆ? ಅಥವಾ ಕರ್ಣನು ತನ್ನ ಜೀವಿತಾವಧಿಯಲ್ಲಿ "ಒಳ್ಳೆಯದು" ಅನ್ನುವ ಯಾವ ಕೆಲಸವನ್ನು ಮಾಡಿಯೇ ಇಲ್ಲವೆ?

೨. ಗಂಧರ್ವಸೇನೆಯ ವಿರುದ್ಧ ಯುದ್ಧದಲ್ಲಿ ಕರ್ಣ ಸೋಲಲು ಪರಶುರಾಮರು ಕೊಟ್ಟ ಶಾಪ ಕಾರಣವಾಗಿರಬಾರದೇಕೆ?

೩. ಕರ್ಣನನ್ನು ಹೇಡಿ ಎಂದು ಕರೆದಿರುವುದು ಯಾವ ಕಾರಣಕ್ಕೆ? ಯುದ್ಧದಲ್ಲಿ ಸೋಲುಂಡಿದ್ದಕಾಗಿಯೆ? ಅಥವಾ ದ್ರೌಪದಿಯು ಗಂಧರ್ವಸೇನೆಯವರು ಕಟ್ಟಿದ್ದ ಬಂಧನ ಬಿಡಿಸಿದ್ದಕ್ಕಾಗಿಯೇ? ಕರ್ಣನನ್ನು ಹೇಡಿ ಅನ್ನಲು ಇವೆರಡೂ ಸಕಾರಣವಲ್ಲ ಎಂದು ನನ್ನ ಅಭಿಪ್ರಾಯ.

೪. ಇಂದ್ರನಿಂದ ಶಕ್ತ್ಯಾಯುಧ (ಇದು "ಶಕ್ತಾಯುಧ" ಆಗಬೇಕಲ್ಲವೆ?) ಪಡೆಯಬೇಕೆಂದು ಕರ್ಣನಿಗೆ ಅಪ್ಪಣೆಯಿತ್ತದ್ದು ತಂದೆಯಾದ ಸೂರ್ಯದೇವ. ಆ ಆಜ್ಞೆಯಂತೆ, ಕರ್ಣನು ಇಂದ್ರನಿಂದ ಶಕ್ತ್ಯಾಯುಧವನ್ನು ಬೇಡಿ ಪಡೆದಿದ್ದಾನೆ. ಹಾಗೆಯೇ, ಇಂದ್ರನ ಕೋರಿಕೆಯಂತೆ ಕವಚಕುಂಡಲಗಳನ್ನು ದಾನ ಮಾಡಿ ದಾನಶೂರ ಕರ್ಣನೆನೆಸಿದ್ದಾನೆ. ಎರಡು ಪ್ರತ್ಯೇಕ ವಿಷಯಗಳು. ಒಂದು ತಂದೆಯ ಅಪ್ಪಣೆ ಪಾಲಿಕೆ, ಇನ್ನೊಂದು ದಾನ.

ಆದರೆ ಇಲ್ಲಿ ನಾರಾಯಣಾಚಾರ್ಯರ ಪ್ರಶ್ನೆ: "ಒಂದು ವಸ್ತುವನ್ನು ಕೊಟ್ಟು, ಇನ್ನೊಂದನ್ನು ಪಡೆಯುವುದು ದಾನವೇ?".
ಈಗಾಗಲೇ ಹೇಳಿದಂತೆ ಇವೆರಡನ್ನೂ ಒಂದುಗೂಡಿಸುವುದು ವಿರೋಧಾಭಾಸ. ಕವಚಕುಂಡಲವನ್ನು ಕೊಟ್ಟಿದ್ದು ಖಂಡಿತವಾಗಿಯೂ ದಾನ. ಆದ್ದರಿಂದಲೇ ಇಂದಿಗೂ "ದಾನಶೂರ ಕರ್ಣ" ಎಂದು ಜನರು ನೆನಪಿನಲ್ಲಿಟ್ಟುಕೊಂಡಿರುವುದು. ಶಕ್ತಾಯುಧವನ್ನು ಪಡೆದದ್ದು ತಂದೆಯ ಆಜ್ಞೆ ಪಾಲಿಸಲು (ಪಿತೃವಾಕ್ಯ ಪರಿಪಾಲನೆ).

ಒಂದು ವೇಳೆ ಕರ್ಣನು ಶಕ್ತಾಯುಧವನ್ನು ಪಡೆಯದೇ ಕವಚಗಳನ್ನು ಕೊಟ್ಟು "ದಾನಿ" ಎಂದೆನಿಸಿಕೊಂಡಿದ್ದರೆ, "ತಂದೆಯಾದ ಸೂರ್ಯದೇವನ ವಾಕ್ಯವನ್ನು ಧಿಕ್ಕರಿಸಿ ನಡೆದುದು ಕರ್ಣನ ಅಧಿಕಪ್ರಸಂಗತನವಲ್ಲವೇ?" ಎಂದು ನಾರಾಯಣಾಚಾರ್ಯರು ಖಂಡಿತಾ ಪ್ರಶ್ನಿಸದೆ ಬಿಡುತ್ತಿದ್ದರೆ?

೫. ಕೊನೆಯದಾಗಿ: 'ಮಹಾಭಾರತ'ವನ್ನು ತಿಳಿಯದವರೇ ಅಪರೂಪ, ಭಾರತದಲ್ಲಿ. ಪಂಪ, ಕುಮಾರವ್ಯಾಸಾದಿ ಕವಿಗಳ ಅವತರಿಣಿಕೆಗಳಲ್ಲದೆ, ಚಲನಚಿತ್ರಗಳಲ್ಲಿ, ಕಿರುತೆರೆಯಲ್ಲಿ ಬಿ.ಆರ್.ಛೋಪ್ರಾ ಅವರ ಧಾರವಾಹಿಯಲ್ಲಿ, ಪುಸ್ತಕಗಳಲ್ಲಿ, ಅಜ್ಜ ಅಜ್ಜಿ ಹೇಳುವ ಕಥೆಗಳಲ್ಲಿ , ಹೀಗೆ ಎಲ್ಲೆಡೆ ಸರ್ವವ್ಯಾಪಿಯಾದುದು. ಪಂಪ, ಕುಮಾರವ್ಯಾಸರಂತೆ ಇತರೆ ಭಾಷೆಗಳಲ್ಲಿಯೂ ಮಹಾಭಾರತ ರಚನೆಯಾಗಿದೆ. ಇವರೆಲ್ಲರಿಗೂ ತಿಳಿಯದ ಸಂಸ್ಕೃತ ನಾರಾಯಣಾಚಾರ್ಯರಿಗೆ ಮಾತ್ರ ತಿಳಿಯಿತೆ? ಅಥವಾ "ಜನಮರುಳೋ ಜಾತ್ರೆ ಮರುಳೋ" ಎಂಬಂತೆ ಇಷ್ಟು ದಿನ ಎಲ್ಲರೂ ಮಿಥ್ಯವೇ ಸತ್ಯ ಎಂದು ನಂಬಿದ್ದರೆ?

ಭೀಷ್ಮ, ದ್ರೋಣ, ಕೃಷ್ಣ, ಧೃತರಾಷ್ಟ್ರ, ಧರ್ಮರಾಯ, ದ್ರೌಪದಿ, ಭೀಮ ಇವರುಗಳ ಬಗೆಗಿನ ಲೇಖನಗಳ ನಿರೀಕ್ಷೆಯಲ್ಲಿರುವೆ.

ಶುಭವಾಗಲಿ,
ಮನ

ಮುಕ್ತಾಯದ ಮುನ್ನ:

ಶಕ್ತ್ಯಾಯುಧ - ಶಕ್ತಾಯುಧ. ಇವೆರಡರಲ್ಲಿ ಯಾವುದು ಸರಿ?
ಇದರ ವ್ಯುತ್ಪತ್ತಿಯ್ಯು "ಶಕ್ತಿ + ಆಯುಧ" ಎಂದಿದ್ದರೆ, ಅದು ಶಕ್ತಾಯುಧ ಆಗಬೇಕು. ಇ'ಕಾರ ಲೋಪಸಂಧಿಯ ಪ್ರಕಾರ. ಇದರ ಬಗ್ಗೆ ಹೆಚ್ಚು ಬಲ್ಲವರು ದಯವಿಟ್ಟು ತಿಳಿಸಿರಿ. ಧನ್ಯವಾದಗಳು.

ಕರ್ಮಯೋಗಿ (ಕಥೆಯ ಭಾಗ ೩ - ಮನ)

2006-06-21T02:19:00.000-05:00

'ಕರ್ಮಯೋಗಿ' ಭಾಗ ೧
'ಕರ್ಮಯೋಗಿ' ಭಾಗ ೨
ಇದೀಗ ಓದಿ ಅಂತಿಮ ಭಾಗ: 'ಕರ್ಮಯೋಗಿ' ಭಾಗ ೩

ಮಾರುತಿಯ ಮನಸ್ಸು ಪರಿವರ್ತನೆಗೊಂಡದ್ದನ್ನು ಮನಗಂಡ ಶ್ರೀನಾಥನಿಗೆ ಸ್ವರ್ಗವೇ ಧರೆಗಿಳಿದಂತಾಯ್ತು. ಕೂಡಲೆ, "ಅಬ್ಬಾ..ಆ ದೇವ್ರು ದೊಡ್ಡವ್ನು, ಬೆಟ್ಟದಂಗಿದದ್ದನ್ನ, ಮಂಜಿನಂತೆ ಕರಗಿಸಿಬಿಟ್ಟ" ಎಂದು ಮಾರುತಿಯ ಕೈಯನ್ನು ತೆಗೆದು ಶಂಕರನ ಕೈಗಿಟ್ಟು ಮೆದುವಾಗಿ ಎರಡು ಸಲ ತಟ್ಟುತ್ತಾನೆ. ಮೂವರೆದೆಯಲ್ಲೂ ಸಂತಸ ಉಕ್ಕಿ ಹರಿಯುತಿದೆ. ಮನೆ ಕಡೆಗೆ ವಾಪಸಾಗಹತ್ತಿದರು.

ಮನೆಯ ಬಾಗಿಲಲ್ಲಿಯೇ ನಿಂತಿದ್ದ ಭಾಗಿರಥಮ್ಮಳಿಗೆ, ಮೂವರು ಮಕ್ಕಳೂ ಹಸನ್ಮುಖಿಯರಾಗಿ ಮನೆಯ ಕಡೆ ಬರುತ್ತಿರುವದನ್ನು ನೋಡಿ, ನಿರಾಶೆಯ ಕಾರ್ಮೋಡಗಳೆಲ್ಲವೂ ಚದುರಿದಂತಾಯ್ತು. ಮಾರುತಿಯ ಮೊಗದಲ್ಲಿ, ಆ ರೀತಿಯ ಕಾಂತಿ, ಮುಗುಳ್ನಗೆ ನೋಡಿದ್ದನ್ನೇ ಮರೆತಿದ್ದಳು ಆ ತಾಯಿ. ಅವನ, ಓದಿನ ಬಗ್ಗೆ ಕಟ್ಟಿದ್ದ ಆಶಾಗೋಪುರಕ್ಕೆ ಹೊಸ ಜೀವ ಬಂದಿತ್ತು.
ಶ್ರೀನಾಥ ಓಡಿ ಬಂದು, "ಅಮ್ಮಾ, ಮಾರುತಿ ಮುಂದಕ್ಕೆ ಓದ್ತಾನೆ! ಅಪ್ಪಾ, ಮಾರುತಿ ಮುಂದಕ್ಕೆ ಓದ್ತಾನೆ!!" ಎಂದು ಗಂಟಲಿನಲ್ಲಿರುವ ಶಕ್ತಿಯನ್ನೆಲ್ಲಾ ಉಪಯೊಗಿಸಿ ಕಿರುಚುತ್ತಾ ತನ್ನ ಸಂತಸ ವ್ಯಕ್ತಪಡಿಸುತ್ತಾನೆ. ತಂದೆ, ತಾಯಿ, ತಮ್ಮಂದಿರ ಆನಂದಕ್ಕೆ ಪಾರವೇ ಇರಲಿಲ್ಲ. ಭಾಗಿರಥಮ್ಮ ಮಾರುತಿಯನ್ನು ಬಾಚಿ ತಬ್ಬುತ್ತಾಳೆ, "ಮಗಾ...ಕೊನೆಗೂ ಒಪ್ಕೊಂಡ? ನನ್ ಕಿವಿನೇ ನಂಬಕ್ಕಾಗ್ತಿಲ್ಲ" ಎಂದು ಗದ್ಗದಿತಳಾದಳು. ಶಂಕರ "ಅಮ್ಮ ಇನ್ಮೇಲೆ, ಇವ್ನು ನಂಜೊತೆ ಬೆಂಗಳೂರ್‍ನಲ್ಲಿರ್ತಾನೆ. ಅಲ್ಲೇ ಪಿ.ಯು.ಸಿ ಗೆ ಸೇರ್ತಾನೆ. ಇನ್ಮೇಲೆ ಇವನ ಜವಾಬ್ದಾರಿ ನಂದು". ಇಷ್ಟೇಳುವಷ್ಟರಲ್ಲಿ, ಮನೆಮಂದಿಯೆಲ್ಲಾ ಹೊರಗೋಡಿ ಬಂದಿದ್ದರು. ವಿಶ್ವನಾಥರಾಯರು, ಮಾರುತಿಯ ತಲೆ ನೇವರಿಸಿ ಎದೆಗಪ್ಪಿಕೊಂಡರು. ಇದನ್ನೆಲ್ಲಾ ನೋಡಿದ ಭಟರು ಕೂಡಲೆ ಹೋಟೆಲಿನಿಂದ ಸಿಹಿತಿಂಡಿಗಳನ್ನು ತರಲು ಧಾವಿಸಿದರು. ಅಷ್ಟೊತ್ತಿಗಾಗಲೆ, ಕಮಲಳ ಅಡುಗೆ ಘಮ್ಮೆನ್ನುತ್ತಿತ್ತು. ಮನೆಯಲ್ಲಿ ಹಿಂದೆಂದೂ ಕಾಣದಂತಹ ಹಬ್ಬದ ವಾತವರಣ ಮೂಡಿತ್ತು. ಎಲ್ಲರೂ ಸಾಲಾಗಿ ಕುಳಿತರು. ಮಾರುತಿಯ ಒಂದು ಪಕ್ಕದಲ್ಲಿ ಕೈ ಹಿಡಿದು ಭಾಗಿರಥಮ್ಮ ಕುಳಿತರೆ, ಇನ್ನೊಂದು ಪಕ್ಕದಲ್ಲಿ ಪ್ರೀತಿಯ ಅಣ್ಣನ ಷರಟು ಗಟ್ಟಿಯಾಗಿ ಹಿಡಿದು ಕುಳಿತಿರುವ ಕಿಶೋರ. ಕಮಲಳು ಎಲ್ಲರಿಗೂ ಬಡಿಸುವಷ್ಟರಲ್ಲಿ, ಓಡೋಡಿ ಬಂದ ಭಟರು, ಎಲ್ಲರಿಗೂ ಸಿಹಿ ತಿಂಡಿಯನ್ನು ಹಂಚುತ್ತಾ..."ನಂಗೂ ಊಟ ಬಡಿಸಮ್ಮ ಕಮಲ" ಎಂದು ಮುಗುಳ್ನಗುತ್ತಾ ರಾಯರ ಪಕ್ಕದಲ್ಲಿ ಆಸೀನನಾಗುತ್ತಾರೆ.
ಎಲ್ಲರೆದೆಯಲ್ಲೂ ಹರುಷದ ಹೊನಲು...ಜೊತೆಗೆ ಘಮ್ಮೆನ್ನುವ ಅಡುಗೆ, ಈಗ ಭಟರು ತಂದಿರುವ ಸಿಹಿತಿಂಡಿ ಬೇರೆ. ಆಹಾ..ಈ ಪಂಕ್ತಿಯ ಊಟದಲ್ಲಿರುವ ಸವಿಯೇ ಸವಿ. ಇದಕ್ಕಿಂತ ಬೇರೆ ಸ್ವರ್ಗ ಉಂಟೆ?
ರಾತ್ರಿ ಪೂರ್ತಿ, ಅಣ್ಣತಮ್ಮಂದಿರು ಹಾಡಿ ಕುಣಿದರು. ದೊಡ್ಡ ಮಕ್ಕಳೂ ಎಳೆಯ ಮಕ್ಕಳಾಗಿದ್ದರು. ಕಿಶೋರ ಮಾರುತಿಯ ಷರಟು ಬಿಟ್ಟೇ ಇರಲಿಲ್ಲ. ಶಂಕರನು, ತನ್ನ ತಾಯಿಯನ್ನು, ಹೆಂಡತಿಯನ್ನು ಕರೆದು ಸ್ವಲ್ಪ ಕಾಲ ಮಾತಾಡಿದನು. ಅಪ್ಪನ ಆರೋಗ್ಯದ ಬಗ್ಗೆ, ತಮ್ಮಂದಿರ ಓದಿನ ಬಗ್ಗೆ, ಮನೆಯ ನಿರ್ವಹಣೆ ಬಗ್ಗೆ ಕೆಲವು ಹಿತನುಡಿಗಳನ್ನು ಹೇಳಿದನು. ಮಾರುತಿಯ ಬಗ್ಗೆ ಯಾವುದೇ ರೀತಿಯಲ್ಲೂ ಚಿಂತಿಸದಂತೆ ತಾಯಿಯಲ್ಲಿ ಕೇಳಿಕೊಂಡನು. ತಮ್ಮಂದಿರು ಏನಾದರು ತಪ್ಪು ಮಾಡಿದರೆ, ಅದನ್ನು ಹೊಟ್ಟೆಗೆ ಹಾಕಿಕೊಂಡು, ಅವರ ತಪ್ಪನ್ನು ತಿದ್ದಿ ಅವರನ್ನು ಸರಿದಾರಿಗೆ ತರುವಂತೆ ಹೆಂಡತಿಯಲ್ಲಿ ವಿನಂತಿಸಿಕೊಂಡನು. ತಾನು ತಂದಿದ್ದ ಸ್ವಲ್ಪ ಹಣವನ್ನು ತಾಯಿಯ ಕೈಗಿಟ್ಟು, "ಇನ್ಮೇಲಾದ್ರು ನಿನ್ನ ಜೀವ ನೆಮ್ಮದಿಯಾಗಿರ್ಬೇಕು ಅನ್ನೋದೆ ನನ್ನ ಆಸೆ" ಅನ್ನುವನು. ಇವೆಲ್ಲಕ್ಕೂ ತಾಯಿಯು ಕಣ್ಣಿನಲ್ಲಿಯೇ ಆನಂದ ಸೂಚಿಸುತ್ತಾಳೆ.
ಬೆಳಗಾಯಿತು...ಶಂಕರ, ಮಾರುತಿ ಇಬ್ಬರೂ ಹೊರಟು ನಿಂತಿದ್ದಾರೆ. ರಾತ್ರಿ ಪೂರ್ತಿ ಕಮಲ ಏನೇನೋ ತಿಂಡಿ ತಿನಿಸುಗಳನ್ನು ತಯಾರಿಸಿದ್ದಾಳೆ. ಒಂದು ಡಬ್ಬಿಯಲ್ಲಿ ಹಾಕಿ ತಂದು ಮಾರುತಿಯ ಬಟ್ಟೆಯ ಬುಟ್ಟಿಯಲ್ಲಿಡುತ್ತಾಳೆ. ಮಾರುತಿಯು ಕಣ್ಣಲ್ಲೇ ಅತ್ತಿಗೆಗೆ ಕೃತಜ್ಞತೆ ಸಲ್ಲಿಸುತ್ತಾನೆ.
ಕಿಶೋರ ಮಾರುತಿಯ ಷರಟು ಹಿಡಿದೇ ಇದ್ದಾನೆ. ಮಾರುತಿಯು ಕಿಶೊರನನ್ನು ಎತ್ತಿ ತನ್ನ ಬೆನ್ನಿಗೆ ಹಾಕಿಕೊಂಡು, ಕಿಶೊರನ ಕೈಗಳನ್ನು ತನ್ನ ಕುತ್ತಿಗೆಗೆ ಗಂಟು ಹಾಕಿಕೊಳ್ಳುತ್ತಾನೆ. ಅಪ್ಪ, ಅಮ್ಮ,ಅತ್ತಿಗೆ ಅಣ್ಣಂದಿರೆಲ್ಲರ ಕಾಲು ಮುಟ್ಟಿ ನಮಸ್ಕರಿಸುತ್ತಾನೆ. ಭಾಗೀರಥಮ್ಮ, ಕಣ್ಣೀರಿಡುತ್ತಲೇ ಆಶೀರ್ವಾದ ಮಾಡಿ ಕಳಿಸಿಕೊಡುತ್ತಾಳೆ.
ಎಲ್ಲರಿಗೂ "ಹೋಗಿ ಬರ್ತೀನಿ" ಎಂದು ಹೇಳಿ, ಭಾರವಾದ ಮನಸ್ಸಿನಿಂದ ಬಸ್‍ಸ್ಟ್ಯಾಂಡ್ ಕಡೆಗೆ ತೆರಳುತ್ತಾರೆ ಶಂಕರ ಮತ್ತೆ ಮಾರುತಿ. ಜೊತೆಗೆ ಮಾರುತಿಯ ಬೆನ್ನಿಗಂಟಿರುವ ಕಿಶೋರ ಹಾಗು ಶಂಕರನ ಕೈ ಹಿಡಿದು ನಡೆದಿರುವ ಶ್ರೀನಾಥ. ಬಸ್ಸು ಹಾರ್ನ್ ಹೊಡೆಯತೊಡಗಿತು. ಕಿಶೋರನನ್ನು ಶ್ರೀನಾಥನಿಗೆ ಒಪ್ಪಿಸಿದನು ಮಾರುತಿ. ಕಿಶೋರನಿಗೆ ಅಳುವೇ ಬಂದಿತಾದರೂ, ಪ್ರೀತಿಯ ಅಣ್ಣನಿಗೆ ಟಾಟ ಮಾಡುತ್ತಾ ಕೈ ಅಲ್ಲಾಡಿಸುತ್ತಾನೆ. ಶಂಕರ, ಮಾರುತಿ ಇಬ್ಬರು ಬಸ್ಸನ್ನೇರಿ ಶ್ರೀನಾಥ ಮತ್ತು ಕಿಶೊರನ ಕಡೆ ನೋಡುತ್ತಲೆ ಸೀಟಿನಲ್ಲಿ ಕೂರುತ್ತಾರೆ. ಕಿಶೋರ ಕೈ ಆಡಿಸುತ್ತಲೇ ಇದ್ದಾನೆ, ಸಣ್ಣದಾಗಿ ಅಳುತ್ತಲೂ ಇದ್ದಾನೆ. ಮಾರುತಿಯ ಕೆನ್ನೆ ಮೇಲೆ ಹನಿಗಳು ಇಳಿಯುತ್ತಿವೆ, ಅವನೂ ಕಿಶೋರನ ಕಡೆ ಕೈ ಬೀಸುತ್ತಿದ್ದಾನೆ. ಬಸ್ಸು ಜೋರಾಗಿ ಹಾರ್ನ್ ಮಾಡುತ್ತಾ ಹೊರಟಿತು.
ಆ ಬಸ್ಸಿನ ಗಾಲಿಗಳ ವೇಗದಷ್ಟೇ ವೇಗವಾಗಿ ಕಾಲಚಕ್ರವು ಉರುಳಿತು. ಪಿ.ಯು.ಸಿ ಯಲ್ಲಿ ವಿಜ್ಞಾನ ವಿಷಯ ಆಯ್ದುಕೊಂಡ ಮಾರುತಿ, ಅಲ್ಲಿಯೂ ಮೊದಲ ರ್‍ಯಾಂಕ್ ಗಿಟ್ಟಿಸಿದ. ನಂತರ, ಬೆಂಗಳೂರಿನ ಬಿ.ಎಂ.ಸಿ. ಸರ್ಕಾರಿ ವೈದ್ಯಕೀಯ ಕಾಲೇಜಿಗೆ ಸೇರಿ, ಹಗಲಿರುಳು ಶ್ರಮಪಟ್ಟು ಓದಿ, ಡಾಕ್ಟರ್ ಆಗುತ್ತಾನೆ. ಬಹುಬೇಗ ಯಶಸ್ಸು, ಕೀರ್ತಿ, ಸಂಪತ್ತೆಲ್ಲವನ್ನೂ ಗಳಿಸುತ್ತಾನೆ. ತಾನು ಹತ್ತಿದ ಏಣಿಯನ್ನೆಂದೂ ಮರೆಯದೆ ಮನೆಮಂದಿಯನ್ನೆಲ್ಲಾ ಕಣ್ಣಲ್ಲಿ ಕಣ್ಣಿಟ್ಟು ನೋಡಿಕೊಳ್ಳುತ್ತಾನೆ. ತನ್ನ ತಾಯಿಯ ಕನಸು ನನಸು ಮಾಡುತ್ತಾನೆ. ತಮ್ಮಂದಿರೆಲ್ಲರೂ ವಿದ್ಯಾವಂತರಾಗುವಂತೆ ಮಾಡಿ, ಅವರೆಲ್ಲರಿಗೂ ಮಾರ್ಗದರ್ಶಿಯಾಗುತ್ತಾನೆ.

ಹೀಗೆ ನಮ್ಮ ಕಥಾನಾಯಕ ಮಾರುತಿಯು ಕರ್ಮಯೋಗಿಯಾಗಿ, ದಿವ್ಯ ಜ್ಯೋತಿಯಾಗಿ ಬೆಳಗುತ್ತಾನೆ.

ಈ ಕರ್ಮಯೋಗಿಯ ಕಥೆಯನ್ನು ಓದಿದವರಿಗೂ, ಕೇಳಿದವರಿಗೂ, ಹೇಳಿದವರಿಗೂ ಭಗವಂತನಿಂದ ಒಳ್ಳೆಯದಾಗಲಿ. :)

- ಮನ

ಕರ್ಮಯೋಗಿ (ಕಥೆಯ ಭಾಗ ೨ - ಮನ)

2006-06-20T00:24:00.000-05:00

'ಕರ್ಮಯೋಗಿ' ಕಥೆಯ ಪೂರ್ವಾರ್ಧ ಓದಿದಿರಲ್ಲವೇ? ಇಲ್ಲವಾದಲ್ಲಿ ಮೊದಲ ಭಾಗ ಓದಿ ನಂತರ ಇಲ್ಲಿಗೆ ಬನ್ನಿ :)
ಮೊದಲ ಭಾಗದಲ್ಲಿ ತಿಳಿಸಿದಂತೆ, ಅದನ್ನು ಬರೆದು ಮುಂದಿನ ಭಾಗವನ್ನು ಓದುಗರಿಗೆ ಬರೆಯಲು ಬಿಟ್ಟರು ತವಿಶ್ರೀಯವರು.
ಅಂದು ಆಗಸ್ಟ್ ೬, ೨೦೦೫. ಆಗಷ್ಟೆ ಕಥೆಯ ಅರ್ಧಭಾಗ ಓದಿ ಮುಗಿಸಿದ್ದೆ. ಏಕೋ, ಏನೋ, ಎಲ್ಲಿಂದಲೋ ಬಂದ ಉತ್ಸಾಹ ಮುಂದಿನ ಭಾಗವನ್ನು ಬರೆಯಲು ಪ್ರೇರೇಪಿಸಿತು.
ಶನಿವಾರ ರಾತ್ರಿ ೮ ಗಂಟೆಗೆ ಬರೆಯಲು ಪ್ರಾರಂಭಿಸಿಯೇ ಬಿಟ್ಟೆ. ಮನಸ್ಸಿಗೆ ಹೊಳೆದದ್ದನ್ನು ಹಾಗೆ ಹಾಗೆಯೇ ಬರೆಯಲು ಸಾಧ್ಯವಾದಷ್ಟೂ ಪ್ರಯತ್ನಿಸಿದೆ.ಮುಗಿಸಿದಾಗ ಭಾನುವಾರ ಬೆಳಗಿನ ಜಾವ ೨ ಆಗಿತ್ತು. ಅಷ್ಟು ಸುದೀರ್ಘವಾದ ಬರವಣಿಗೆ ನನ್ನಿಂದ ಹೊರಬಂದದ್ದು ಅದೇ ಮೊದಲು. ಇದಿಷ್ಟು ಪೀಠಿಕೆ.
ಮುಂದೆ ಓದಿ...ಕರ್ಮಯೋಗಿ ಭಾಗ ೨.

ಕರ್ಮಯೋಗಿ ಭಾಗ ೨

ಯಾರೆಷ್ಟೇ ಹೇಳಿದರೂ ಮಾರುತಿ ತನ್ನ ಪಟ್ಟು ಬಿಡಲಿಲ್ಲ. ತಾನು ಇಷ್ಟು ಓದಿದ್ದೇ ಸಾಕು...ತನ್ನ ಮೇಲೆ ಈಗ ಸಾಕಷ್ಟು ಜವಾಬ್ದಾರಿಗಳಿವೆ. ಅವುಗಳನ್ನು ನಿಭಾಯಿಸುವ ಕಡೆ ಗಮನಿಸಬೇಕು. ತಂದೆ ಸಂಪೂರ್ಣವಾಗಿ ಚೇತರಿಸಿಕೊಳ್ಳಬೇಕು. ತಮ್ಮಂದಿರ ಖಾಯಿಲೆಗಳೆಲ್ಲವೂ ವಾಸಿಯಾಗಬೇಕು, ಬಹು ತ್ರಾಸದಿಂದ ಸಂಸಾರದ ರಥವನೆಳೆದೂ ಎಳೆದೂ ಬಳಲಿ ಬೆಂಡಾಗಿರುವ ಮಮತೆಯ ಮೂರ್ತಿಯಾದ ತಾಯಿಯು ಇನ್ನು ಮುಂದೆಯಾದರೂ ನೆಮ್ಮದಿಯ ಬಾಳು ಬಾಳಬೇಕು, ತಮ್ಮಂದಿರು ಯಾವುದೇ ಚಿಂತೆಯಿಲ್ಲದೇ ಓದಿನ ಕಡೆ ಗಮನ ಹರಿಸುವಂತಾಗಬೇಕು...ಇನ್ನೂ ಎಷ್ಟೆಷ್ಟೊ ಕನಸುಗಳು ಬಂದುಹೊಗಹತ್ತಿದವು...ಮಾರುತಿಯ ನಿರ್ಮಲ ಮನದೊಳಗೆ. ಸರ್ಕಾರವೇನೋ ನನ್ನ ಮುಂದಿನ ಓದಿನ ಸಂಪೂರ್ಣ ವೆಚ್ಚ ಭರಿಸುತ್ತದೆ..ಸರಿ..ಸಂತೋಷ..ಆದರೆ ಮನೆಮಂದಿಯನ್ನೆಲ್ಲಾ ನೋಡಿಕೊಳ್ಳುತ್ತದೆಯೆ? ನಮ್ಮ ಸಂಸಾರದ ಕಷ್ಟಗಳನ್ನೆಲ್ಲಾ ಸರ್ಕಾರದ ಬಳಿ ತೋಡಿಕೊಳ್ಳಾಲಾಗುತ್ತದೆಯೇ? ಖಂಡಿತಾ ಇಲ್ಲಾ. ದುಡಿಯಬೇಕು...ಸಂಸಾರವನ್ನು ಸಾಕಿ ಸಲಹಬೇಕು...ಇದೊಂದೇ ಮಾರುತಿಯ ಮನದಲ್ಲಿ ಇದ್ದ ಆಕಾಂಕ್ಷೆ.

ಮನೆಯವರೆಲ್ಲರಿಗೂ ಇದನ್ನು ಸರಿಯಾಗಿಯೇ ವಿವರಿಸಿದ...ಆದರೆ ಇವನ ಮಾತು ಕೇಳುವವರಾರು? ಇವನಷ್ಟೇ ಪ್ರೀತಿ ಅವರೆಲ್ಲರಿಗೂ ಇವನ ಮೇಲಿದೆ. "ನಮ್ಮ ಕಷ್ಟಗಳು ಇದ್ದದ್ದೇ. ಇವುಗಳು ನಿನ್ನ ಓದಿಗೆ ಮುಳ್ಳಾಗಬಾರದು. ಭಕ್ತ ಕುಂಬಾರನ ಬಳಿಗೆ ಸಾಕ್ಷಾತ್ ವಿಠಲನೇ ಬಂದು ಉಪಚರಿಸಿದ ಹಾಗೆ ನಮ್ಮ ಭಟರು ಉಪಚರಿಸುತ್ತಿದ್ದಾರೆ. ಶ್ರೀನಾಥ ಸಂಸಾರದ ಭಾರವನ್ನು ಹೊರಲು ಸಿದ್ಧನಿದ್ದಾನೆ...ನೀನು ಸಂಸಾರದ ಬಗ್ಗೆ, ತಂದೆಯ ಆರೋಗ್ಯದ ಬಗ್ಗೆ, ತಮ್ಮಂದಿರ ಓದಿನ ಬಗ್ಗೆ ಚಿಂತಿಸುವ ಅಗತ್ಯವಿಲ್ಲ. ವಿದ್ಯೆ ಎಂಬುದು ಎಲ್ಲರಿಗೂ ಒಲಿದು ಬರುವುದಿಲ್ಲ. ಸರಸ್ವತಿ ತಾಯಿಯು ನಿನಗೆ ಒಲಿದಿದ್ದಾಳೆ, ಆ ಮಹಾತಾಯಿಯನ್ನು ದೂರ ತಳ್ಳಬೇಡ. ಕಷ್ಟ ಪಟ್ಟು ಓದಿ ಮೊದಲನೇ ರ್‍ಯಾಂಕ್ ಬಂದಿದ್ದೀಯ. ನಿನ್ನ ಜ್ಞಾನಾರ್ಜನೆ ಇಲ್ಲಿಗೆ ನಿಲ್ಲುವುದು ಬೇಡ. ನೀನು ಜ್ಞಾನದ ಹಸಿವಿನಲ್ಲಿ, ಎಷ್ಟೋ ಸಲ ಹೊಟ್ಟೆಯ ಹಸಿವನ್ನು ಮರೆತಿದ್ದೀಯೆ ಎಂಬುದನ್ನ ನಿನ್ನ ತಾಯಿಯಾಗಿ ನಾನು ತುಂಬಾ ಚೆನ್ನಾಗಿ ಅರಿತಿದ್ದೇನೆ. ನೀನು ಓದನ್ನು ಮುಂದುವರೆಸಲೇ ಬೇಕು. ಇದು ನಿನ್ನ ತಾಯಿಯ ಆಶೀರ್ವಾದ ಮಾತ್ರವಲ್ಲ, ಅಜ್ಞೆಯೆಂದು ತಿಳಿ" ಎಂದು ಭಾಗಿರಥಮ್ಮ ತನ್ನ ಮನದಿಂಗಿತವನ್ನ ಮಾರುತಿ ಬಳಿ ಅಂಗಲಾಚಿಕೊಂಡಳು.

ನಮ್ಮ ಮಾರುತಿ ಅಡ್ಡಕತ್ತರಿಯಲ್ಲಿ ಸಿಕ್ಕ ಅಡಕೆಯಂತಾದ. "ಅಯ್ಯೋ ವಿಧಿಯೇ ಇದೆಂಥ ಧರ್ಮಸಂಕಟ? ನಾನೀಗ ದುಡಿಯಬೇಕೆ? ಅಥವಾ ಓದು ಮುಂದುವರೆಸಬೇಕೆ? ನಾನ್ಯಾಕಾದರೂ ರ್‍ಯಾಂಕ್ ಬಂದೆನೋ?" ಎಂದು ಅವನ ಮನಸ್ಸಿನಲ್ಲಿ ತುಮುಲ ತಳಮಳಗಳು ಸಾಗರದಲೆಗಳಂತೆ ಒಂದಾದ ಮೇಲೊಂದರಂತೆ ಉಕ್ಕತೊಡಗಿದವು. ದಿಕ್ಕೇತೋಚದವನಾಗಿ ಸೂರನ್ನು ದಿಟ್ಟಿಸತೊಡಗಿದ್ದಾಗ ಯಾರೋ ತನ್ನ ಕೈ ಬೆರಳನ್ನೆಳದಂತಾಯ್ತು. ಎಳೆದದ್ದು ಎಲ್ಲರಿಗಿಂತ ಚಿಕ್ಕ ತಮ್ಮನಾದ ಕಿಶೋರನು. ಆತ್ಮೀಯತೆಯಿಂದ ಅವನ ತಲೆ ನೇವರಿಸಿದ ಮಾರುತಿ. ಕಿಶೋರ ತನ್ನ ಪುಟ್ಟ ದನಿಯಲ್ಲಿ ಅಣ್ಣನ ಬಳಿ ಉಸುರಿದ..."ಅಣ್ಣಾ...ಅಣ್ಣಾ...ನೀನು ಓದ್ಬೇಕಣ್ಣಾ...ನಂಬಗ್ಗೆ ಚಿಂತಿಸ್ಬೇಡಣ್ಣಾ...ಅಲ್ನೋಡಣ್ಣಾ ಅಮ್ಮನ್ನಾ...ಅವಳನ್ನ ನೋಯಿಸ್ಬೇಡಣ್ಣಾ". ಮಾರುತಿಗೆ ಪ್ರೀತಿ ಉಕ್ಕಿ ಬಂತು. ಕಿಶೊರನನ್ನ ಬಾಚಿ ತಬ್ಬಿಕೊಂಡ. ಆನಂದಭಾಷ್ಪವೋ? ಅಥವಾ ದುಃಖದ ಕಡಲಿನ ಕಟ್ಟೆ ಒಡೆಯಿತೋ? ಒಟ್ಟಿನಲ್ಲಿ ಕಣ್ಣೀರು ಸುರಿಯತೊಡಗಿತು. ಪ್ರೀತಿಯ ತಮ್ಮನ ಅಪ್ಪುಗೆ ಬಲಪಡಿಸುತ್ತ, ತನ್ನ ರೋದನೆ ಮುಂದುವರೆಸಿದ.

ಸ್ವಲ್ಪ ಹೊತ್ತಿನ ನಂತರ ಎಲ್ಲವೂ ನಿಶ್ಯಬ್ಧ. ಆದರೆ ಎಲ್ಲರ ಮನಸ್ಸಿನಲ್ಲಿ ನೂರೆಂಟು ಯೋಚನಾಲಹರಿಗಳು. ಈ ಯೋಚನೆಗಳಿಗೆ ಅಡ್ಡಿಬಂತಂದೆ ಹೊರಗಡೆ ಹೆಜ್ಜೆಗಳ ಸಪ್ಪಳವಾಯಿತು.
ಬಾಗಿಲಲ್ಲೇ ಕುಳಿತಿದ್ದ ಲೋಹಿತ (ಆರನೆ ಮಗ, ಅಂದರೆ ಕಿಶೋರನಿಗೆ ಮಾತ್ರ ಅಣ್ಣ ), ಹೊರಗಡೆ ಇಣುಕಿದ. ಕಣ್ಣಗಲಿಸಿ ನೋಡಿದ..ಕಣ್ಣು ಮತ್ತೂ ಅಗಲಿಸಿ ಕೂಗಿಕೊಂಡ "ದೊಡ್ಡಣ್ಣಾ ಬಂದಾ....ದೊಡ್ಡಣ್ಣಾ ಬಂದಾ....". ಓಡಿ ಹೊಗಿ ಹಿರಿಯಣ್ಣನ ಕೈ ಹಿಡಿದು ಕೊಂಡ. ಮನೆಬಿಟ್ಟು ಹೋಗಿದ್ದ ಹಿರಿಯ ಮಗ ಶಂಕರ, ಮಾರುತಿಯ ಬಗ್ಗೆ ದಿನಪತ್ರಿಕೆಯಲ್ಲಿ ರ್‍ಯಾಂಕ್ ಸುದ್ದಿಯನ್ನು ಓದಿ ಮರಳಿ ಗೂಡಿಗೆ ಬಂದಿದ್ದ. ಬಂದವನೇ ಮಾರುತಿಯನ್ನು ಬಾಚಿ ತಬ್ಬಿದ. ಮಾರುತಿಯ ಹಣೆಗೆ ಮುತ್ತಿಟ್ಟ. ಕಣ್ಣೀರಿಟ್ಟ. ತಾಯ್ತಂದೆಯರಿಗೆ ನಮಸ್ಕರಿಸಿದ. ಅವನ ಹಿಂದೆಯೆ ಅವನ ಹೆಂಡತಿ ಕಮಲಳೂ ನಮಸ್ಕರಿಸಿದಳು. ವಿಶ್ವನಾಥರಾಯರಿಗೂ, ಭಾಗಿರಥಮ್ಮನವರಿಗೂ ಕ್ಷಣಕಾಲ ನೂರೆಂಟು ಪ್ರಶ್ನೆಗಳು ಮನದಲ್ಲಿ ಹಾದುಹೋದರೂ, ನಮಸ್ಕರಿಸಿದ ಸೊಸೆಯನ್ನು ಮನೆಗೆ ಬಂದ ಮಹಾಲಕ್ಷ್ಮಿಯೆಂದು ಭಾವಿಸಿ ಮನಸಾರೆ ಆಶೀರ್ವದಿಸಿದರು.

ಶಂಕರನು ತಾನು ತಂದಿದ್ದ ದ್ರಾಕ್ಷಿ, ಸೇಬುಗಳನ್ನು ಪ್ರೀತಿಯ ತಮ್ಮಂದಿರಿಗೆ ಕೊಟ್ಟು, ಅಪ್ಪನ ಪಕ್ಕದಲ್ಲಿ ಬಂದು ಕುಳಿತನು. ಮೂಸಂಬಿಯ ಸಿಪ್ಪೆ ಸುಲಿಯುತ್ತಾ ತನ್ನ ಕತೆಯನ್ನು ವಿವರವಾಗಿ ಹೇಳಿದ. ಹೇಳದೆ ಕೇಳದೆ ಮನೆ ಬಿಟ್ಟು ಹೋದದ್ದಕ್ಕೆ ಎಲ್ಲರಲ್ಲೂ ಕ್ಷಮೆ ಕೇಳಿದ. ದೊಡ್ಡಮಗನಾಗಿ ಬೇರೆಯವರಿಗಿಂತ ತನ್ನ ಮೇಲೆ ಜವಬ್ದಾರಿ ಹೆಚ್ಚೆಂದು ತಿಳಿದೇ, ಯಾವುದಾದರು ಕೆಲಸ ಮಾಡಿ ಮತ್ತೆ ಮನೆಗೆ ಮರಳಬೇಕೆಂದೇ ಮನೆ ಬಿಟ್ಟೆನೆ ಹೊರತು, ನಿಮ್ಮಿಂದ ಶಾಶ್ವತವಾಗಿ ದೂರಹೋಗಬೇಕೆಂದಲ್ಲಾ ಎಂದು ಸೂಕ್ಷ್ಮವಾಗಿ ತಿಳಿಹೇಳಿದನು. ತಾನು ಬೆಂಗಳೂರಿನ ಬಸ್ ಹತ್ತಿದ್ದೂ, ಬೆಂಗಳೂರಿನಲ್ಲಿ ಕೆಲಸಕ್ಕಾಗಿ ಪಟ್ಟ ಪಾಡು, ಕೊನೆಗೆ ಅಪ್ಪನ ಮೇಸ್ತ್ರಿ ಕೆಲಸ ಸ್ವಲ್ಪ ಗೊತ್ತಿದ್ದರಿಂದ ಹೇಗೊ ಕಾಲ ತಳ್ಳುತ್ತಿದುದ್ದು, ತನ್ನನ್ನು ನೋಡಿಕೊಳ್ಳುತ್ತಿದ್ದ ಮೇಸ್ತ್ರಿ ರಾಮಪ್ಪ ಇದ್ದಕ್ಕಿದ್ದಂತೆ ಕಣ್ಮುಚ್ಚಿದ್ದು, ಆತನ ಮಗಳಾದ ಕಮಲಳಿಗೆ ಅಪ್ಪನ ನಂತರ ಯಾರೂ ನೆರವಾಗದಿದ್ದದ್ದೂ, ಕೊನೆಗೆ ಯಾರಿಗೂ ತಿಳಿಸದಂತೆ ಮದುವೆಯಾಗಬೇಕಾದಂತ ಪರಿಸ್ಥಿತಿ ಎದುರಾದದ್ದೂ ಇವೆಲ್ಲವನ್ನೂ ಇದ್ದದ್ದು ಇದ್ದಂತೆಯೆ ವಿವರಿಸಿದ. ಮೊದಲು ಕೊಂಚ ಕೋಪಗೊಂಡಿದ್ದ, ಶ್ರೀನಾಥ ಅಣ್ಣನ ಈ ವಿವರಗಳಿಂದ ಈಗ ಮೆದುವಾಗಿದ್ದ. ಇಷ್ಟು ಹೇಳಿ ಮುಗಿಸುವಷ್ಟರಲ್ಲಿಯೇ ಕಮಲಳು ಮನೆಯನ್ನು ಸಂಪೂರ್ಣವಾಗಿ ಸ್ವಚ್ಛಗೊಳಿಸಿದ್ದಳು. ಕಸವನ್ನೆಲ್ಲಾ ಮೂಲೆಯಲ್ಲಿ ಗುಡ್ಡೆ ಮಾಡಿ ಬಾಚುವಾಗ, ಪುಟಾಣಿ ಕಿಶೋರ ಓಡಿಹೋಗಿ ಕಮಲಳ ಕುತ್ತಿಗೆಗೆ ಹಿಂದಿನಿಂದ ಹೋಗಿ ಎರಡು ಕೈಗಳನ್ನು ಸುತ್ತಿಹಾಕಿಕೊಂಡು, "ನಿಮ್ಮನ್ನ ಏನಂತ ಕರೀಲಿ?" ಎಂದು ಮುಗ್ಧತೆಯ ಭಾವದಿಂದ ಕೇಳಿದ. ಕಮಲಳ ಮುಖವು ಕಮಲದಂತೆ ಅರಳಿ, ಹಾಗೆಯೇ ಅವನ ಕಡೆ ತಿರುಗಿ, "ಅತ್ತಿಗೆ ಅಂತಾ ಕರಿ ಕಂದಾ" ಎಂದು ನೋಡಿ ಮುಗುಳ್ನಕ್ಕಳು.

ಕೇವಲ ಕೆಲವು ನಿಮಿಷಗಳಲ್ಲೆ ಮನೆಮಂದಿಯ ಮನ ಗೆದ್ದಿದ್ದಳು ಕಮಲ, ಅಡುಗೆ ಮನೆಯ ಸ್ವಚ್ಛಮಾಡಿ, ಎಲ್ಲರಿಗೂ ಅಡುಗೆ ಮಾಡತೊಡಗಿದ್ದಳು.

ಇತ್ತ, ಭಾಗಿರಥಮ್ಮ, ಹಿರಿಯಮಗ ಶಂಕರನ ಬಳಿ, ಅವಳ ಮುಂದಿದ್ದ ಆಸೆಯನ್ನು ಬಿಚ್ಚಿಟ್ಟಳು. "ನಾವೆಲ್ಲಾ ಹೇಳಿದ್ದಾಯ್ತು...ಈಗ ನೀನಾದ್ರು ಮಾರುತಿಗೆ ಹೇಳು ಮುಂದಕ್ಕೆ ಓದಪ್ಪ ಅಂತಾ...ಓದದೇ ಇಲ್ಲಾ ಅಂತ ಕುಂತವ್ನೆ" ಎಂದಳು. ಆ ಭಗವಂತ ಶಂಕರನನ್ನು ಮನೆಗೆ ವಾಪಸಾಗುವಂತೆ ಮಾಡಿರುವುದೇ ಅದಕ್ಕಲ್ಲವೇ?

ಶಂಕರ ಮಾರುತಿಯ ಕೈ ಹಿಡಿದು ಮನೆಯಿಂದ ಹೊರಬಂದ. ಅವರಿಬ್ಬರನ್ನು ಶ್ರೀನಾಥನೂ ಹಿಂಬಾಲಿಸಿದ. ಸ್ವಲ್ಪ ದೂರ ಹೋದಮೇಲೆ, ಶ್ರೀನಾಥನು ಮನೆಯಲ್ಲಿ ನಡೆಯುತ್ತಿದ್ದ ಚರ್ಚೆಯನ್ನು ಚಾಚೂ ತಪ್ಪದೆ ಶಂಕರನಿಗೆ ವಿವರಿಸಿದ. ಶಂಕರ ಒಂದು ದೀರ್ಘ ನಿಟ್ಟುಸಿರು ಬಿಟ್ಟು ಹೇಳಿದ. "ಆ ದೇವರು ದೊಡ್ಡವನು. ನಾನಿಲ್ಲಿಗೆ ಸರಿಯಾದ ಸಮಯಕ್ಕೇ ಬರುವಂತೆ ಮಾಡಿದ್ದಾನೆ. ನೋಡು ಮಾರುತಿ, ನಿನ್ನ ಮನಸ್ಸಿನಲ್ಲಿರುವ ಪ್ರತಿಯೊಂದು ಆಸೆ, ಕನಸು, ಭಾವನೆಗಳನ್ನು ನಾನು ಅರ್ಥಮಾಡಿಕೊಂಡಿದ್ದೇನೆ. ಇವೆಲ್ಲವೂ ನನ್ನಲ್ಲಿಯೂ ಇತ್ತು...ಈಗಲೂ ಇವೆ. ನಮ್ಮಿಬ್ಬರಲ್ಲಿ ಮಾತ್ರವಲ್ಲ, ಶ್ರೀನಾಥನ ಬಳಿಯೂ ಇವೆ. ನಮ್ಮೆಲ್ಲರ ಆಸೆ ಒಂದೆ, ನಮ್ಮ ಮನೆ ಜೇನುಗೂಡಿನಂತಿರಬೇಕು. ನಾವೆಲ್ಲಾ ಜೇನುಗಳಾಗಿ ಜೊತೆಯಾಗಿರಬೇಕು. ಆಗಾಗುವದಕ್ಕೆ, ಒಂದೇ ಪರಿಹಾರ. ಅದುವೇ ಒಬ್ಬರಿಗೊಬ್ಬರು ನೆರವಾಗುವುದು".
ಮಾರುತಿ ಶಂಕರನ ಮಾತುಗಳನ್ನು ತದೇಕಚಿತ್ತದಿಂದ ಕೇಳುತಿದ್ದ.
ಶಂಕರ ಮುಂದುವರೆಸಿದ, "ನಮ್ಮ ಸಂಸಾರ ಈಗ ಸಾಕಷ್ಟು ಸುಧಾರಿಸಿದೆ. ಮೊದಮೊದಲು, ಅಪ್ಪನ ಮೇಲೇ ಪೂರ್ತಿ ಜವಾಬ್ದಾರಿಯಿತ್ತು. ಆದರೆ ಈಗ ಹಾಗಲ್ಲ. ನೀನು, ಶ್ರೀನಾಥ ಸೇರಿಕೊಂಡು ಸಾಕಷ್ಟು ಉತ್ತಮಗೊಳಿಸಿದ್ದೀರಿ. ನಾನು ಮನೆ ಬಿಟ್ಟು ಹೋದಾಗಿನಿಂದ ಇಲ್ಲಿಯವರೆಗೂ ಜವಾಬ್ದಾರಿಗಳನ್ನು ಉತ್ತಮವಾಗಿ ನಿಭಾಯಿಸಿದ್ದೀರಿ. ತಮ್ಮಂದಿರನ್ನ ಚೆನ್ನಾಗಿ ಪೋಷಿಸಿದ್ದೀರಿ. ನಿಮಗೆ ನಾನೆಷ್ಟು ಕೃತಜ್ಞತೆಗಳನ್ನರ್ಪಿಸದರೂ ಸಾಲದು."
ಶಂಕರನ ಕಣ್ಣು ಒದ್ದೆಯಾಗಿತ್ತು...ಆದರೂ ಮುಂದುವರೆಸಿದ, "ಈಗ, ನಿಮ್ಮ ಜವಾಬ್ದಾರಿಯನ್ನು ಹಂಚಿಕೊಳ್ಳಲು ನಾನು ಎಲ್ಲ ರೀತಿಯಿಂದಲೂ ಸನ್ನದ್ಧನಾಗಿದ್ದೇನೆ. ಸಂಸಾರವನ್ನು ತಕ್ಕ ಮಟ್ಟಿಗೆ ನೋಡಿಕೊಳ್ಳುವ ಚೈತನ್ಯವಿರುವಷ್ಟು ದುಡಿಯುತ್ತಿದ್ದೇನೆ. ನಮ್ಮೆಲ್ಲರನ್ನೂ ಸಾಕಿ ದೊಡ್ದವರನ್ನಾಗಿ ಮಾಡುವಲ್ಲಿಯೇ ತನ್ನ ಜೀವವನ್ನು ತೇಯುತ್ತಿರುವ ಅಮ್ಮನಿಗೆ ಇನ್ಮುಂದೆ ನೆರವಾಗಲು, ಬೆಂಗಾವಲಾಗಲು ಕಮಲಳು ಇಲ್ಲಿಯೇ ಇರುತ್ತಾಳೆ. ನಾನು ಪ್ರತಿ ವಾರಕ್ಕೊಮ್ಮೆ ಬಂದು ಹೋಗುತ್ತಿರುತ್ತೇನೆ. ನೀನು ನನ್ನ ಜೊತೆ ಬೆಂಗಳೂರಿಗೆ ಬಾ. ನನ್ನ ಮನೆ, ಇನ್ಮುಂದೆ ನಿನ್ನ ಮನೆ. ಪಿ.ಯು.ಸಿ ಸೇರಲು ಇನ್ನು ಜಾಸ್ತಿ ದಿನ ಉಳಿದಿಲ್ಲ. ನಿನ್ನ ಓದಿನ ಭಾರವನ್ನು ಸರ್ಕಾರ ಹೊರುತ್ತಿರುವುದು ನಮ್ಮೆಲ್ಲರ ಹೊರೆಯನ್ನು ಸ್ವಲ್ಪವಾದರೂ ಕಡಿಮೆಮಾಡಿದೆ. ಇಲ್ಲಿ ಅಪ್ಪ ಅಮ್ಮ, ತಮ್ಮಂದಿರನ್ನು ನೋಡಿಕೊಳ್ಳಲು ಶ್ರೀನಾಥ, ಭಟರು, ಕಮಲ ಇವರೆಲ್ಲರೂ ಇದ್ದಾರೆ. ಏನಾದರೂ ತುರ್ತು ವಿಷಯವಿದ್ದರೆ, ಶ್ರೀನಾಥ ಭಟರ ಮೂಲಕ ನಮಗೆ ಟೆಲಿಗ್ರಾಮ್ ಕೊಡಲಿ ಅಥವಾ ಬೆಂಗಳೂರಿನ ನಮ್ಮ ಪಕ್ಕದಮನೆಯವರಿಗೆ ಫೋನಾಯಿಸಲಿ. ಏನಂತ್ಯೋ ಶ್ರೀನೀ?"
ಶ್ರೀನಾಥನಿಗೆ ಮಾತೇ ಹೊರಡುತ್ತಿಲ್ಲ..ಮೌನದಿಂದಲೆ ಹೌದೆಂಬಂತೆ ತಲೆಯಲ್ಲಾಡಿಸಿದ.

ಶಂಕರ ಹೇಳುವುದು ಇನ್ನೂ ಮುಗಿದಿರಲಿಲ್ಲ, "ನೋಡು ಮಾರುತಿ, ನಿನ್ನ ಅಣ್ಣನಾಗಿ ನಾನು ನಿನಗಿಂತ ಸ್ವಲ್ಪ ಜಾಸ್ತಿ ಈ ಪ್ರಪಂಚವನ್ನು ಅರ್ಥಮಾಡಿಕೊಂಡಿದ್ದೇನೆ. ಸಾಕಷ್ಟು ನೋವು-ಕಷ್ಟಗಳನ್ನು ಅನುಭವಿಸಿದ್ದೇನೆ. ನೀನು, ಅಪ್ಪ, ಅಮ್ಮ, ಶ್ರೀನೀ ಎಲ್ಲರೂ ನೋವು-ಕಷ್ಟಗಳನ್ನು ಉಂಡವರೇ. ನಮ್ಮ ತಮ್ಮಂದಿರೂ ಆ ನೋವಿನಲ್ಲಿ ತೋಯಬೇಕೆ? ಅವರು ಮುಂದೆ ಓದಿ, ವಿದ್ಯಾವಂತರಾಗಬೇಕಲ್ಲವೇ? ಅವರು ವಿದ್ಯಾವಂತರಾಗಲು ನೀನು ಮಾರ್ಗದರ್ಶಿಯಾಗಬೇಕಲ್ಲವೇ? ಅಣ್ಣಂದಿರಾದ ನಾವೇ ಓದದೇ ತಮ್ಮಂದಿರಿಗೆ ಓದಲು ಹೇಳಿದರೆ ನಮ್ಮ ಮಾತಿಗೆ ಬೆಲೆಕೊಡುತ್ತಾರೆಯೇ? ಮುಂದೆ ಅವರು ಏನು ಓದಬೇಕು, ಎತ್ತ ದಿಕ್ಕಿನಲ್ಲಿ ಸಾಗಬೇಕು ಎಂದು ಅರ್ಥಮಾಡಿಕೊಂಡು ಅವರಿಗೆ ಬುದ್ಧಿಹೇಳಲು ನಮಗೆ ಸಾಕಷ್ಟು ಯೋಗ್ಯತೆ ಇರಬೇಕಲ್ಲವೇ? ನೀನು ಓದಿ ದೊಡ್ಡ ಹುದ್ದೆಯನ್ನೇರಿದರೆ, ನೀನು ನಮಗೆಲ್ಲರಿಗೂ ಆಧಾರಸ್ತಂಭ ಮಾತ್ರವಲ್ಲ, ತಮ್ಮಂದಿರೆಲ್ಲರಿಗೂ ಸ್ಪೂರ್ತಿಯಾಗುವೆಯಲ್ಲವೇ? ನಿನ್ನಂತೆ ತಾನೂ ಓದಿ ಮುಂದೆ ಬರಬೇಕೆಂಬ ಆಸೆ, ಉತ್ಸಾಹ, ಛಲ ಅವರಲ್ಲಿಯೂ ಮೂಡುತ್ತದೆಯಲ್ಲವೇ? ನೀನೇ ಓದುವುದಿಲ್ಲವೆಂದರೆ ಅವರೆಲ್ಲರ ಉತ್ಸಾಹಕ್ಕೆ ತಣ್ಣೀರೆರಚಿದಂತಾಗುವುದಿಲ್ಲವೇ? ನೀನಿಷ್ಟು ದಿನ ಕಷ್ಟಪಟ್ಟು ಓದಿದ್ದು, ರ್‍ಯಾಂಕ್ ಬಂದದ್ದೆಲ್ಲವೂ ನೀರಿನಲ್ಲಿ ಹೋಮ ಮಾಡಿದಂತಾಗುವುದಿಲ್ಲವೇ?" ಕ್ಷಣಕಾಲ ಸುಮ್ಮನಾದ ಶಂಕರ ಮಾರುತಿಯನ್ನು ಗಮನಿಸುತ್ತಾನೆ. ಮಾರುತಿ ಶಂಕರನ ಕಣ್ಣಲ್ಲಿ ಕಣ್ಣಿಟ್ಟು ನೋಡುತ್ತಿದ್ದಾನೆ, ಕಿವಿಯಲ್ಲಿ ಕಿವಿಯಿಟ್ಟು ಕೇಳುತ್ತಿದ್ದಾನೆ. ತಾನು ಕೇಳುತ್ತಿರುವುದು, ನೋಡುತ್ತಿರುವುದು ವಾಸ್ತವವೋ, ಭ್ರಾಂತಿಯೋ ಎಂದು ಕ್ಷಣಕಾಲ ಗೊಂದಲಕ್ಕೀಡಾಗುತ್ತಾನೆ. ನಿಧಾನವಾಗಿ ಗೊಂದಲದಿಂದ ಚೇತರಿಸಿಕೊಂಡು, "ಶಂಕ್ರಣ್ಣಾ...ನನಗೆ ಏನು ಹೇಳಬೇಕೆಂದೇ ತೋಚುತ್ತಿಲ್ಲ...ಮಾತೇ ಹೊರಡುತ್ತಿಲ್ಲ" ಎಂದಷ್ಟೇ ಹೇಳಿ ನಿಲ್ಲಿಸುತ್ತಾನೆ. ಅವನ ಕಣ್ಣುಗಳಲ್ಲಿ ಪ್ರಜ್ವಲಿಸುತ್ತಿದ್ದ ಕಾಂತಿಯನ್ನು ಬಹುಬೇಗ ಗ್ರಹಿಸಿದ ಶಂಕರ, "ನೀನೇನೂ ಹೇಳಬೇಕಿಲ್ಲ. ಎಲ್ಲವನ್ನೂ ನಾನೇ ಅರ್ಥ ಮಾಡಿಕೊಂಡೆ" ಎಂದು ಸಂತೋಷದಿಂದ ಮಾರುತಿಯ ಭುಜವನ್ನು ತಟ್ಟುತ್ತಾನೆ.

ಕೊನೆಗೇನಾಯಿತು?
ಮೂರನೆಯ ಹಾಗು ಅಂತಿಮ ಭಾಗದಲ್ಲಿ ನಿರೀಕ್ಷಿಸಿ.

ಕರ್ಮಯೋಗಿ (ಕಥೆಯ ಭಾಗ ೧ - ತವಿಶ್ರೀ)

2006-06-18T12:57:00.000-05:00

ಆತ್ಮೀಯ ತವಿಶ್ರೀಯವರು ಕನ್ನಡ ಆಡಿಯೋ ಫೋರಮ್ಮಿನಲ್ಲಿ ಈ ಕಥೆಯನ್ನು ಪ್ರಕಟಿಸಿದ್ದರು. ವಿಶೇಷವೆಂದರೆ, ಈ ಕಥೆಯ ಅರ್ಧ ಭಾಗವನ್ನಷ್ಟೆ ಮೊದಲು ಪ್ರಕಟಿಸಿ, ಉಳಿದರ್ಧಕ್ಕೆ ಓದುಗರೆಲ್ಲರೂ ಕಾತುರದಿಂದ ಕಾಯುವಂತೆ ಮಾಡಿದರು. ಅಷ್ಟೆ ಅಲ್ಲದೇ, "ಉಳಿದರ್ಧವನ್ನು ನೀವೇ ಯಾರದರೂ ಬರೆಯಿರಿ, ನಂತರ ನಾನು ಬರೆದಿರುವ ಉಳಿದರ್ಧ ಭಾಗ ಪ್ರಕಟಿಸುವೆ" ಎಂದರು.
ಮುಂದಿನ ಮಾತು, ಭಾಗ ೨ರಲ್ಲಿ.

ಕರ್ಮಯೋಗಿ ಭಾಗ ೧

ಮಾರುತಿ ಹುಟ್ಟಿದಾಗಿನಿಂದ ಅವನ ಮನೆಯಲ್ಲಿ ದರಿದ್ರ ಕಾಲೊಕ್ಕರಿಸಿತ್ತು. ಮಗು ಹುಟ್ಟಿದಾಗ ಜಾತಕ ಬರೆದವರು ಹೇಳಿದ್ದೇನೆಂದರೆ ಈ ಮಗು ಮನೆಯಲ್ಲಿರುವವರೆಗೂ ಮನೆಯಲ್ಲಿ ಕಷ್ಟಕಾಲ, ಇವನು ಮನೆಯಿಂದಾಚೆಗೆ ಹೋದಾಗಲೇ ಮನೆಯಲ್ಲಿ ಏಳಿಗೆ. ಹಾಗೆಂದು ಮಗುವನ್ನು ಮನೆಯಿಂದಾಚೆಗೆ ತಳ್ಳೋಕ್ಕಾಗತ್ಯೇ? ಅಲ್ಲಿಯವರೆವಿಗೆ ಅವನಪ್ಪ ಅಮ್ಮ ಐಷಾರಾಮಿ ಜೀವನ ನಡೆಸಿ ಇದ್ದದ್ದೆಲ್ಲವನ್ನೂ ಕಳೆದುಕೊಂಡಿದ್ದರು. ಈ ನಾಲ್ಕನೆಯ ಮಗು ಹುಟ್ಟಿದಾಗ ಅಪ್ಪನಿಗೆ ಕೆಲಸವಿಲ್ಲ. ಮನೆಯಲ್ಲಿ ತಿನ್ನಲು ಏನೇನೂ ಇಲ್ಲ. ಹೊಸಹಳ್ಳಿಯ ಜಂಗಮ ಕರಡಪ್ಪಜ್ಜ ಭಿಕ್ಷೆ ಬೇಡಿ, ತಂದ ಕಾಳು ಕಡ್ಡಿಯನ್ನು ಇವನಮ್ಮ ಭಾಗೀರಥಿಗೆ ಕೊಟ್ಟು - ನೋಡಮ್ಮಾ ನೀನು ಅನುಕೂಲಸ್ಥರ ಮನೆಯಿಂದ ಬಂದವಳು. ಬೇರೆಯವರಿಂದ ಪಡೆದು ಅಭ್ಯಾಸವಿಲ್ಲ. ನಾನು ತಂದು ಕೊಡುವೆ - ನೀನು ಮಗುವನ್ನು ದೊಡ್ಡದು ಮಾಡು ಎಂದಳು. ತಂದೆ ವಿಶ್ವನಾಥರಾಯ ಕೆಲಸ ಬದುಕಿಲ್ಲದೇ ತನಗಾಗಿ ಇದ್ದ ಪಾಳು ಬಿದ್ದ ಜಮೀನನ್ನು ಸಾಗುವಳಿ ಮಾಡಲು ಪ್ರಯತ್ನಿಸಿದ. ಅಂದಿನವರೆಗೂ ಕೆಲಸ ಮಾಡದಿದ್ದ ಮೈ ಕಟು ಕೆಲಸಕ್ಕೆ ಬಗ್ಗೀತೇ? ಅದು ಆಗಿ ಬರಲಿಲ್ಲ. ಕೊನೆಗೆ ಅವನಣ್ಣ ಅಲ್ಲೆಲ್ಲೋ ದೂರದ ಲಕ್ಕವಳ್ಳಿಯಲ್ಲಿ ಇವನಿಗಾಗಿ ಗುಮಾಸ್ತೆಯ ಕೆಲಸ ಕೊಡಿಸಿದರು. ಸರಿ ಅಲ್ಲಿ ಸಂಸಾರ ಪ್ರಾರಂಭಿಸಿದ ಸ್ವಲ್ಪವೇ ದಿನಗಳಲ್ಲಿ ಯಾರೋ ತರ್ಲೆ ಮಾಡಿ ವಿಶ್ವನಾಥರಾ‍ಯರ ಕೆಲಸ ಹೋಯಿತು. ಮತ್ತೆ ಅವರಣ್ಣ ಆಗ ತಾನೆ ಶರಾವತಿಯ ಅಣೆಕಟ್ಟಿನ ಕೆಲಸ ಪ್ರಾರಂಭವಾಗಿದ್ದು ಅಲ್ಲಿ ಮೇಸ್ತ್ರಿ ಬೇಕಾಗಿ ಇವರನ್ನು ಅಲ್ಲಿಗೆ ಸೇರಿಸಿದರು. ದುರ್ಭಿಕ್ಷದಲ್ಲಿ ಅಧಿಕಮಾಸ ಬಂದಂತೆ ಹಿಂದೆಯೇ ಮನೆಯಲ್ಲಿ ಇನ್ನೂ ಮೂರು ಮಕ್ಕಳು ಹುಟ್ಟಿದವು. ಮನೆಯೋ ಕೌರವರ ಸೈನ್ಯವೋ ಅನ್ನುವ ಹಾಗಿತ್ತು. ಪಾಪ ಭಾಗೀರಥಿ ಹಸುವಿನಂತಹ ಮನಸ್ಸಿನವಳು. ಹೇಗೋ ಜೀವನದ ಗಾಡಿಯನ್ನು ಎಳೆಯುತ್ತಿದ್ದಳು.

ಮಾರುತಿ ಹೈಸ್ಕೂಲಿಗೆ ಹೋಗುವ ವೇಳೆಗೆ ಶರಾವತಿ ಕೆಲಸ ಮುಗಿದು ಅವನಪ್ಪ ವಿಶ್ವನಾಥರಾಯರಿಗೆ ಮತ್ತೆ ಕೆಲಸ ಹೋಯಿತು. ಮುಂದೇನು ಮಾಡಬೇಕೆಂದು ದಿಕ್ಕೇ ತೋಚದಂತಾಗಿದ್ದರು. ದೇವರಂತೆ ಬಂದವರೊಬ್ಬರು ವಿಶ್ವನಾಥರಾಯರಿಗೆ ದೂರದ ಸಾಗರದ ಮಂಡಿಯಲ್ಲಿ ಕೆಲಸ ಕೊಡಿಸಿದರು. ಸಂಸಾರವನ್ನು ಲಿಂಗನಮಕ್ಕಿಯಲ್ಲೇ ಬಿಟ್ಟು ಸಾಗರಕ್ಕೆ ಕೆಲಸಕ್ಕಾಗಿ ಹೋಗುತ್ತಿದ್ದವರು, ವಾರಕ್ಕೊಮ್ಮೆ ಮನೆ ಸೇರುತ್ತಿದ್ದರು. ಹುಡುಗರು ಬುದ್ಧಿವಂತರು. ಶಾಲೆಯಲ್ಲಿ ಮಾಸ್ತರುಗಳಿಗೆ ಅಚ್ಚುಮೆಚ್ಚಿನವರಾಗಿದ್ದರು. ಶಾಲೆಯ ಮಾಸ್ತರರಲ್ಲೊಬ್ಬರಾದ ಜೋಯಿಸರು ಮಾರುತಿ ಮತ್ತು ಅವನಣ್ಣ ಶ್ರೀನಾಥನನ್ನು ಮನೆಗೆ ಕರೆದು ಅವರ ಮನೆಗೆ ಪಾಠಕ್ಕಾಗಿ ಬರುತ್ತಿದ್ದ ಚಿಕ್ಕ ಚಿಕ್ಕ ಮಕ್ಕಳಿಗೆ ಪಾಠ ಹೇಳಿಕೊಡಲು ಇವರಿಗೆ ಹೇಳಿ ಮನೆಗೆ ಸ್ವಲ್ಪ ಆಧಾರವಾಗಲು ಕಾರಣರಾದರು. ನೋಡಿ ದೇವರು ಹೇಗೆ ಯಾವ ಯಾವ ರೂಪದಲ್ಲಿ ಬಂದು ಮುಳುಗುತ್ತಿದ್ದವರಿಗೆ ಹುಲ್ಲು ಕಡ್ಡಿಯನ್ನಿತ್ತು ಮುಳುಗದಂತೆ ನೋಡಿಕೊಳ್ಳುವನು. ಇವರನ್ನು ಪರೀಕ್ಷೆ ಮಾಡಲೆಂದೇ ಅನ್ನುವಂತೆ ಅವರೆಲ್ಲರ ಹಿರಿಯ ಹುಡುಗ ಮನೆ ಬಿಟ್ಟು ಎಲ್ಲಿಗೋ ಹೋಗಿದ್ದ. ಮಂಡಿಯಲ್ಲಿ ಶ್ರದ್ಧೆಯಿಂದ ಕೆಲಸ ಮಾಡಿ ಒಳ್ಳೆಯ ಹೆಸರು ಗಳಿಸಿದ್ದ ವಿಶ್ವನಾಥರಾಯರು ಅಲ್ಲಿ ಇಲ್ಲಿ ಪೌರೋಹಿತ್ಯವನ್ನೂ ಮಾಡಿಕೊಂಡು ಜೀವನರಥವನ್ನು ಎಳೆಯುತ್ತಿದ್ದರು. ಕೊನೆಯವರುಗಳು ಇನ್ನೂ ಚಿಕ್ಕ ಚಿಕ್ಕ ಮಕ್ಕಳು. ಮನೆಯಲ್ಲಿ ಶ್ರೀನಾಥ ಮತ್ತು ಮಾರುತಿಯಷ್ಟೇ ಸ್ವಲ್ಪ ತಿಳುವಳಿಕೆ ಬಂದ ಮಕ್ಕಳು. ಶ್ರೀನಾಥ ಸ್ವಲ್ಪ ಸೂಕ್ಷ್ಮ ಶರೀರದವ. ತೀರ್ಥ ತೆಗೆದುಕೊಂಡರೆ ಶೀತ ಮತ್ತು ಮಂಗಳಾರತಿ ತೆಗೆದುಕೊಂಡರೆ ಉಷ್ಣ ಆಗುತ್ತಿತ್ತು. ಇದ್ದುದರಲ್ಲಿ ಸ್ವಲ್ಪ ಗಟ್ಟಿಗ ಅಂದ್ರೆ ನಮ್ಮ ಮಾರುತಿಯೇ. ಎಂಥ ಕಾಲದಲ್ಲಿಯೂ ಅಪ್ಪನಿಗೂ ಅಮ್ಮನಿಗೂ ಮನೆಯ ಬೆನ್ನೆಲುಬಾಗಿ ನಿಲ್ಲುತ್ತಿದ್ದ.

ಪರೀಕ್ಷಿಸಲು ಗಟ್ಟಿಗರಿಗೇ ಕಷ್ಟಗಳು ಜಾಸ್ತಿ ಬರುವುದಂತೆ. ಮಾರುತಿ ಹತ್ತನೇ ತರಗತಿಗೆ ಬಂದಾಗ ತುಂಬಾ ಕಷ್ಟದ ಸಮಯ ಬಂದಿತು. ಚಿಕ್ಕ ಮಕ್ಕಳಿಗೆ ದಿನಂಪ್ರತಿ ಒಂದಲ್ಲ ಒಂದು ಕಾಯಿಲೆಗಳು. ಮಾರುತಿಯದೇ ಮನೆಯಲ್ಲಿ ಹೆಚ್ಚಿನ ಕೆಲಸಗಳೆಲ್ಲಾ. ಅವನಮ್ಮನಿಗೆ ಅವನಿಲ್ಲದಿದ್ದರೆ ಒಂದು ಕೈಯೇ ಕಳೆದು ಹೋದ ಅನುಭವವಾಗುತ್ತಿತ್ತು. ಆ ಕಡೆ ಪಬ್ಲಿಕ್ ಪರೀಕ್ಷೆಗೆ ಓದಿಕೊಳ್ಳಬೇಕು, ಈ ಕಡೆ ಮನೆ ಕಡೆಯೂ ನೋಡಿಕೊಳ್ಳಬೇಕು. ಹೀಗಿರುವಾಗ ಡಿಸೆಂಬರ್ ಮಾಹೆಯಲ್ಲಿ ಪರೀಕ್ಷೆಗೆ ಹಣ ಕಟ್ಟಬೇಕಾದ ಸಂದರ್ಭ ಬಂದಿತು. ಅದು ರಾಜ್ಯದ ಮಟ್ಟದಲ್ಲಿ ನಡೆಯುವ ಪರೀಕ್ಷೆ - ಅದಕ್ಕೆ ೧೦ ರೂಪಾಯಿಗಳನ್ನು ಕಟ್ಟಬೇಕಿತ್ತು. ಮನೆಯಲ್ಲಿ ಹಣವಿಲ್ಲ. ಪಾಠಕ್ಕೆ ಬರುತ್ತಿದ್ದ ಚಿಕ್ಕ ಮಕ್ಕಳು ಸರಿಯಾಗಿ ಹಣ ಕೊಟ್ಟಿಲ್ಲವೆಂದು ಜೋಯಿಸರು ಹೇಳಿದ್ದರು. ಆ ವಾರ ಅವರಪ್ಪ ಕೂಡಾ ಅದೇಕೋ ಬಂದೇ ಇರ್ಲಿಲ್ಲ. ಯಾರ ಮುಂದೆಯೂ ಕೈ ಚಾಚಬಾರದೆಂಬ ಅಣತಿ ಅಪ್ಪನದು. ಮನೆಯವರಲ್ಲೂ ಒಣ ಪ್ರತಿಷ್ಠೆ ತುಂಬಿತ್ತು. ಅಮ್ಮನಿಗಂತೂ ದಿಕ್ಕೇ ತೋಚದೆ, "ಮಾರುತಿ ನೋಡಪ್ಪಾ, ನೀನೇ ಏನಾದರೂ ಮಾಡಿ ಹಣ ಹೊಂದಿಸಿಕೊಂಡು ಪರೀಕ್ಷೆಗೆ ಕಟ್ಟು" ಅಂದಳು. ಪಾಪದ ಹುಡುಗ ಏನು ಮಾಡಿಯಾನು. ವಯಸ್ಸಿಕೆ ಮೀರಿದ ತಿಳುವಳಿಕೆ ಬುದ್ಧಿವಂತಿಕೆ ಇದ್ದರೂ ಹಣ ಎಲ್ಲಿಂದ ತಂದಾನು. ಹತ್ತಿರದವರು ಅನ್ನುವ ಎಲ್ಲರನ್ನೂ ಕೇಳಿದ್ದಾಯಿತು. ಸಾಲ ಕೊಡಲು ಎಲ್ಲರಿಗೂ ಭಯ, ಮತ್ತೆ ಹಣ ವಾಪಸ್ಸು ಬರುತ್ತದೋ ಇಲ್ಲವೋ ಅಂತ. ಜೋಯಿಸರು ಕಣ್ತಪ್ಪಿಸಿ ಓಡಾಡಲು ಆರಂಭಿಸಿದರು. ಅಪ್ಪನಿಗೆ ಪತ್ರ ಬರೆದರೂ ಉತ್ತರವಿಲ್ಲ. ನಂತರ ತಿಳಿದು ಬಂದದ್ದು, ಯಾವುದೋ ಕೆಲಸದ ಮೇಲೆ ಮಂಡಿಯವರು ಅವರನ್ನು ಶಿರಸಿ ಕಡೆಗೆ ಕಳುಹಿಸಿದ್ದರು. ಡಿಸೆಂಬರ್ ೩೦ರೊಳಗೆ ಹಣ ಕಟ್ಟಲು ಗಡುವು ಇದ್ದಿತ್ತು. ೨೯ ಆದರೂ ಎಲ್ಲೂ ಹಣ ಸಿಕ್ಕಲಿಲ್ಲ. ಅದೇ ವೇಳೆಯಲ್ಲಿ ಶ್ರೀನಾಥನಿಗೆ ಉಬ್ಬಸ ಜಾಸ್ತಿ ಆಗಿತ್ತು. ವೈದ್ಯರ ಬಳಿ ಹೋಗಲು ಹಣವಿಲ್ಲ. ಚಿಕ್ಕ ಮಕ್ಕಳಿಗೆ ಸಣ್ಣ ಪುಟ್ಟ ಜ್ವರ, ನೆಗಡಿ. ತಾಯಿಗಂತೂ ಇವರನ್ನೆಲ್ಲಾ ನೋಡಿಕೊಳ್ಳುವುದೇ ಒಂದು ದೊಡ್ಡ ಸಮಸ್ಯೆಯಾಗಿತ್ತು. ಮಾರುತಿ ಅವಳ ಮುಂದೆ ತನ್ನ ಸಮಸ್ಯೆ ಹೇಳಿಕೊಳ್ಳಲು ಇಚ್ಛಿಸಲಿಲ್ಲ. ೨೯ನೇ ತಾರೀಖು ರಾತ್ರಿಯೆಲ್ಲ ನಿದ್ದೆಯಿಲ್ಲದೇ ಹೊರಳಾಡುತ್ತಿದ್ದ. ಏನೇನೋ ಯೋಚನೆಗಳು. ಪುಸ್ತಕ ಹಿಡಿದು ಕೂತರೆ ಏನೂ ಕಾಣುತ್ತಿಲ್ಲ. ನಾಳೆಯನ್ನು ಹೇಗೆ ಎದುರಿಸುವುದೆಂಬ ಭಯದಲ್ಲಿ ಕಣ್ಣು ತುಂಬಿ ಬರುತ್ತಿದೆ.

ಹೇಗೋ ಬೆಳಗಾಯಿತು. ಶಾಲೆಯ ಕಡೆ ಹೋದ. ಅಲ್ಲಿ ಹೆಡ್ ಮಾಸ್ತರರನ್ನು ಕಂಡು ತನ್ನ ಕಷ್ಟ ಹೇಳಿಕೊಂಡ. ಅವರು ಏನೂ ಆಗದೆಂದು ಕೈ ಆಡಿಸಿದರು. ಎಲ್ಲೇ ಹೋದರೂ ಏನೇ ಪ್ರಯತ್ನಕ್ಕೆ ಕೈ ಹಾಕಿದರೂ ಅವಮಾನ ಆಗುತ್ತಿತ್ತು. ಮಧ್ಯಾಹ್ನ ೩ ಘಂಟೆಗೆ ಪರೀಕ್ಷೆಗೆ ಹಣ ಕಟ್ಟಲು ಗಡುವು ಮುಗಿಯುತ್ತದೆ. ಆಗ ಸಮಯ ೧ ಆಗಿದೆ. ಹೊಟ್ಟೆ ಹಸಿಯುತ್ತಿರುವುದರ ಕಡೆಗೆ ಪರಿವೆಯೂ ಇಲ್ಲದೇ ಎಲ್ಲೆಂದರಲ್ಲಿ ಓಡಾಡುತ್ತಿರುವ, ಮಾರುತಿ. ೨ ಘಂಟೆಗೆ ಸಾಗರದಿಂದ ಬರುವ ಬಸ್ಸನ್ನು ಎದುರುಗೊಳ್ಳಲು ಬಸ್ ನಿಲ್ದಾಣಕ್ಕೆ ಹೋದ. ಬಸ್ಸು ಬಂದಿತು. ಇವರಪ್ಪ ಇಳಿಯಲೇ ಇಲ್ಲ. ಚಾಲಕನ್ನನ್ನು ಕೆಳಿದ, ನಮ್ಮಪ್ಪನನ್ನು ನೋಡಿದಿರಾ? ಅದಕ್ಕವನು ಯಾರೋ ನಿಮ್ಮಪ್ಪ, ಮುಖ್ಯಮಂತ್ರಿಯೋ ಅಥವಾ ಪ್ರಧಾನ ಮಂತ್ರಿಯೋ ಅಂತ ವ್ಯಂಗ್ಯ ಮಾಡಿದ. ಎಳೆಯ ಮನಸ್ಸಿನ ಮೇಲೆ ಬರೆ ಎಳೆದಂತಾಯ್ತು. ಇನ್ನು ಮನೆ ಕಡೆಗೆ ಹೋಗಿ ಪ್ರಯೋಜನವಿಲ್ಲ. ಬದುಕನ್ನು ಎದುರಿಸಲೇಬೇಕೆಂಬ ಛಲ ಉಕ್ಕುತ್ತಿದೆ. ಸರಿ ಹಾಗೇ ರಸ್ತೆಗುಂಟ ಹೊರಟ. ಮನೆಕಡೆ ಗಮನವೂ ಬರಲಿಲ್ಲ. ಲಿಂಗನಮಕ್ಕಿಯಿಂದ ಕಾಡಿನ ಮುಖಾಂತರ ಕಾರ್ಗಲ್, ಜೋಗ ದಾಟಿ ಭಟ್ಕಳದ ರಸ್ತೆ ಹಿಡಿದ. ಸಂಜೆಯಾಯಿತು. ಅದ್ಯಾವ ಊರು ಅಂತ ಕೂಡ ತಿಳಿಯಲಿಲ್ಲ. ಅಲ್ಲೇ ಹತ್ತಿರದಲ್ಲಿದ್ದ ಮನೆಯ ಜಗುಲಿಯ ಮೇಲೆ ಮಲಗಿದ. ಸ್ವಲ್ಪ ಕಣ್ಣಿಗೆ ಜೊಂಪು ಹತ್ತಿತ್ತು, ಯಾರೋ ಬಂದು "ಲೇ ಮಾಣಿ ಎಂತದ್ದು ಮಾಡ್ತಿ ಇಲ್ಲಿ. ನಡೆ ಆಚೆಗೆ" ಅಂದರು. ಮಾತನಾಡಲು ತ್ರಾಣವೂ ಇಲ್ಲ. ಸ್ವಲ್ಪ ಸಮಯವಾದರೂ ಹುಡುಗನಿಂದ ಉತ್ತರ ಬರದಿರಲು ಮನೆಯಾತನಿಗೆ ಕರುಣೆ ಉಕ್ಕಿ ಬಂದಿತು. ಎಂಥದು! ಉಂಡಿಲ್ಲವೋ ಎಂದ. ಇವನು ತಲೆ ಅಲ್ಲಾಡಿಸಿದ. ಮನೆಯೊಳಗೆ ಹೋಗಿ ಅದೇನನ್ನೋ ತಂದು ಕೊಟ್ಟ. ಸ್ವಲ್ಪ ಅನ್ನ ಇತ್ತು. ಅದೂ ಹಳಸಿದ ವಾಸನೆ ಸಾರುತ್ತಿತ್ತು. ಜೊತೆಗಿದ್ದ ಸಾರಿನಂಥ ಪದಾರ್ಥ ಬಂಗಡಿ ಮೀನಿನ ವಾಸನೆಯ ಗಬ್ಬು ವಾಸನೆ. ಬರಿಯ ಅನ್ನವನ್ನೇ ಹೇಗೋ ಮಾಡಿ ಹೊಟ್ಟೆಯ ಒಳಕ್ಕೆ ತಳ್ಳಿದ. ಸ್ವಲ್ಪ ಹೊತ್ತು ನಿದ್ರಿಸಿ, ಬೆಳಗಾಗುತ್ತಲೇ ಅಲ್ಲಿಂದ ಹೊರಟ. ಹಾಗೇ ಅಲ್ಲಿ ಇಲ್ಲಿ ಸಿಕ್ಕಿದ್ದನ್ನು ತಿಂದು ಕುಡಿದು ೫-೬ ದಿನಗಳ ನಂತರ ಭಟ್ಕಳ ಪೇಟೆಯನ್ನು ತಲುಪಿದ. ಮುಂದೆ ಅಲ್ಲಿ ಏನು ಮಾಡಬೇಕು ಎನ್ನುವ ಪ್ರಶ್ನೆ ಭೂತದಂತೆ ಕಾಡಹತ್ತಿತು. ಪರೀಕ್ಷೆಗೆ ಹಣ ಕಟ್ಟುವ ಅವಧಿಯೂ ಮುಗಿದಿದೆ. ಯಾಕಾದರೂ ಏನು ಮಾಡಬೇಕು, ಎಲ್ಲಿ ಹೋಗಬೇಕು, ಜೀವನ ಅಂದ್ರೆ ಇಷ್ಟೇನಾ ಅನ್ನುವ ಯೋಚನೆ ಹುಟ್ಟಿತು. ಹೊಟ್ಟೆ ಚುರ್ ಅಂದಾಗ ಕಂಡದ್ದು ಹತ್ತಿರದ ಭಟ್ಟರ ಹೋಟೆಲ್. ಅಲ್ಲಿ ಹೋಗಿ ಕೆಲಸ ಕೇಳಿದ. ಅವರು ಇವನ ಪೂರ್ವಾಪರ ವಿಚಾರಿಸಿದರು. ಇವನು ಏನೋ ಒಂದು ಸುಳ್ಳು ಹೇಳಿದ. ಅಂತಹ ಸ್ಥಿತಿಯಲ್ಲೂ ತನ್ನ ಬಗ್ಗೆ ನಿಜ ಹೇಳಲು ಪ್ರತಿಷ್ಠೆ ಅಡ್ಡ ಬಂದಿತ್ತು. ಹೇಗೊ ಒಂದು ತಿಂಗಳು ಭಟ್ಟರು ಹೇಳಿದ ಕೆಲಸವನ್ನೆಲ್ಲಾ ಚೊಕ್ಕವಾಗಿ ಮಾಡಿ ಅವರ ಮೆಚ್ಚುಗೆ ಸಂಪಾದಿಸಿದ. ಭಟ್ಟರಿಗೆ ಇವನು ತನ್ನ ಬಗ್ಗೆ ಸುಳ್ಳು ಹೇಳಿದ್ದಾನೆಂಬ ಸುಳಿವು ಅದು ಹೇಗೋ ಸಿಕ್ಕಿತ್ತು. ಹತ್ತಿರ ಕರೆದು ಅವನ ತಲೆ ನೇವರಿಸಿ "ಲೇ ಮಾಣಿ ಇಂಥ ಸುಳ್ಳು ಹೇಳೂದ, ನೀನು ಬುದ್ಧಿವಂತ. ಓದಿ ಮುಂದೆ ಬರ್ಬೇಕಾದವ. ಹೇಳು ನಿನಗೇನು ತೊಂದರೆ" ಎಂದರು.

ಮಾರುತಿಗೆ ಭಟ್ಟರ ಪ್ರೀತಿಯ ಮಾತುಗಳು ಕೇಳಿ ಅಳುವೇ ಬಂದಿತು. ವಿಷಯವನ್ನೆಲ್ಲಾ ಅರುಹಿದ. ಭಟ್ಟರು ಕೈಗೆ ಸ್ವಲ್ಪ ಹಣವನ್ನಿತ್ತು, ನೋಡು ಈಗ ನೀನು ಮನೆಗೆ ನಡೆ. ಆಗಾಗ್ಯೆ ನನಗೆ ಪತ್ರ ಬರೆ. ನಿನ್ನನ್ನು ನೋಡಿದರೆ, ಸತ್ತು ಹೋದ ನನ್ನ ಮಗನ ಜ್ಞಾಪಕವಾಗುತ್ತಿದೆ. ನೀನು ಇಂದಿನಿಂದ ನನ್ನ ಮಗನೇ. ಚೆನ್ನಾಗಿ ಓದು. ನಿನಗೆಷ್ಟು ಬೇಕೋ ಅಷ್ಟು ಹಣವನ್ನು ನಾನು ಕೊಡುವೆ. ಮನೆಯಲ್ಲಿ ನನ್ನ ವಿಷಯ ತಿಳಿಸು. ಅಂದೇ ಬಸ್ಸಿನಲ್ಲಿ ಕುಳ್ಳಿರಿಸಿ ಲಿಂಗನಮಕ್ಕಿಗೆ ಕಳುಹಿಸಿದರು. ಮನೆಗೆ ಬಂದ ಮಾರುತಿ. ನೊಡ್ತಾನೆ, ಅವರಪ್ಪನಿಗೆ ಲಕ್ವ ಹೊಡಿದು ಮಲಗಿದ್ದಾರೆ. ಚಿಕ್ಕ ಮಕ್ಕಳಲ್ಲಿ ಕಾಯಿಲೆಯಿಂದ ಒಬ್ಬ ತೀರಿ ಹೋಗಿದ್ದಾನೆ. ಇವನನ್ನು ನೋಡಿದ ಕೂಡಲೇ ಅವರಮ್ಮ ಮತ್ತು ಶ್ರೀನಾಥ ತಬ್ಬಿ ಕೊಂಡು ಗೊಳೋ ಅಂದು ಅತ್ತು ಬಿಟ್ಟರು. ಮಾರ್ಚ್ ಪರೀಕ್ಷೆಗೆ ಕಟ್ಟಲು ಸಮಯವಾಗಿ ಹೋಗಿತ್ತು. ಆದರೂ ಮರುದಿನ ಹೆಡ್ ಮಾಸ್ತರರನ್ನು ಭೇಟಿಯಾಗಿ ವಿಷಯವನ್ನೆಲ್ಲಾ ಅರುಹಿದ.

ಅಷ್ಟು ಹೊತ್ತಿಗಾಗಲೇ ಊರಿನ ಮಂದಿಗೆಲ್ಲಾ ಮಾರುತಿಯ ವಿಷಯ ಗೊತ್ತಾಗಿತ್ತು. ಇನ್ನು ಸುಮ್ಮನೆ ಕೂತರೆ ಕೆಟ್ಟ ಹೆಸರು ಬರುವುದೆಂದೂ, ತಾನೂ ಏನಾದರೂ ಸಹಾಯ ಮಾಡಬೇಕೆಂದು ಹೆಡ್ ಮಾಸ್ತರರು ಬೆಂಗಳೂರಿನ ವಿದ್ಯಾ ಇಲಾಖೆಗೆ ದೂರವಾಣಿಯ ಮೂಲಕ ಮಾತನಾಡಿ ಹುಡುಗನಿಗೆ ಪರೀಕ್ಷೆ ಬರೆಯಲು ಅನುವು ಮಾಡಿಕೊಡಬೇಕೆಂದು ಕೇಳಿಕೊಂಡರು. ದೇವರು ದೊಡ್ಡವನು. ಹಾಗೇ ಆಗಿ, ಪರೀಕ್ಷೆಗೆ ಕುಳಿತುಕೊಳ್ಳಲು ಅನುಮತಿ ದೊರಕಿತು. ಪ್ರತಿ ತಿಂಗಳೂ ಭಟ್ಟರಿಂದ ಹಣ ಬರುತ್ತಿತ್ತು.

ಈ ಮಧ್ಯೆ ಒಮ್ಮೆ ಭಟ್ಟರು ಇವರ ಮನೆಗೆ ಬಂದು, ವಿಶ್ವನಾಥರಾಯರ ಚಿಕಿತ್ಸೆಗೆಂದು ಅಂಕೋಲಾಗೆ ಕೂಡ ಕರೆದುಕೊಂಡು ಹೋಗಿದ್ದರು.

ಮಾರುತಿಗೆ ಪರೀಕ್ಷೆಗಾಗಿ ಓದುವುದು ಬಿಟ್ಟು ಬೇರೆ ಯಾವುದೂ ಯೋಚನೆಗಳು ಬರದಂತೆ ಎಲ್ಲರೂ ನೋಡಿಕೊಂಡರು. ಮಾರ್ಚ್ ತಿಂಗಳಲ್ಲಿ ಪರೀಕ್ಷೆ ಮುಗಿಯಿತು. ಅಂಕೋಲಾದ ಪೊಕ್ಕ ಮಾನು ಗೌಡ ಔಷಧಿಯ ಸಹಾಯದಿಂದ ಮಾರುತಿ ತಂದೆಯ ಆರೈಕೆ ಮಾಡಿದ. ಬಹಳ ಬೇಗ ತಂದೆ ಆರೋಗ್ಯರಾದರು. ಮೇ ತಿಂಗಳ ಕೊನೆಯ ವಾರದಲ್ಲಿ ಭಟ್ಟರು ಕೈಯಲ್ಲಿ ದಿನಪತ್ರಿಕೆ ಹಿಡಿದು ಓಡೋಡಿ ಬಂದರು. ಜೊತೆಗೇ ಶಾಲೆಯ ಹೆಡ್ ಮಾಸ್ತರರು, ಜೋಯಿಸರು ಮತ್ತಿತರೇ ಮಾಸ್ತರರುಗಳೂ ಇದ್ದರು. ಮನೆಯಲ್ಲಿ ಎಲ್ಲರಿಗೂ ಏನಾಯಿತೆಂದು ಆತಂಕ. ಏದುಸಿರು ಬಿಡುತ್ತಾ ಭಟ್ಟರೇ ಹೇಳಿದರು - ವಿಶ್ವನಾಥರಾಯರೇ ನಿಮ್ಮ ಹುಡುಗ ಅಲ್ಲಲ್ಲ ನನ್ನ ಹುಡುಗ ಮಾರುತಿ ಹತ್ತನೆಯ ತರಗತಿ ಪರೀಕ್ಷೆಯಲ್ಲಿ ಮೊದಲ rank ಗಳಿಸಿದ್ದಾನೆ. ರಾಜ್ಯ ಸರ್ಕಾರದವರು ಅವನ ಮುಂದಿನ ಓದನ್ನೆಲ್ಲಾ ನೋಡಿಕೊಳ್ಳುತ್ತಾರೆ.

ಎಲ್ಲರೂ ಮಾರುತಿಯನ್ನು ಕೇಳಿದರು, ಏನನಿಸತ್ತೋ ಪುಟ್ಟಾ, ಮುಂದೆ ಓದಲು ನೀನೆಲ್ಲಿಗೆ ಹೋಗ್ತೀ? ಮಾರುತಿ ಎಂದ, ನನಗೆ ಓದು ಬೇಡ! ನನಗೆ ಕೆಲಸ ಬೇಕು. ಯಾರಾದರೂ ಕೆಲಸ ಕೊಡಿಸಿ - ಇಲ್ಲದಿದ್ದಲ್ಲಿ ಭಟ್ಟರ ಹೊಟೆಲ್ ಗೆ ಕೆಲಸಕ್ಕೆ ಸೇರುವೆ.

ಮುಂದೇನಾಯಿತು ....

ಕಾದು ನೋಡಿ - ಅಥವಾ ನೀವೇ ಯೋಚಿಸಿ ಮುಂದಿನ ಭಾಗ ಬರೆಯಿರಿ.

Google Spreadsheets - Unicode Text rendering problem in Formulas

2006-06-13T13:06:00.000-05:00

Yesterday, while experimenting out new Google-Spreadsheet features, figured out the following problem with the formulas containing unicode kannada text.

Problem:
Kannada unicode text when used inside a formula, is not being rendered properly.

Here are the screenshots from Google-spreadsheets and from MS-Excel.

Google Spreadsheet:

You can notice that, the kannada unicode text "ಕಸ್ತೂರಿ" is not rendered properly. We see ?????? in place of that text (cell C2). However, it works perfect when the same text is put in a separate cell. That is, the formula used in C1 works just fine.

MS Excel:

As you can see from this screenshot, the unicode text("ಕಸ್ತೂರಿ) used inside the formula (cell C2) is displayed properly.

Regards,

Mana

ಇದು ನನ್ನ ಮೊದಲ ಬ್ಲಾಗ್ ಪ್ರಯತ್ನ

2006-05-26T23:31:00.000-05:00

ನಮಸ್ಕಾರ.

ಮನದ ಮಾತು ಕೇಳಲು, ನೋಡಲು ಉತ್ಸುಕರಾಗಿ ಬಂದಿರುವ ನಿಮಗೆ ಸ್ವಾಗತ.

ಮತ್ತೆ ಬರೆಯುವೆ. ನಿಮ್ಮ ಸಲಹೆ ಸೂಚನೆಗಳೇನಾದರೂ ಇದ್ದಲ್ಲಿ, ಇಲ್ಲಿ ತಿಳಿಸಿ.

ಶುಭವಾಗಲಿ,

ಮನ Mana

Welcome To the World of Mana's Blogs

2005-10-24T15:14:00.000-05:00

Thanks for visiting my blog spot.

Watchout this space for more blogs